Mukaashfa 10

farishta aur jhoota toomaar

¹phir main nay ek aur taaqatvar farishta dekha. vah baadal odhay huay aasmaan say utar raha tha aur us kay sar kay oopar qaus-ay-quzah thee. us ka chihara sooraj jaisa tha aur us kay paaon aag kay satoon jaisay. ²us kay haath men ek chhota toomaar tha jo khula tha. apnay ek paaon ko us nay samundar par rakh diya aur doosray ko zameen par. ³phir vah oonchee aavaaz say pukaar utha. aisay laga jaisay sherbabar garaj raha hai. is par kadak kee saat aavaazen bolnay lageen. ⁴un kay bolnay par main un kee baaten likhnay ko tha ki ek aavaaz nay kaha, “kadak kee saat aavaazon kee baaton par muhar laga aur unhen mat likhna.”

⁵phir us farishtay nay jisay main nay samundar aur zameen par khada dekha apnay dahenay haath ko aasmaan kee taraf utha kar ⁶allaah kay naam kee qasam khaaee, us kay naam kee jo azal say abad tak zinda hai aur jis nay aasmaanon, zameen aur samundar ko un tamaam cheezon samet khalaq kiya jo un men hain. farishtay nay kaha, “ab der naheen hogee. ⁷jab saatvaan farishta apnay turam men phoonk maarnay ko hoga tab allaah ka bhed jo us nay apnay nubuvvat karnay vaalay khaadimon ko bataaya tha takmeel tak pahunchega.”

⁸phir jo aavaaz aasmaan say sunaaee dee thee us nay ek baar phir mujh say baat kee, “ja, vah toomaar lay lena jo samundar aur zameen par khaday farishtay kay haath men khula pada hai.”

⁹chunaanchay main nay farishtay kay paas ja kar us say guzaarish kee ki vah mujhay chhota toomaar day. us nay mujh say kaha, “isay lay aur kha lay. yah teray munh men shahed kee tarah meetha lagega, lekin teray meday men kadavaahat paida karega.”

¹⁰main nay chhotay toomaar ko farishtay kay haath say lay kar usay kha liya. meray munh men to vah shahed kee tarah meetha lag raha tha, lekin meday men ja kar us nay kadavaahat paida kar dee. ¹¹phir mujhay bataaya gaya, “laazim hai ki too bahut ummaton, qaumon, zabaanon aur baadshaahon kay baaray men mazeed nubuvvat karay.”