Mukaashfa 1
1yah eesa maseeh kee taraf say mukaashfa hai jo allaah nay usay ata kiya taaki vah apnay khaadimon ko vah kuchh dikhaaay jisay jald hee pesh aana hai. us nay apnay farishtay ko bhej kar yah mukaashfa apnay khaadim yoohanna tak pahuncha diya. 2aur jo kuchh bhee yoohanna nay dekha hai us kee gavaahee us nay dee hai, khwaah allaah ka kalaam ho ya eesa maseeh kee gavaahee. 3mubaarak hai vah jo is nubuvvat kee tilaavat karta hai. haan, mubaarak hain vah jo sun kar apnay dilon men is kitaab men darj baaten mahfooz rakhtay hain, kyoonki yah jald hee pooree ho jaaengee.
saat jamaaaton ko salaam
4yah khat yoohanna kee taraf say sooba aasiya kee saat jamaaaton kay liyay hai.
aap ko allaah kee taraf say fazl aur salaamatee haasil rahay, us kee taraf say jo hai, jo tha aur jo aanay vaala hai, un saat roohon kee taraf say jo us kay takht kay saamnay hotee hain, 5aur eesa maseeh kee taraf say yaanee us say jo in baaton ka vafaadaar gavaah, murdon men say pahela jee uthnay vaala aur duniya kay baadshaahon ka sardaar hai.
us kee tamjeed ho jo hamen piyaar karta hai, jis nay apnay khoon say hamen hamaaray gunaahon say khalaasee bakhshee hai 6aur jis nay hamen shaahee ikhtiyaar day kar apnay khuda aur baap kay imaam bana diya hai. usay azal say abad tak jalaal aur qudrat haasil rahay! aameen.
7dekhen, vah baadlon kay saath a raha hai. har ek usay dekhega, vah bhee jinhon nay usay chheda tha. aur duniya kee tamaam qaumen usay dekh kar aah-o-zaaree karengee. haan, aisa hee ho! aameen.
8rabb khuda farmaata hai, “main avval aur aakhir hoon, vah jo hai, jo tha aur jo aanay vaala hai, yaanee qaadir-ay-mutlaq khuda.”
maseeh kee royaa
9main yoohanna aap ka bhaaee aur shareek-ay-haal hoon. mujh par bhee aap kee tarah zulm kiya ja raha hai. main aap kay saath allaah kee baadshaahee men shareek hoon aur eesa men aap kay saath saabitqadam raheta hoon. mujhay allaah ka kalaam sunaanay aur eesa kay baaray men gavaahee denay kee vajah say is jazeeray men jo patmus kahelaata hai chhod diya gaya. 10rabb kay din yaanee itwaar ko main rooh-ul-quds kee girift men a gaya aur main nay apnay peechhay turam kee see ek oonchee aavaaz sunee. 11us nay kaha, “jo kuchh too dekh raha hai usay ek kitaab men likh kar un saat jamaaaton ko bhej dena jo ifisus, smurna, pirgamun, thuaateera, sardees, filadilfiya aur laudeekiya men hain.”
12main nay bolnay vaalay ko dekhnay kay liyay apnay peechhay nazar daalee to sonay kay saat shamaadaan dekhay. 13in shamaadaanon kay darmiyaan koee khada tha jo ibn-ay-aadam kee maanind tha. us nay paaon tak ka lamba chogha pahen rakha tha aur seenay par sonay ka seenaaband baandha hua tha. 14us ka sar aur baal oon ya barf jaisay safed thay aur us kee aankhen aag kay sholay kee maanind theen. 15us kay paaon bhattay men damaktay peetal kee maanind thay aur us kee aavaaz aabshaar kay shor jaisee thee. 16apnay dahenay haath men us nay saat sitaaray thaam rakhay thay aur us kay munh say ek tez aur dodhaaree talvaar nikal rahee thee. us ka chihara pooray zor say chamaknay vaalay sooraj kee tarah chamak raha tha. 17usay dekhtay hee main us kay paaon men gir gaya. main murda sa tha. phir us nay apna dahena haath mujh par rakh kar kaha, “mat dar. main avval aur aakhir hoon. 18main vah hoon jo zinda hai. main to mar gaya tha lekin ab dekh, main abad tak zinda hoon. aur maut aur paataal kee kunjiyaan meray haath men hain. 19chunaanchay jo kuchh too nay dekha hai, jo abhee hai aur jo aainda hoga usay likh day. 20meray dahenay haath men saat sitaaron aur saat shamaadaanon ka posheeda matlab yah hai : yah saat sitaaray aasiya kee saat jamaaaton kay farishtay hain, aur yah saat shamaadaan yah saat jamaaaten hain.