Amsaal 9
hikmat kee ziyaafat
1hikmat nay apna ghar taameer karkay apnay liyay saat satoon taraash liyay hain.
2apnay jaanvaron ko zabah karnay aur apnee mai tayyaar karnay kay baad us nay apnee mez bichhaaee hai. 3ab us nay apnee naukraaniyon ko bheja hai, aur khud bhee logon ko shaher kee bulandiyon say ziyaafat karnay kee daavat detee hai,
4“jo saadaalauh hai, vah meray paas aaay.” naasamajh logon say vah kahetee hai, 5“aao, meree rotee khaao, vah mai piyo jo main nay tayyaar kar rakhee hai. 6apnee saadaalauh raahon say baaz aao to jeetay rahogay, samajh kee raah par chal pado.”
7jo laan-taan karnay vaalay ko taaleem day us kee apnee rusvaaee ho jaaegee, aur jo bedeen ko daantay usay nuqsaan pahunchega. 8laan-taan karnay vaalay kee malaamat na kar varna vah tujh say nafrat karega. daanishmand kee malaamat kar to vah tujh say muhabbat karega. 9daanishmand ko hidaayat day to us kee hikmat mazeed badhegee, raastbaaz ko taaleem day to vah apnay ilm men izaafa karega.
10rabb ka khauf maannay say hee hikmat shuroo hotee hai, quddoos khuda ko jaannay say hee samajh haasil hotee hai. 11mujh say hee teree umr kay dinon aur saalon men izaafa hoga. 12agar too daanishmand ho to khud is say faaida uthaaega, agar laan-taan karnay vaala ho to tujhay hee is ka nuqsaan jhelna padega.
hamaaqat beebee kee ziyaafat
13hamaaqat beebee belagaam aur naasamajh hai, vah kuchh naheen jaantee. 14us ka ghar shaher kee bulandee par vaaqay hai. darvaazay kay paas kursee par baithee 15vah guzarnay vaalon ko jo seedhee raah par chaltay hain oonchee aavaaz say daavat detee hai, 16“jo saadaalauh hai vah meray paas aaay.”
jo naasamajh hain un say vah kahetee hai, 17“choree ka paanee meetha aur posheedgee men khaaee gaee rotee lazeez hotee hai.”
18lekin unhen maaloom naheen ki hamaaqat beebee kay ghar men sirf murdon kee roohen bastee hain, ki us kay mehamaan paataal kee gaheraaiyon men rahetay hain.