Amsaal 8
hikmat kee daavat aur vaadaa
1suno! kya hikmat aavaaz naheen detee? haan, samajh oonchee aavaaz say elaan kartee hai. 2vah bulandiyon par khadee hai, us jagah jahaan tamaam raastay ek doosray say miltay hain. 3shaher kay darvaazon par jahaan log nikaltay aur daakhil hotay hain vahaan hikmat zordaar aavaaz say pukaartee hai,
4“ai mardo, main tum hee ko pukaartee hoon, tamaam insaanon ko aavaaz detee hoon.
5ai saadaalauho, hoshyaaree seekh lo! ai ahemqo, samajh apna lo!
6suno, kyoonki main sharaafat kee baaten kartee hoon, aur meray hont sachchaaee pesh kartay hain.
7mera munh sachch bolta hai, kyoonki meray hont bedeenee say ghin khaatay hain.
8jo bhee baat meray munh say niklay vah raast hai, ek bhee pechdaar ya tedhee naheen hai.
9samajhdaar jaanta hai ki meree baaten sab durust hain, ilm rakhnay vaalay ko maaloom hai ki vah saheeh hain.
10chaandee kee jagah meree tarbiyat aur khaalis sonay kay bajaay ilm-o-irfaan apna lo.
11kyoonki hikmat motiyon say kaheen behatar hai, koee bhee khazaana us ka muqaabla naheen kar sakta.
12main jo hikmat hoon hoshyaaree kay saath bastee hoon, aur main tameez ka ilm rakhtee hoon.
13jo rabb ka khauf maanta hai vah buraaee say nafrat karta hai. mujhay gharoor, takabbur, ghalat chaal-chalan aur tedhee baaton say nafrat hai.
14meray paas achchha mashvra aur kaamyaabee hai. mera doosra naam samajh hai, aur mujhay quvvat haasil hai.
15meray vaseelay say baadshaah saltanat aur hukmaraan raast faislay kartay hain.
16meray zareeay raees aur shurfa balki tamaam aadil munsif hukoomat kartay hain.
17jo mujhay piyaar kartay hain unhen main piyaar kartee hoon, aur jo mujhay dhoondtay hain vah mujhay pa letay hain.
18meray paas izzat-o-daulat, shaandaar maal aur raastee hai.
19mera phal sonay balki khaalis sonay say kaheen behatar hai, meree paidaavaar khaalis chaandee par sabqat rakhtee hai.
20main raastee kee raah par hee chaltee hoon, vaheen jahaan insaaf hai.
21jo mujh say muhabbat rakhtay hain unhen main meeraas men daulat muhayya kartee hoon. un kay godaam bharay rahetay hain.
hikmat ka takhleeq men hissaa
22jab rabb takhleeq ka silsila amal men laaya to pahelay us nay mujhay hee banaaya. qadeem zamaanay men main us kay deegar kaamon say pahelay hee vujood men aaee.
23mujhay azal say muqarrar kiya gaya, ibtida hee say jab duniya abhee paida naheen huee thee.
24na samundar kee gaheraaiyaan, na kasrat say phootnay vaalay chashmay thay jab main nay janm liya.
25na pahaad apnee apnee jagah par qaaim huay thay, na pahaadiyaan theen jab main paida huee.
26us vaqt allaah nay na zameen, na us kay maidaan, aur na duniya kay pahelay dhelay banaaay thay.
27jab us nay aasmaan ko us kee jagah par lagaaya aur samundar kee gaheraaiyon par zameen ka ilaaqa muqarrar kiya to main saath thee.
28jab us nay aasmaan par baadlon aur gaheraaiyon men sarchashmon ka intizaam mazboot kiya to main saath thee.
29jab us nay samundar kee hadden muqarrar keen aur hukm diya ki paanee un say tajaavuz na karay, jab us nay zameen kee bunyaaden apnee apnee jagah par rakheen
30to main maahir kaareegar kee haisiyat say us kay saath thee. roz-ba-roz main lutf ka baais thee, har vaqt us kay huzoor rangraliyaan manaatee rahee.
31main us kee zameen kee satah par rangraliyaan manaatee aur insaan say lutf’andoz hotee rahee.
32chunaanchay meray beto, meree suno, kyoonki mubaarak hain vah jo meree raahon par chaltay hain.
33meree tarbiyat maan kar daanishmand ban jaao, usay nazar’andaaz mat karna.
34mubaarak hai vah jo meree sunay, jo roz-ba-roz meray darvaazay par chaukas khada rahay, rozaana meree chaukhat par haazir rahay.
35kyoonki jo mujhay paaay vah zindagee aur rabb kee manzooree paata hai.
36lekin jo mujhay paanay say qaasir rahay vah apnee jaan par zulm karta hai, jo bhee mujh say nafrat karay usay maut piyaaree hai.”