Amsaal 6

zamaanat denay, kaahilee aur jhoot say khabardaar

¹meray betay, kya too apnay padosee ka zaamin bana hai? kya too nay haath mila kar vaada kiya hai ki main kisee doosray ka zimmaadaar thaheroonga? ²kya too apnay vaaday say bandha hua, apnay munh kay alfaaz say phansa hua hai? ³aisa karnay say too apnay padosee kay haath men a gaya hai, is liyay apnee jaan ko chhudaanay kay liyay us kay saamnay aundhay munh ho kar usay apnee minnat-samaajat say tang kar. ⁴apnee aankhon ko sonay na day, apnay papoton ko oonghnay na day jab tak too is zimmaadaaree say faarigh na ho jaaay. ⁵jis tarah ghazaal shikaaree kay haath say aur parinda chideemaar kay haath say chhoot jaata hai usee tarah sirtod koshish kar taaki teree jaan chhoot jaaay.

⁶ai kaahil, chiyoontee kay paas ja kar us kee raahon par ghaur kar! us kay namoonay say hikmat seekh lay. ⁷us par na sardaar, na afsar ya hukmaraan muqarrar hai, ⁸to bhee vah garmiyon men sardiyon kay liyay khaanay ka zakheera kar rakhtee, fasal kay dinon men khoob khuraak ikatthee kartee hai. ⁹ai kaahil, too mazeed kab tak soya rahega, kab jaag uthega? ¹⁰too kaheta hai, “mujhay thodee der sonay day, thodee der oonghnay day, thodee der haath par haath dharay baithnay day taaki aaraam kar sakoon.” ¹¹lekin khabardaar, jald hee ghurbat raahazan kee tarah tujh par aaegee, muflisee hathiyaar say les daakoo kee tarah tujh par toot padegee.

¹²badam’aash aur kameena kis tarah pahechaana jaata hai? vah munh men jhoot liyay phirta hai, ¹³apnee aankhon, paaon aur ungaliyon say ishaara karkay tujhay fareb kay jaal men phansaanay kee koshish karta hai. ¹⁴us kay dil men kajee hai, aur vah har vaqt buray mansoobay baandhnay men laga raheta hai. jahaan bhee jaaay vahaan jhagday chhid jaatay hain. ¹⁵lekin aisay shakhs par achaanak hee aafat aaegee. ek hee lamhay men vah paash paash ho jaaega. tab us ka ilaaj naamumkin hoga.

¹⁶rabb chhah cheezon say nafrat balki saat cheezon say ghin khaata hai,

¹⁷vah aankhen jo gharoor say dekhtee hain, vah zabaan jo jhoot boltee hai, vah haath jo begunaahon ko qatl kartay hain, ¹⁸vah dil jo buray mansoobay baandhta hai, vah paaon jo doosron ko nuqsaan pahunchaanay kay liyay bhaagtay hain, ¹⁹vah gavaah jo adaalat men jhoot bolta aur vah jo bhaaiyon men jhagda paida karta hai.

zina karnay say khabardaar

²⁰meray betay, apnay baap kay hukm say lipta rah, aur apnee maan kee hidaayat nazar’andaaz na kar. ²¹unhen yoon apnay dil kay saath baandhay rakh ki kabhee door na ho jaaen. unhen haar kee tarah apnay galay men daal lay. ²²chaltay vaqt vah teree raahanumaaee karen, aaraam kartay vaqt teree paheraadaaree karen, jaagtay vaqt tujh say hamkalaam hon. ²³kyoonki baap ka hukm charaagh aur maan kee hidaayat raushnee hai, tarbiyat kee daant-dapat zindageebakhsh raah hai. ²⁴yoon too badkaar aurat aur doosray kee zinaakaar beevee kee chiknee-chupdee baaton say mahfooz rahega. ²⁵dil men us kay husn ka laalach na kar, aisa na ho ki vah palak maar maar kar tujhay pakad lay. ²⁶kyoonki go kasbee aadmee ko us kay paisay say maheroom kartee hai, lekin doosray kee zinaakaar beevee us kee qeemtee jaan ka shikaar kartee hai.

²⁷kya insaan apnee jholee men bhadaktee aag yoon utha kar phir sakta hai ki us kay kapday na jalen? ²⁸ya kya koee dahektay koilon par yoon phir sakta hai ki us kay paaon jhulas na jaaen? ²⁹isee tarah jo kisee doosray kee beevee say hambistar ho jaaay us ka anjaam bura hai, jo bhee doosray kee beevee ko chheday usay saza milegee. ³⁰jo bhook kay maaray apna pet bharnay kay liyay choree karay usay log hadd say ziyaada haqeer naheen jaantay, ³¹haalaanki usay choree kiay huay maal ko saat guna vaapas karna hai aur us kay ghar kee daulat jaatee rahegee. ³²lekin jo kisee doosray kee beevee kay saath zina karay vah beaqal hai. jo apnee jaan ko tabaah karna chaahay vahee aisa karta hai. ³³us kee pitaaee aur beizzatee kee jaaegee, aur us kee sharmindagee kabhee naheen mitegee. ³⁴kyoonki shauhar ghairat kha kar aur taish men a kar berahemee say badla lega. ³⁵na vah koee muaavaza qabool karega, na rishvat lega, khwaah kitnee ziyaada kyoon na ho.