Amsaal 5
zinaakaaree say khabardaar
1meray betay, meree hikmat par dhyaan day, meree samajh kee baaton par kaan dhar. 2phir too tameez ka daaman thaamay rahega, aur teray hont ilm-o-irfaan mahfooz rakhengay. 3kyoonki zinaakaar aurat kay honton say shahed tapakta hai, us kee baaten tel kee tarah chiknee-chupdee hotee hain. 4lekin anjaam men vah zaher jaisee kadvee aur dodhaaree talvaar jaisee tez saabit hotee hai. 5us kay paaon maut kee taraf utartay, us kay qadam paataal kee jaanib badhtay jaatay hain. 6us kay raastay kabhee idhar kabhee idhar phirtay hain taaki too zindagee kee raah par tavajjuh na day aur us kee aavaargee ko jaan na lay.
7chunaanchay meray beto, meree suno aur meray munh kee baaton say door na ho jaao. 8apnay raastay us say door rakh, us kay ghar kay darvaazay kay qareeb bhee na ja. 9aisa na ho ki too apnee taaqat kisee aur kay liyay sarf karay aur apnay saal zaalim kay liyay zaaay karay. 10aisa na ho ki pardesee teree milkiyat say ser ho jaaen, ki jo kuchh too nay mehanat-mashaqqat say haasil kiya vah kisee aur kay ghar men aaay. 11tab aakhirkaar tera badan aur gosht ghul jaaengay, aur too aahen bhar bhar kar 12kahega, “haay, main nay kyoon tarbiyat say nafrat kee, meray dil nay kyoon sarzanish ko haqeer jaana? 13hidaayat karnay vaalon kee main nay na sunee, apnay ustaadon kee baaton par kaan na dhara. 14jamaaat kay darmiyaan hee rahetay huay mujh par aisee aafat aaee ki main tabaahee kay dahaanay tak pahunch gaya hoon.”
15apnay hee hauz ka paanee aur apnay hee kuen say phootnay vaala paanee pee lay. 16kya munaasib hai ki teray chashmay galiyon men aur teree nadiyaan chaukon men bah niklen? 17jo paanee tera apna hai vah tujh tak mahdood rahay, ajnabee us men shareek na ho jaaay. 18tera chashma mubaarak ho. haan, apnee beevee say khush rah. 19vahee teree manamohan hirnee aur dilruba ghazaal [a] lafzee tarjuma : pahaadee bakree. hai. usee ka piyaar tujhay tar-o-taaza karay, usee kee muhabbat tujhay hamesha mast rakhay.
20meray betay, too ajnabee aurat say kyoon mast ho jaaay, kisee doosray kee beevee say kyoon lipat jaaay? 21khayaal rakh, insaan kee raahen rabb ko saaf dikhaaee detee hain, jahaan bhee vah chalay us par vah tavajjuh deta hai. 22bedeen kee apnee hee harkaten usay phansa detee hain, vah apnay hee gunaah kay rasson men jakda raheta hai. 23vah tarbiyat kee kamee kay sabab say halaak ho jaaega, apnee badee hamaaqat kay baais dagmagaatay huay apnay anjaam ko pahunchega.