Amsaal 31

lamooel kee kahaavaten

¹zail men massa kay baadshaah lamooel kee kahaavaten hain. us kee maan nay usay yah taaleem dee,

²ai meray betay, meray pet kay phal, jo meree mannaton say paida hua, main tujhay kya bataaoon? ³apnee pooree taaqat aurton par zaaay na kar, un par jo baadshaahon kee tabaahee ka baais hain.

⁴ai lamooel, baadshaahon kay liyay mai peena munaasib naheen, hukmaraanon kay liyay sharaab kee aarzoo rakhna mauzoon naheen. ⁵aisa na ho ki vah pee pee kar qavaaneen bhool jaaen aur tamaam mazloomon ka haq maaren. ⁶sharaab unhen pila jo tabaah honay vaalay hain, mai unhen pila jo gham khaatay hain, ⁷aisay hee pee pee kar apnee ghurbat aur museebat bhool jaaen.

⁸apna munh un kay liyay khol jo bol naheen saktay, un kay haq men jo zarooratmand hain. ⁹apna munh khol kar insaaf say adaalat kar aur museebatzada aur ghareebon kay huqooq mahfooz rakh.

sughad beevee kee taareef

¹⁰sughad beevee kaun pa sakta hai? aisee aurat motiyon say kaheen ziyaada beshaqeemat hai. ¹¹us par us kay shauhar ko poora etimaad hai, aur vah nafa say maheroom naheen rahega. ¹²umr bhar vah usay nuqsaan naheen pahunchaaegee balki barkat ka baais hogee.

¹³vah oon aur san chun kar badee mehanat say dhaaga bana letee hai. ¹⁴tijaartee jahaazon kee tarah vah doordaraaz ilaaqon say apnee rotee lay aatee hai.

¹⁵vah pau phatnay say pahelay hee jaag uthtee hai taaki apnay ghar vaalon kay liyay khaana aur apnee naukraaniyon kay liyay un ka hissa tayyaar karay. ¹⁶soch-bichaar kay baad vah khet khareed letee, apnay kamaaay huay paison say angoor ka baagh laga letee hai.

¹⁷taaqat say kamarbasta ho kar vah apnay baazooon ko mazboot kartee hai. ¹⁸vah mahsoos kartee hai, “mera kaarobaar faaidaamand hai,” is liyay us ka charaagh raat kay vaqt bhee naheen bujhta. ¹⁹us kay haath har vaqt oon aur kataan kaatnay men masroof rahetay hain. ²⁰vah apnee mutthee museebatazadon aur ghareebon kay liyay khol kar un kee madad kartee hai. ²¹jab barf paday to usay ghar vaalon kay baaray men koee dar naheen, kyoonki sab garm garm kapday pahenay huay hain. ²²apnay bistar kay liyay vah achchhay kambal bana letee, aur khud vah baareek kataan aur arghvaanee rang kay libaas pahenay phirtee hai.

²³shaher kay darvaazay men baithay mulk kay buzurg us kay shauhar say khoob vaaqif hain, aur jab kabhee koee faisla karna ho to vah bhee shoora men shareek hota hai.

²⁴beevee kapdon kee silaaee karkay unhen farokht kartee hai, saudaagar us kay kamarband khareed letay hain.

²⁵vah taaqat aur vaqaar say mulabbas rahetee aur hans kar aanay vaalay dinon ka saamna kartee hai. ²⁶vah hikmat say baat kartee, aur us kee zabaan par shafeeq taaleem rahetee hai. ²⁷vah sustee kee rotee naheen khaatee balki apnay ghar men har muaamalay kee dekh-bhaal kartee hai.

²⁸us kay betay khaday ho kar usay mubaarak kahetay hain, us ka shauhar bhee us kee taareef karkay kaheta hai, ²⁹“bahut see aurten sughad saabit huee hain, lekin too un sab par sabqat rakhtee hai!”

³⁰dilfarebee, dhoka aur husn pal bhar ka hai, lekin jo aurat allaah ka khauf maanay vah qaabil-ay-taareef hai. ³¹usay us kee mehanat ka ajr do! shaher kay darvaazon men us kay kaam us kee sitaaish karen!.