Amsaal 3
allaah kay khauf aur hikmat kee barkat
1meray betay, meree hidaayat mat bhoolna. meray ahkaam teray dil men mahfooz rahen. 2kyoonki in hee say teree zindagee kay dinon aur saalon men izaafa hoga aur teree khushhaalee badhegee. 3shafqat aur vafa tera daaman na chhoden. unhen apnay galay say baandhna, apnay dil kee takhtee par kanda karna. 4tab tujhay allaah aur insaan kay saamnay meharbaanee aur qabooliyat haasil hogee.
5pooray dil say rabb par bharosa rakh, aur apnee aqal par takiya na kar. 6jahaan bhee too chalay sirf usee ko jaan lay, phir vah khud teree raahon ko hamvaar karega. 7apnay aap ko daanishmand mat samajhna balki rabb ka khauf maan kar buraaee say door rah. 8is say tera badan sehat paaega aur teree haddiyaan tar-o-taaza ho jaaengee. 9apnee milkiyat aur apnee tamaam paidaavaar kay pahelay phal say rabb ka ehatiraam kar, 10phir teray godaam anaaj say bhar jaaengay aur teray bartan mai say chhalak uthengay.
11meray betay, rabb kee tarbiyat ko radd na kar, jab vah tujhay daantay to ranjeeda na ho. 12kyoonki jo rabb ko piyaara hai us kee vah taadeeb karta hai, jis tarah baap us betay ko tambeeh karta hai jo usay pasand hai.
haqeeqee daulat
13mubaarak hai vah jo hikmat paata hai, jisay samajh haasil hotee hai. 14kyoonki hikmat chaandee say kaheen ziyaada soodmand hai, aur us say sonay say kaheen ziyaada qeemtee cheezen haasil hotee hain. 15hikmat motiyon say ziyaada nafees hai, teray tamaam khazaanay us ka muqaabla naheen kar saktay. 16us kay dahenay haath men umr kee daraazee aur baaen haath men daulat aur izzat hai. 17us kee raahen khushgavaar, us kay tamaam raastay pur’amn hain. 18jo us ka daaman pakad lay us kay liyay vah zindagee ka darakht hai. mubaarak hai vah jo us say lipta rahay. 19rabb nay hikmat kay vaseelay say hee zameen kee bunyaad rakhee, samajh kay zareeay hee aasmaan ko mazbootee say lagaaya. 20us kay irfaan say hee gaheraaiyon ka paanee phoot nikla aur aasmaan say shabnam tapak kar zameen par padtee hai.
21meray betay, daanaaee aur tameez apnay paas mahfooz rakh aur unhen apnee nazar say door na honay day. 22un say teree jaan tar-o-taaza aur tera gala aaraasta rahega. 23tab too chaltay vaqt mahfooz rahega, aur tera paaon thokar naheen khaaega. 24too paaon phaila kar so sakega, koee sadma tujhay naheen pahunchega balki too let kar gaheree neend soega. 25naaghaan aafat say mat darna, na us tabaahee say jo bedeen par ghaalib aatee hai, 26kyoonki rabb par tera etimaad hai, vahee teray paaon ko phans jaanay say mahfooz rakhega.
doosron kee madad karnay kee naseehat
27agar koee zarooratmand ho aur too us kee madad kar sakay to us kay saath bhalaaee karnay say inkaar na kar. 28agar too aaj kuchh day sakay to apnay padosee say mat kahena, “kal aana to main aap ko kuchh day doonga.” 29jo padosee befikr teray saath raheta hai us kay khilaaf buray mansoobay mat baandhna. 30jis nay tujhay nuqsaan naheen pahunchaaya adaalat men us par bebunyaad ilzaam na lagaana.
31na zaalim say hasad kar, na us kee koee raah ikhtiyaar kar. 32kyoonki buree raah par chalnay vaalay say rabb ghin khaata hai jabki seedhee raah par chalnay vaalon ko vah apnay raazon say aagaah karta hai. 33bedeen kay ghar par rabb kee laanat aatee jabki raastbaaz kay ghar ko vah barkat deta hai. 34mazaaq udaanay vaalon ka vah mazaaq udaata, lekin farotanon par meharbaanee karta hai. 35daanishmand meeraas men izzat paaengay jabki ahemaq kay naseeb men sharmindagee hogee.