Amsaal 29

¹jo mut’addid naseehaton kay baavujood hatdharm rahay vah achaanak hee barbaad ho jaaega, aur shifa ka imkaan hee naheen hoga.

²jab raastbaaz bahut hain to qaum khush hotee, lekin jab bedeen hukoomat karay to qaum aahen bhartee hai.

³jisay hikmat piyaaree ho vah apnay baap ko khushee dilaata hai, lekin kasbiyon ka saathee apnee daulat uda deta hai.

⁴baadshaah insaaf say mulk ko mustahkam karta, lekin hadd say ziyaada taiks lenay say usay tabaah karta hai.

⁵jo apnay padosee kee chaaploosee karay vah us kay qadmon kay aagay jaal bichhaata hai.

⁶shareer jurm kartay vaqt apnay aap ko phansa deta, lekin raastbaaz khushee mana kar shaadmaan raheta hai.

⁷raastbaaz pastahaalon kay huqooq ka khayaal rakhta hai, lekin bedeen parva hee naheen karta.

⁸taanaazan shaher men afra-tafree macha detay jabki daanishmand ghussa thanda kar detay hain.

⁹jab daanishmand aadmee adaalat men ahemaq say laday to ahemaq taish men a jaata ya qahqaha lagaata hai, sukoon ka imkaan hee naheen hota.

¹⁰khoonkhaar aadmee beilzaam shakhs say nafrat karta, lekin seedhee raah par chalnay vaala us kee behatree chaahata hai.

¹¹ahemaq apna poora ghussa utaarta, lekin daanishmand usay rok kar qaaboo men rakhta hai.

¹²jo hukmaraan jhoot par dhyaan day us kay tamaam mulaazim bedeen hongay.

¹³jab ghareeb aur zaalim kee mulaaqaat hotee hai to donon kee aankhon ko raushan karnay vaala rabb hee hai.

¹⁴jo baadshaah diyaanatdaaree say zarooratmand kee adaalat karay us ka takht hamesha tak qaaim rahega.

¹⁵chhadee aur naseehat hikmat paida kartee hain. jisay belagaam chhoda jaaay vah apnee maan kay liyay sharmindagee ka baais hoga.

¹⁶jab bedeen phalen phoolen to gunaah bhee phalta phoolta hai, lekin raastbaaz un kee shikast kay gavaah hongay.

¹⁷apnay betay ko tarbiyat day to vah tujhay sukoon aur khushee dilaaega.

¹⁸jahaan roya naheen vahaan qaum belagaam ho jaatee hai, lekin mubaarak hai vah jo shareeat kay taabay raheta hai.

¹⁹naukar sirf alfaaz say naheen sudharta. agar vah baat samjhay bhee to bhee dhyaan naheen dega.

²⁰kya koee dikhaaee deta hai jo baat karnay men jaldbaaz hai? us kee nisbat ahemaq kay sudharnay kee ziyaada ummeed hai.

²¹jo ghulaam javaanee say naaz-o-nemat men pal kar bigad jaaay us ka bura anjaam hoga.

²²ghazab’aalood aadmee jhagday chhedta raheta hai, ghuseelay shakhs say mut’addid gunaah sarzad hotay hain.

²³takabbur apnay maalik ko past kar dega jabki farotan shakhs izzat paaega.

²⁴jo chor ka saathee ho vah apnee jaan say nafrat rakhta hai. go us say halaf uthvaaya jaaay ki choree kay baaray men gavaahee day to bhee kuchh naheen bataata balki halaf kee laanat kee zad men a jaata hai.

²⁵jo insaan say khauf khaaay vah phanday men phans jaaega, lekin jo rabb ka khauf maanay vah mahfooz rahega.

²⁶bahut log hukmaraan kee manzooree kay taalib rahetay hain, lekin insaaf rabb hee kee taraf say milta hai.

²⁷raastbaaz badkaar say aur bedeen seedhee raah par chalnay vaalay say ghin khaata hai.