Amsaal 28
1bedeen faraar ho jaata hai haalaanki taaqqub karnay vaala koee naheen hota, lekin raastbaaz apnay aap ko javaan sherbabar kee tarah mahfooz samajhta hai.
2mulk kee khataakaaree kay sabab say us kee hukoomat kee yagaangat qaaim naheen rahegee, lekin samajhdaar aur daanishmand aadmee usay badee der tak qaaim rakhega.
3jo ghareeb ghareebon par zulm karay vah us mooslaadhaar baarish kee maanind hai jo sailaab la kar faslon ko tabaah kar detee hai.
4jis nay shareeat ko tark kiya vah bedeen kee taareef karta hai, lekin jo shareeat kay taabay raheta hai vah us kee mukhaalafat karta hai.
5shareer insaaf naheen samajhtay, lekin rabb kay taalib sab kuchh samajhtay hain.
6beilzaam zindagee guzaarnay vaala ghareeb tedhee raahon par chalnay vaalay ameer say behatar hai.
7jo shareeat kee pairvee karay vah samajhdaar beta hai, lekin ayyaashon ka saathee apnay baap kee beizzatee karta hai.
8jo apnee daulat naajaaiz sood say badhaaay vah usay kisee aur kay liyay jama kar raha hai, aisay shakhs kay liyay jo ghareebon par rahem karega.
9jo apnay kaan men unglee daalay taaki shareeat kee baaten na sunay us kee duaaen bhee qaabil-ay-ghin hain.
10jo seedhee raah par chalnay vaalon ko ghalat raah par laaay vah apnay hee gadhay men gir jaaega, lekin beilzaam achchhee meeraas paaengay.
11ameer apnay aap ko daanishmand samajhta hai, lekin jo zarooratmand samajhdaar hai vah us ka aslee kirdaar maaloom kar leta hai.
12jab raastbaaz fathayaab hon to mulk kee shaan-o-shaukat badh jaatee hai, lekin jab bedeen uth khaday hon to log chhup jaatay hain.
13jo apnay gunaah chhupaaay vah naakaam rahega, lekin jo unhen tasleem karkay tark karay vah rahem paaega.
14mubaarak hai vah jo har vaqt rabb ka khauf maanay, lekin jo apna dil sakht karay vah museebat men phans jaaega.
15pastahaal qaum par hukoomat karnay vaala bedeen ghurraatay huay sherbabar aur hamlaaaavar reechh kee maanind hai.
16jahaan naasamajh hukmaraan hai vahaan zulm hota hai, lekin jisay ghalat nafa say nafrat ho us kee umr daraaz hogee.
17jo kisee ko qatl karay vah maut tak apnay qusoor kay neechay daba hua maara maara phirega. aisay shakhs ka sahaara na ban!
18jo beilzaam zindagee guzaaray vah bacha rahega, lekin jo tedhee raah par chalay vah achaanak hee gir jaaega.
19jo apnee zameen kee kheteebaadee karay vah jee bhar kar rotee khaaega, lekin jo fuzool cheezon kay peechhay pad jaaay vah ghurbat say ser ho jaaega.
20qaabil-ay-etimaad aadmee ko kasrat kee barkaten haasil hongee, lekin jo bhaag bhaag kar daulat jama karnay men masroof rahay vah saza say naheen bachega.
21jaanibdaaree buree baat hai, lekin insaan rotee ka tukda haasil karnay kay liyay mujrim ban jaata hai.
22laalchee bhaag bhaag kar daulat jama karta hai, usay maaloom hee naheen ki is ka anjaam ghurbat hee hai.
23aakhirkaar naseehat denay vaala chaaploosee karnay vaalay say ziyaada manzoor hota hai.
24jo apnay baap ya maan ko loot kar kahay, “yah jurm naheen hai” vah muhalak qaatil ka shareek-ay-kaar hota hai.
25laalchee jhagdon ka mamba raheta hai, lekin jo rabb par bharosa rakhay vah khushhaal rahega.
26jo apnay dil par bharosa rakhay vah bevuqoof hai, lekin jo hikmat kee raah par chalay vah mahfooz rahega.
27ghareebon ko denay vaala zarooratmand naheen hoga, lekin jo apnee aankhen band karkay unhen nazar’andaaz karay us par bahut laanten aaengee .
28jab bedeen uth khaday hon to log chhup jaatay hain, lekin jab halaak ho jaaen to raastbaazon kee taadaad badh jaatee hai.