Amsaal 27

¹us par shekhee na maar jo too kal karega, tujhay kya maaloom ki kal ka din kya kuchh faraaham karega?

²tera apna munh aur apnay hont teree taareef na karen balki vah jo tujh say vaaqif bhee na ho.

³patthar bhaaree aur ret vaznee hai, lekin jo ahemaq tujhay tang karay vah ziyaada naaqaabil-ay-bardaasht hai.

⁴ghussa zaalim hota aur taish sailaab kee tarah insaan par a jaata hai, lekin kaun hasad ka muqaabla kar sakta hai?

⁵khulee malaamat chhupee huee muhabbat say behatar hai.

⁶piyaar karnay vaalay kee zarben vafa ka saboot hain, lekin nafrat karnay vaalay kay mut’addid boson say khabardaar rah.

⁷jo ser hai vah shahed ko bhee paaon talay raund deta hai, lekin bhookay ko kadvee cheezen bhee meethee lagtee hain.

⁸jo aadmee apnay ghar say nikal kar maara maara phiray vah us parinday kee maanind hai jo apnay ghonslay say bhaag kar kabhee idhar kabhee idhar phadphadaata raheta hai.

⁹tel aur bakhoor dil ko khush kartay hain, lekin dost apnay achchhay mashvaron say khushee dilaata hai.

¹⁰apnay doston ko kabhee na chhod, na apnay zaatee doston ko na apnay baap kay doston ko. tab tujhay museebat kay din apnay bhaaee say madad naheen maangnee padegee. kyoonki qareeb ka padosee door kay bhaaee say behatar hai.

¹¹meray betay, daanishmand ban kar meray dil ko khush kar taaki main apnay haqeer jaannay vaalay ko javaab day sakoon.

¹²zaheen aadmee khatra pahelay say bhaamp kar chhup jaata hai, jabki saadaalauh aagay badh kar us kee lapet men a jaata hai.

¹³zamaanat ka vah libaas vaapas na kar jo kisee nay pardesee ka zaamin ban kar diya hai. agar vah ajnabee aurat ka zaamin ho to us zamaanat par zaroor qabza kar jo us nay dee thee.

¹⁴jo subah-saveray buland aavaaz say apnay padosee ko barkat day us kee barkat laanat thaheraaee jaaegee.

¹⁵jhagdaaloo beevee mooslaadhaar baarish kay baais musalsal tapaknay vaalee chhat kee maanind hai. ¹⁶usay rokna hava ko roknay ya tel ko pakadnay kay baraabar hai.

¹⁷loha lohay ko aur insaan insaan kay zahen ko tez karta hai.

¹⁸jo anjeer kay darakht kee dekh-bhaal karay vah us ka phal khaaega, jo apnay maalik kee vafaadaaree say khidmat karay us ka ehatiraam kiya jaaega.

¹⁹jis tarah paanee chiharay ko mun’akis karta hai usee tarah insaan ka dil insaan ko mun’akis karta hai.

²⁰na maut aur na paataal kabhee ser hotay hain, na insaan kee aankhen.

²¹sona aur chaandee kuthaalee men pighla kar paak-saaf kar, lekin insaan ka kirdaar is say maaloom kar ki log us kee kitnee qadar kartay hain.

²²agar ahemaq ko anaaj kee tarah ookhlee aur moosal say koota bhee jaaay to bhee us kee hamaaqat door naheen ho jaaegee.

²³ehatiyaat say apnee bhed-bakriyon kee haalat par dhyaan day, apnay revdon par khoob tavajjuh day. ²⁴kyoonki koee bhee daulat hamesha tak qaaim naheen rahetee, koee bhee taaj nasal-dar-nasal barqaraar naheen raheta. ²⁵khulay maidaan men ghaas kaat kar jama kar taaki naee ghaas ug sakay, chaara pahaadon say bhee ikattha kar. ²⁶tab too bhedon kee oon say kapday bana sakega, bakron kee farokht say khet khareed sakega, ²⁷aur bakriyaan itna doodh dengee ki teray, teray khaandaan aur teray naukar-chaakron kay liyay kaafee hoga.