Amsaal 25
sulemaan kee mazeed kahaavaten
1zail men sulemaan kee mazeed kahaavaten darj hain jinhen yahoodaah kay baadshaah hizaqiyaah kay logon nay jama kiya.
2allaah ka jalaal is men zaahir hota hai ki vah muaamala posheeda rakhta hai, baadshaah ka jalaal is men ki vah muaamalay kee tahqeeq karta hai.
3jitna aasmaan buland aur zameen gaheree hai utna hee baadshaahon kay dil ka khoj naheen lagaaya ja sakta.
4chaandee say mail door karo to sunaar bartan banaanay men kaamyaab ho jaaega, 5bedeen ko baadshaah kay huzoor say door karo to us ka takht raastee kee bunyaad par qaaim rahega.
6baadshaah kay huzoor apnay aap par fakhar na kar, na izzat kee us jagah par khada ho ja jo buzurgon kay liyay makhsoos hai. 7is say pahelay ki shurfa kay saamnay hee teree beizzatee ho jaaay behatar hai ki too peechhay khada ho ja aur baad men koee tujh say kahay, “yahaan saamnay a jaaen.”
jo kuchh teree aankhon nay dekha usay adaalat men pesh karnay men 8jaldbaazee na kar, kyoonki too kya karega agar tera padosee teray muaamalay ko jhatla kar tujhay sharminda karay?
9adaalat men apnay padosee say ladtay vaqt vah baat bayaan na kar jo kisee nay posheedgee men teray sapurd kee, 10aisa na ho ki sunnay vaala teree beizzatee karay. tab teree badnaamee kabhee naheen mitegee.
11vaqt par mauzoon baat chaandee kay bartan men sonay kay seb kee maanind hai. 12daanishmand kee naseehat qabool karnay vaalay kay liyay sonay kee baalee aur khaalis sonay kay gulooband kee maanind hai.
13qaabil-ay-etimaad qaasid bhejnay vaalay kay liyay fasal kaattay vaqt barf kee thandak jaisa hai, is tarah vah apnay maalik kee jaan ko tar-o-taaza kar deta hai.
14jo shekhee maar kar tuhfon ka vaada karay lekin kuchh na day vah un toofaanee baadlon kee maanind hai jo barsay baghair guzar jaatay hain.
15hukmaraan ko tahemmul say qaail kiya ja sakta, aur narm zabaan haddiyaan todnay kay qaabil hai.
16agar shahed mil jaaay to zaroorat say ziyaada mat kha, hadd say ziyaada khaanay say tujhay qai aaegee.
17apnay padosee kay ghar men baar baar jaanay say apnay qadmon ko rok, varna vah tang a kar tujh say nafrat karnay lagega.
18jo apnay padosee kay khilaaf jhootee gavaahee day vah hathauday, talvaar aur tez teer jaisa nuqsaandih hai.
19museebat kay vaqt bevafa par etibaar karna kharaab daant ya dagmagaatay paaon kee tarah takleefdih hai.
20dukhtay dil kay liyay geet gaana utna hee ghairmauzoon hai jitna sardiyon kay mausam men qamees utaarna ya soday par sirka daalna.
21agar tera dushman bhooka ho to usay khaana khila, agar piyaasa ho to paanee pila. 22kyoonki aisa karnay say too us kay sar par jaltay huay koilon ka dher lagaaega, aur rabb tujhay ajr dega.
23jis tarah kaalay baadal laanay vaalee hava baarish paida kartee hai usee tarah baatoonee kee chupkay say kee gaee baaton say logon kay munh bigad jaatay hain.
24jhagdaaloo beevee kay saath ek hee ghar men rahenay kee nisbat chhat kay kisee konay men guzaara karna behatar hai.
25doordaraaz mulk kee khushkhabaree piyaasay galay men thanda paanee hai.
26jo raastbaaz bedeen kay saamnay dagmagaanay lagay, vah gadla chashma aur aalooda kuaan hai.
27ziyaada shahed khaana achchha naheen, aur na hee ziyaada apnee izzat kee fikr karna.
28jo apnay aap par qaaboo na pa sakay vah us shaher kee maanind hai jis kee faseel dha dee gaee hai.