Proverbs 24

Amsaal 24

-19-

¹shareeron say hasad na kar, na un say sohbat rakhnay kee aarzoo rakh, ²kyoonki un ka dil zulm karnay par tula raheta hai, un kay hont doosron ko dukh pahunchaatay hain.

-20-

³hikmat ghar ko taameer kartee, samajh usay mazboot bunyaad par khada kar detee, ⁴aur ilm-o-irfaan us kay kamron ko beshaqeemat aur manamohan cheezon say bhar deta hai.

-21-

⁵daanishmand ko taaqat haasil hotee aur ilm rakhnay vaalay kee quvvat badhtee rahetee hai, ⁶kyoonki jang karnay kay liyay hidaayat aur fatah paanay kay liyay mut’addid musheeron kee zaroorat hotee hai.

-22-

⁷hikmat itnee buland-o-baala hai ki ahemaq usay pa naheen sakta. jab buzurg shaher kay darvaazay men faisla karnay kay liyay jama hotay hain to vah kuchh naheen kah sakta.

-23-

⁸buray mansoobay baandhnay vaala saazishee kahelaata hai. ⁹ahemaq kee chaalaakiyaan gunaah hain, aur log taanaazan say ghin khaatay hain.

-24-

¹⁰agar too museebat kay din himmat haar kar dheela ho jaaay to teree taaqat jaatee rahegee.

-25-

¹¹jinhen maut kay havaalay kiya ja raha hai unhen chhuda, jo qasaaee kee taraf dagmagaatay huay ja rahay hain unhen rok day. ¹²shaayad too kahay, “hamen to is kay baaray men ilm naheen tha.” lekin yaqeen jaan, jo dil kee jaanch-padtaal karta hai vah baat samajhta hai, jo teree jaan kee dekh-bhaal karta hai usay maaloom hai. vah insaan ko us kay aamaal ka badla deta hai.

-26-

¹³meray betay, shahed kha kyoonki vah achchha hai, chhattay ka khaalis shahed meetha hai. ¹⁴jaan lay ki hikmat isee tarah teree jaan kay liyay meethee hai. agar too usay paaay to teree ummeed jaatee naheen rahegee balki tera mustaqbil achchha hoga.

-27-

¹⁵ai bedeen, raastbaaz kay ghar kee taak lagaaay mat baithna, us kee rihaaishgaah tabaah na kar. ¹⁶kyoonki go raastbaaz saat baar gir jaaay to bhee har baar dubaara uth khada hoga jabki bedeen ek baar thokar kha kar museebat men phansa rahega.

-28-

¹⁷agar tera dushman gir jaaay to khush na ho, agar vah thokar khaaay to tera dil jashn na manaaay. ¹⁸aisa na ho ki rabb yah dekh kar tera ravayya pasand na karay aur apna ghussa dushman par utaarnay say baaz aaay.

-29-

¹⁹badkaaron ko dekh kar mushtail na ho ja, bedeenon kay baais kudhta na rah. ²⁰kyoonki shareeron ka koee mustaqbil naheen, bedeenon ka charaagh bujh jaaega.

-30-

²¹meray betay, rabb aur baadshaah ka khauf maan, aur sarkashon men shareek na ho. ²²kyoonki achaanak hee un par aafat aaegee, kisee ko pata hee naheen chalega jab donon un par hamla karkay unhen tabaah kar dengay.

daanishmandon kee mazeed kahaavaten

²³zail men daanishmandon kee mazeed kahaavaten qalamband hain.

adaalat men jaanibdaaree dikhaana buree baat hai. ²⁴jo qusoorvaar say kahay, “too bequsoor hai” us par qaumen laanat bhejengee, us kee sarzanish ummaten karengee. ²⁵lekin jo qusoorvaar ko mujrim thaheraaay vah khushhaal hoga, usay kasrat kee barkat milegee.

²⁶sachcha javaab dost kay bosay kee maanind hai.

²⁷pahelay baahar ka kaam mukammal karkay apnay kheton ko tayyaar kar, phir hee apna ghar taameer kar.

²⁸bilaavajah apnay padosee kay khilaaf gavaahee mat day. ya kya too apnay honton say dhoka dena chaahata hai?

²⁹mat kahena, “jis tarah us nay meray saath kiya usee tarah main us kay saath karoonga, main us kay har fel ka munaasib javaab doonga.”

³⁰ek din main sust aur naasamajh aadmee kay khet aur angoor kay baagh men say guzra. ³¹har jagah kaantedaar jhaadiyaan phailee huee theen, khudrau pauday pooree zameen par chha gaay thay. us kee chaardeevaaree bhee gir gaee thee. ³²yah dekh kar main nay dil say dhyaan diya aur sabaq seekh liya,

³³agar too kahay, “mujhay thodee der sonay day, thodee der oonghnay day, thodee der haath par haath dharay baithnay day taaki main aaraam kar sakoon” ³⁴to khabardaar, jald hee ghurbat raahazan kee tarah tujh par aaegee, muflisee hathiyaar say les daakoo kee tarah tujh par a padegee.