Amsaal 23

-6-

¹agar too kisee hukmaraan kay khaanay men shareek ho jaaay to khoob dhyaan day ki too kis kay huzoor hai. ²agar too petoo ho to apnay galay par chhuree rakh. ³us kee umda cheezon ka laalach mat kar, kyoonki yah khaana farebdih hai.

-7-

⁴apnee pooree taaqat ameer bannay men sarf na kar, apnee hikmat aisee koshishon say zaaay mat kar. ⁵ek nazar daulat par daal to vah ojhal ho jaatee hai, aur par laga kar uqaab kee tarah aasmaan kee taraf ud jaatee hai.

-8-

⁶jalnay vaalay kee rotee mat kha, us kay lazeez khaanon ka laalach na kar. ⁷kyoonki yah galay men baal kee tarah hoga. vah tujh say kahega, “khaao, piyo!” lekin us ka dil teray saath naheen hai. ⁸jo luqma too nay kha liya us say tujhay qai aaegee, aur teree us say dostaana baaten zaaay ho jaaengee.

-9-

⁹ahemaq say baat na kar, kyoonki vah teree daanishmand baaten haqeer jaanega.

-10-

¹⁰zameen kee jo hudood qadeem zamaanay men muqarrar hueen unhen aagay peechhay mat karna, aur yateemon kay kheton par qabza na kar. ¹¹kyoonki un ka chhudaanay vaala qavee hai, vah un kay haq men khud teray khilaaf ladega.

-11-

¹²apna dil tarbiyat kay havaalay kar aur apnay kaan ilm kee baaton par laga.

-12-

¹³bachchay ko tarbiyat say maheroom na rakh, chhadee say usay saza denay say vah naheen marega. ¹⁴chhadee say usay saza day to us kee jaan maut say chhoot jaaegee.

-13-

¹⁵meray betay, agar tera dil daanishmand ho to mera dil bhee khush hoga. ¹⁶main andar hee andar khushee manaaoonga jab teray hont diyaanatdaar baaten karengay.

-14-

¹⁷tera dil gunaahgaaron ko dekh kar kudhta na rahay balki pooray din rabb ka khauf rakhnay men sargarm rahay. ¹⁸kyoonki teree ummeed jaatee naheen rahegee balki tera mustaqbil yaqeenan achchha hoga.

-15-

¹⁹meray betay, sun kar daanishmand ho ja aur saheeh raah par apnay dil kee raahanumaaee kar. ²⁰sharaabee aur petoo say daregh kar, ²¹kyoonki sharaabee aur petoo ghareeb ho jaaengay, aur kaahilee unhen cheethday pahenaaegee.

-16-

²²apnay baap kee sun jis nay tujhay paida kiya, aur apnee maan ko haqeer na jaan jab boodhee ho jaaay.

²³sachchaaee khareed lay aur kabhee farokht na kar, us men shaamil hikmat, tarbiyat aur samajh apna lay.

²⁴raastbaaz ka baap badee khushee manaata hai, aur daanishmand betay ka vaalid us say lutf’andoz hota hai.

²⁵chunaanchay apnay maan-baap kay liyay khushee ka baais ho, aisee zindagee guzaar ki teree maan jashn mana sakay.

-17-

²⁶meray betay, apna dil meray havaalay kar, teree aankhen meree raahen pasand karen. ²⁷kyoonki kasbee gahera gadha aur zinaakaar aurat tang kuaan hai, ²⁸daakoo kee tarah vah taak lagaaay baith kar mardon men bevafaaon ka izaafa kartee hai.

-18-

²⁹kaun aahen bharta hai? kaun haay haay karta aur ladaaee-jhagday men mulavvas raheta hai? kis ko bilaavajah choten lagtee, kis kee aankhen dhundalee see rahetee hain? ³⁰vah jo raat gaay tak mai peenay aur masaaledaar mai say maza lenay men masroof raheta hai. ³¹mai ko takta na rah, khwaah us ka surkh rang kitnee khoobsoortee say piyaalay men kyoon na chamkay, khwaah usay baday mazay say kyoon na piya jaaay. ³²anjaamakaar vah tujhay saamp kee tarah kaategee, naag kee tarah dasegee. ³³teree aankhen ajeeb-o-ghareeb manzar dekhengee aur tera dil betukee baaten hakalaaega. ³⁴too samundar kay beech men letnay vaalay kee maanind hoga, us jaisa jo mastool par chadh kar let gaya ho. ³⁵too kahega, “meree pitaaee huee lekin dard mahsoos na hua, mujhay maara gaya lekin maaloom na hua. main kab jaag uthoonga taaki dubaara sharaab kee taraf rukh kar sakoon?”