Proverbs 22

Amsaal 22

¹nek naam badee daulat say qeemtee, aur manzoor-ay-nazar hona sonay-chaandee say behatar hai.

²ameer aur ghareeb ek doosray say miltay jultay hain, rabb un sab ka khaaliq hai.

³zaheen aadmee khatra pahelay say bhaamp kar chhup jaata hai, jabki saadaalauh aagay badh kar us kee lapet men a jaata hai.

⁴farotnee aur rabb ka khauf maannay ka phal daulat, ehatiraam aur zindagee hai.

⁵bedeen kee raah men kaantay aur phanday hotay hain. jo apnee jaan mahfooz rakhna chaahay vah un say door raheta hai.

⁶chhotay bachchay ko saheeh raah par chalnay kee tarbiyat day to vah boodha ho kar bhee us say naheen hatega.

⁷ameer ghareeb par hukoomat karta, aur qarzdaar qarzakhwaah ka ghulaam hota hai.

⁸jo naainsaafee ka beej boay vah aafat kee fasal kaatega, tab us kee ziyaadtee kee laathee toot jaaegee.

⁹fayyaazdil ko barkat milegee, kyoonki vah pastahaal ko apnay khaanay men shareek karta hai.

¹⁰taanaazan ko bhaga day to ladaaee-jhagda ghar say nikal jaaega, too too main main aur ek doosray kee beizzatee karnay ka silsila khatm ho jaaega.

¹¹jo dil kee paakeezgee ko piyaar karay aur meharbaan zabaan ka maalik ho vah baadshaah ka dost banega.

¹²rabb kee aankhen ilm-o-irfaan kee dekh-bhaal kartee hain, lekin vah bevafa kee baaton ko tabaah honay deta hai.

¹³kaahil kaheta hai, “galee men sher hai, agar baahar jaaoon to mujhay kisee chauk men phaad khaaega.”

¹⁴zinaakaar aurat ka munh gahera gadha hai. jis say rabb naaraaz ho vah us men gir jaata hai.

¹⁵bachchay kay dil men hamaaqat tiktee hai, lekin tarbiyat kee chhadee usay bhaga detee hai.

¹⁶ek pastahaal par zulm karta hai taaki daulat paaay, doosra ameer ko tuhfay deta hai lekin ghareeb ho jaata hai.

daanishmandon kee 30 kahaavaten

¹⁷kaan laga kar daanaaon kee baaton par dhyaan day, dil say meree taaleem apna lay! ¹⁸kyoonki achchha hai ki too unhen apnay dil men mahfooz rakhay, vah sab teray honton par mustaid rahen. ¹⁹aaj main tujhay, haan tujhay hee taaleem day raha hoon taaki tera bharosa rabb par rahay. ²⁰main nay teray liyay 30 kahaavaten qalamband kee hain, aisee baaten jo mashvaron aur ilm say bharee huee hain. ²¹kyoonki main tujhay sachchaaee kee qaabil-ay-etimaad baaten sikhaana chaahata hoon taaki too unhen qaabil-ay-etimaad javaab day sakay jinhon nay tujhay bheja hai.

-1-

²²pastahaal ko is liyay na loot ki vah pastahaal hai, museebatzada ko adaalat men mat kuchalna. ²³kyoonki rabb khud un ka difa karkay unhen loot lega jo unhen loot rahay hain.

-2-

²⁴ghuseelay shakhs ka dost na ban, na us say ziyaada taalluq rakh jo jaldee say aag-bagoola ho jaata hai. ²⁵aisa na ho ki too us ka chaal-chalan apna kar apnee jaan kay liyay phanda lagaaay.

-3-

²⁶kabhee haath mila kar vaada na kar ki main doosray kay karzay ka zaamin hoonga. ²⁷qarzdaar kay paisay vaapas na karnay par agar too bhee paisay ada na kar sakay to teree chaarpaaee bhee teray neechay say chheen lee jaaegee.

-4-

²⁸zameen kee jo hudood teray baapdaada nay muqarrar keen unhen aagay peechhay mat karna.

-5-

²⁹kya tujhay aisa aadmee nazar aata hai jo apnay kaam men maahir hai? vah nichlay tabqay kay logon kee khidmat naheen karega balki baadshaahon kee.