Amsaal 21
1baadshaah ka dil rabb kay haath men naher kee maanind hai. vah jidhar chaahay us ka rukh pher deta hai.
2har aadmee kee raah us kee apnee nazar men theek lagtee hai, lekin rabb hee dilon kee jaanch-padtaal karta hai.
3raastbaazee aur insaaf karna rabb ko zabah kee qurbaaniyon say kaheen ziyaada pasand hai.
4maghroor aankhen aur mutakabbir dil jo bedeenon ka charaagh hain gunaah hain.
5mehanatee shakhs kay mansoobay nafa ka baais hain, lekin jaldbaazee ghurbat tak pahuncha detee hai.
6farebdih zabaan say jama kiya hua khazaana bikhar jaanay vaala dhuaan aur muhalak phanda hai.
7bedeenon ka zulm hee unhen ghaseet kar lay jaata hai, kyoonki vah insaaf karnay say inkaar kartay hain.
8qusoorvaar kee raah pechdaar hai jabki paak shakhs seedhee raah par chalta hai.
9jhagdaaloo beevee kay saath ek hee ghar men rahenay kee nisbat chhat kay kisee konay men guzaara karna behatar hai.
10bedeen ghalat kaam karnay kay laalach men raheta hai aur apnay kisee bhee padosee par taras naheen khaata.
11taanaazan par jurmaana laga to saadaalauh sabaq seekhega, daanishmand ko taaleem day to us kay ilm men izaafa hoga.
12allaah jo raast hai bedeen kay ghar ko dhyaan men rakhta hai, vahee bedeen ko khaak men mila deta hai.
13jo kaan men unglee daal kar ghareeb kee madad kay liyay cheekhen naheen sunta vah bhee ek din cheekhen maarega, aur us kee bhee naheen sunee jaaegee.
14posheedgee men sila denay say doosray ka ghussa thanda ho jaata, kisee kee jeb garm karnay say us ka sakht taish door ho jaata hai.
15jab insaaf kiya jaaay to raastbaaz khush ho jaata, lekin badkaar dahshat khaanay lagta hai.
16jo samajh kee raah say bhatak jaaay vah ek din murdon kee jamaaat men aaraam karega.
17jo aish-o-ishrat kee zindagee pasand karay vah ghareeb ho jaaega, jisay mai aur tel piyaara ho vah ameer naheen ho jaaega.
18jab raastbaaz ka fidya dena hai to bedeen ko diya jaaega, aur diyaanatdaar kee jagah bevafa ko diya jaaega.
19jhagdaaloo aur tang karnay vaalee beevee kay saath basnay kee nisbat registaan men guzaara karna behatar hai.
20daanishmand kay ghar men umda khazaana aur tel hota hai, lekin ahemaq apna saara maal hadap kar leta hai.
21jo insaaf aur shafqat ka taaqqub karta rahay vah zindagee, raastee aur izzat paaega.
22daanishmand aadmee taaqatvar faujiyon kay shaher par hamla karkay vah qil’aabandee dha deta hai jis par un ka poora etimaad tha.
23jo apnay munh aur zabaan kee paheraadaaree karay vah apnee jaan ko museebat say bachaaay rakhta hai.
24maghroor aur ghamandee ka naam ‘taanaazan’ hai, har kaam vah behad takabbur kay saath karta hai.
25kaahil ka laalach usay maut kay ghaat utaar deta hai, kyoonki us kay haath kaam karnay say inkaar kartay hain.
26laalchee poora din laalach karta raheta hai, lekin raastbaaz fayyaazdilee say deta hai.
27bedeenon kee qurbaanee qaabil-ay-ghin hai, khaaskar jab usay buray maqsad say pesh kiya jaaay.
28jhoota gavaah tabaah ho jaaega, lekin jo doosray kee dhyaan say sunay us kee baat hamesha tak qaaim rahegee.
29bedeen aadmee gustaakh andaaz say pesh aata hai, lekin seedhee raah par chalnay vaala soch samajh kar apnee raah par chalta hai.
30kisee kee bhee hikmat, samajh ya mansooba rabb ka saamna naheen kar sakta.
31ghoday ko jang kay din kay liyay tayyaar to kiya jaata hai, lekin fatah rabb kay haath men hai.