Amsaal 20
1mai taanaazan ka baap aur sharaab shor-sharaaba kee maan hai. jo yah pee pee kar dagmagaanay lagay vah daanishmand naheen.
2baadshaah ka qaher javaan sherbabar kee dahaadon kee maanind hai, jo usay taish dilaaay vah apnee jaan par khelta hai.
3ladaaee-jhagday say baaz rahena izzat ka turra-ay-imtiyaaz hai jabki har ahemaq jhagadnay kay liyay tayyaar raheta hai.
4kaahil vaqt par hal naheen chalaata, chunaanchay jab vah fasal paktay vaqt apnay khet par nigaah karay to kuchh nazar naheen aaega.
5insaan kay dil ka mansooba gaheray paanee kee maanind hai, lekin samajhdaar aadmee usay nikaal kar amal men laata hai.
6bahut say log apnee vafaadaaree par fakhar kartay hain, lekin qaabil-ay-etimaad shakhs kahaan paaya jaata hai?
7jo raastbaaz beilzaam zindagee guzaaray us kee aulaad mubaarak hai.
8jab baadshaah takht-ay-adaalat par baith jaaay to vah apnee aankhon say sab kuchh chhaankar har ghalat baat ek taraf kar leta hai.
9kaun kah sakta hai, “main nay apnay dil ko paak-saaf kar rakha hai, main apnay gunaah say paak ho gaya hoon”?
10ghalat baat aur ghalat paimaaish, rabb donon say ghin khaata hai.
11ladkay ka kirdaar us kay sulook say maaloom hota hai. is say pata chalta hai ki us ka chaal-chalan paak aur raast hai ya naheen.
12sunnay vaalay kaan aur dekhnay vaalee aankhen donon hee rabb nay banaaee hain.
13neend ko piyaar na kar varna ghareeb ho jaaega. apnee aankhon ko khula rakh to jee bhar kar khaana khaaega.
14gaahak dukaandaar say kaheta hai, “yah kaisee naaqis cheez hai!” lekin phir ja kar doosron kay saamnay apnay sauday par shekhee maarta hai.
15sona aur kasrat kay motee paaay ja saktay hain, lekin samajhdaar hont un say kaheen ziyaada qeemtee hain.
16zamaanat ka vah libaas vaapas na kar jo kisee nay pardesee ka zaamin ban kar diya hai. agar vah ajnabee ka zaamin ho to us zamaanat par zaroor qabza kar jo us nay dee thee.
17dhokay say haasil kee huee rotee aadmee ko meethee lagtee hai, lekin us ka anjaam kankaron say bhara munh hai.
18mansoobay salaah-mashvray say mazboot ho jaatay hain, aur jang karnay say pahelay doosron kee hidaayaat par dhyaan day.
19agar too buhtaan lagaanay vaalay ko hamraaz banaaay to vah idhar udhar phir kar baat phailaaega. chunaanchay baatoonee say gurez kar.
20jo apnay baap ya maan par laanat karay us ka charaagh ghanay andheray men bujh jaaega.
21jo meeraas shuroo men badee jaldee say mil jaaay vah aakhir men barkat ka baais naheen hogee.
22mat kahena, “main ghalat kaam ka intiqaam loonga.” rabb kay intizaar men rah to vahee teree madad karega.
23rabb jhootay baaton say ghin khaata hai, aur ghalat taraazoo usay achchha naheen lagta.
24rabb har ek kay qadam muqarrar karta hai. to phir insaan kis tarah apnee raah samajh sakta hai?
25insaan apnay liyay phanda tayyaar karta hai jab vah jaldbaazee say mannat maanta aur baad men hee mannat kay nataaij par ghaur karnay lagta hai.
26daanishmand baadshaah bedeenon ko chhaan chhaankar uda leta hai, haan vah gaahanay ka aala hee un par say guzarnay deta hai.
27aadamzaad kee rooh rabb ka charaagh hai jo insaan kay baatin kee tah tak sab kuchh kee tahqeeq karta hai.
28shafqat aur vafa baadshaah ko mahfooz rakhtee hain, shafqat say vah apna takht mustahkam kar leta hai.
29naujvaanon ka fakhar un kee taaqat aur buzurgon kee shaan un kay safed baal hain.
30zakhm aur choten buraaee ko door kar detee hain, zarben baatin kee tah tak sab kuchh saaf kar detee hain.