Amsaal 2

hikmat kee ahemiyat

¹meray betay, meree baat qabool karkay meray ahkaam apnay dil men mahfooz rakh. ²apna kaan hikmat par dhar, apna dil samajh kee taraf maail kar. ³baseerat kay liyay aavaaz day, chilla kar samajh maang. ⁴usay yoon talaash kar goya chaandee ho, us ka yoon khoj laga goya posheeda khazaana ho. ⁵agar too aisa karay to tujhay rabb kay khauf kee samajh aaegee aur allaah ka irfaan haasil hoga. ⁶kyoonki rabb hee hikmat ata karta, usee kay munh say irfaan aur samajh nikaltee hai. ⁷vah seedhee raah par chalnay vaalon ko kaamyaabee faraaham karta aur beilzaam zindagee guzaarnay vaalon kee dhaal bana raheta hai. ⁸kyoonki vah insaaf pasandon kee raahon kee paheraadaaree karta hai. jahaan bhee us kay eemaandaar chaltay hain vahaan vah un kee hifaazat karta hai.

⁹tab tujhay raastee, insaaf, diyaanatdaaree aur har achchhee raah kee samajh aaegee. ¹⁰kyoonki teray dil men hikmat daakhil ho jaaegee, aur ilm-o-irfaan teree jaan ko piyaara ho jaaega. ¹¹tameez teree hifaazat aur samajh teree chaukeedaaree karegee. ¹²hikmat tujhay ghalat raah aur kajrau baaten karnay vaalay say bachaaay rakhegee. ¹³aisay log seedhee raah ko chhod detay hain taaki taareek raaston par chalen, ¹⁴vah buree harkaten karnay say khush ho jaatay hain, ghalat kaam kee kajarvee dekh kar jashn manaatay hain. ¹⁵un kee raahen tedhee hain, aur vah jahaan bhee chalen aavaara phirtay hain.

¹⁶hikmat tujhay naajaaiz aurat say chhudaatee hai, us ajnabee aurat say jo chiknee-chupdee baaten kartee, ¹⁷jo apnay jeevansaathee ko tark karkay apnay khuda ka ahd bhool jaatee hai. ¹⁸kyoonki us kay ghar men daakhil honay ka anjaam maut, us kee raahon kee manzil-ay-maqsood paataal hai. ¹⁹jo bhee us kay paas jaaay vah vaapas naheen aaega, vah zindageebakhsh raahon par dubaara naheen pahunchega.

²⁰chunaanchay achchhay logon kee raah par chal phir, dhyaan day ki teray qadam raastbaazon kay raastay par rahen. ²¹kyoonki seedhee raah par chalnay vaalay mulk men aabaad hongay, aakhirkaar beilzaam hee us men baaqee rahengay. ²²lekin bedeen mulk say mit jaaengay, aur bevafaaon ko ukhaad kar mulk say khaarij kar diya jaaega.