Amsaal 19
1jo ghareeb beilzaam zindagee guzaaray vah tedhee baaten karnay vaalay ahemaq say kaheen behatar hai.
2agar ilm saath na ho to sargarmee ka koee faaida naheen. jaldbaaz ghalat raah par aata raheta hai.
3go insaan kee apnee hamaaqat usay bhatka detee hai to bhee us ka dil rabb say naaraaz hota hai.
4daulatmand kay doston men izaafa hota hai, lekin ghareeb ka ek dost bhee us say alag ho jaata hai.
5jhoota gavaah saza say naheen bachega, jo jhootee gavaahee day us kee jaan naheen chhootegee.
6mut’addid log baday aadmee kee khushaamad kartay hain, aur har ek us aadmee ka dost hai jo tuhfay deta hai.
7ghareeb kay tamaam bhaaee us say nafrat kartay hain, to phir us kay dost us say kyoon door na rahen. vah baaten kartay kartay un ka peechha karta hai, lekin vah ghaaib ho jaatay hain.
8jo hikmat apna lay vah apnee jaan say muhabbat rakhta hai, jo samajh kee parvarish karay usay kaamyaabee hogee.
9jhoota gavaah saza say naheen bachega, jhootee gavaahee denay vaala tabaah ho jaaega.
10ahemaq kay liyay aish-o-ishrat say zindagee guzaarna mauzoon naheen, lekin ghulaam kee hukmaraanon par hukoomat kaheen ziyaada ghairmunaasib hai.
11insaan kee hikmat usay tahemmul sikhaatee hai, aur doosron kay jaraaim say darguzar karna us ka fakhar hai.
12baadshaah ka taish javaan sherbabar kee dahaadon kee maanind hai jabki us kee manzooree ghaas par shabnam kee tarah tar-o-taaza kartee hai.
13ahemaq beta baap kee tabaahee aur jhagdaaloo beevee musalsal tapaknay vaalee chhat hai.
14mauroosee ghar aur milkiyat baapdaada kee taraf say miltee hai, lekin samajhdaar beevee rabb kee taraf say hai.
15sust honay say insaan gaheree neend so jaata hai, lekin dheela shakhs bhookon marega.
16jo vafaadaaree say hukm par amal karay vah apnee jaan mahfooz rakhta hai, lekin jo apnee raahon kee parva na karay vah mar jaaega.
17jo ghareeb par meharbaanee karay vah rabb ko udhaar deta hai, vahee usay ajr dega.
18jab tak ummeed kee kiran baaqee ho apnay betay kee taadeeb kar, lekin itnay josh men na a ki vah mar jaaay.
19jo hadd say ziyaada taish men aaay usay jurmaana dena padega. usay bachaanay kee koshish mat kar varna us ka taish aur badhega.
20achchha mashvra apna aur tarbiyat qabool kar taaki aainda daanishmand ho.
21insaan dil men mut’addid mansoobay baandhta raheta hai, lekin rabb ka iraada hamesha poora ho jaata hai.
22insaan ka laalach us kee rusvaaee ka baais hai, aur ghareeb daroghgo say behatar hai.
23rabb ka khauf zindagee ka mamba hai. khudaataras aadmee ser ho kar sukoon say so jaata aur museebat say mahfooz raheta hai.
24kaahil apna haath khaanay kay bartan men daal kar usay munh tak naheen la sakta.
25taanaazan ko maar to saadaalauh sabaq seekhega, samajhdaar ko daant to us kay ilm men izaafa hoga.
26jo apnay baap par zulm karay aur apnee maan ko nikaal day vah vaalidain kay liyay sharm aur rusvaaee ka baais hai.
27meray betay, tarbiyat par dhyaan denay say baaz na a, varna too ilm-o-irfaan kee raah say bhatak jaaega.
28shareer gavaah insaaf ka mazaaq udaata hai, aur bedeen ka munh aafat kee khabren phailaata hai.
29taanaazan kay liyay saza aur ahemaq kee peeth kay liyay koda tayyaar hai.