Amsaal 17
1jis ghar men rotee ka baasee tukda sukoon kay saath khaaya jaaay vah us ghar say kaheen behatar hai jis men ladaaee-jhagda hai, khwaah us men kitnee shaandaar ziyaafat kyoon na ho rahee ho.
2samajhdaar mulaazim maalik kay us betay par qaaboo paaega jo sharm ka baais hai, aur jab bhaaiyon men mauroosee milkiyat taqseem kee jaaay to usay bhee hissa milega.
3sona-chaandee kuthaalee men pighla kar paak-saaf kee jaatee hai, lekin rabb hee dil kee jaanch-padtaal karta hai.
4badkaar shareer honton par dhyaan aur dhokebaaz tabaahakun zabaan par tavajjuh deta hai.
5jo ghareeb ka mazaaq udaaay vah us kay khaaliq kee tahqeer karta hai, jo doosray kee museebat dekh kar khush ho jaaay vah saza say naheen bachega.
6potay boodhon ka taaj aur vaalidain apnay bachchon kay zevar hain.
7ahemaq kay liyay badee badee baaten karna mauzoon naheen, lekin shareef honton par fareb kaheen ziyaada ghairmunaasib hai.
8rishvat denay vaalay kee nazar men rishvat jaadoo kee maanind hai. jis darvaazay par bhee khatkhataaay vah khul jaata hai.
9jo doosray kee ghaltee ko darguzar karay vah muhabbat ko farogh deta hai, lekin jo maazee kee ghaltiyaan duharaata rahay vah qareebee doston men nifaaq paida karta hai.
10agar samajhdaar ko daanta jaaay to vah khoob seekh leta hai, lekin agar ahemaq ko sau baar maara jaaay to bhee vah itna naheen seekhta.
11shareer sarkashee par tula raheta hai, lekin us kay khilaaf zaalim qaasid bheja jaaega.
12jo ahemaq apnee hamaaqat men uljha hua ho us say daregh kar, kyoonki us say milnay say behatar yah hai ki tera us reechhnee say vaasta paday jis kay bachchay us say chheen liyay gaay hon.
13jo bhalaaee kay ivz buraaee karay us kay ghar say buraaee kabhee door naheen hogee.
14ladaaee-jhagda chhedna band men rakhna daalnay kay baraabar hai. is say pahelay ki muqaddamaabaazee shuroo ho us say baaz a.
15jo bedeen ko bequsoor aur raastbaaz ko mujrim thaheraaay us say rabb ghin khaata hai.
16ahemaq kay haath men paison ka kya faaida hai? kya vah hikmat khareed sakta hai jabki us men aqal naheen? hargiz naheen!
17padosee vah hai jo har vaqt muhabbat rakhta hai, bhaaee vah hai jo museebat men sahaara denay kay liyay paida hua hai.
18jo haath mila kar apnay padosee ka zaamin honay ka vaada karay vah naasamajh hai.
19jo ladaaee-jhagday say muhabbat rakhay vah gunaah say muhabbat rakhta hai, jo apna darvaaza hadd say ziyaada bada banaaay vah tabaahee ko daakhil honay kee daavat deta hai.
20jis ka dil tedha hai vah khushhaalee naheen paaega, aur jis kee zabaan chaalaak hai vah museebat men ulajh jaaega.
21jis kay haan ahemaq beta paida ho jaaay usay dukh pahunchta hai, aur aqal say khaalee beta baap kay liyay khushee ka baais naheen hota.
22khushbaash dil pooray jism ko shifa deta hai, lekin shikasta rooh haddiyon ko khushk kar detee hai.
23bedeen chupkay say rishvat lay kar insaaf kee raahon ko bigaad deta hai.
24samajhdaar apnee nazar kay saamnay hikmat rakhta hai, lekin ahemaq kee nazren duniya kee intiha tak aavaara phirtee hain.
25ahemaq beta baap kay liyay ranj ka baais aur maan kay liyay talkhee ka sabab hai.
26bequsoor par jurmaana lagaana ghalat hai, aur shareef ko us kee diyaanatdaaree kay sabab say koday lagaana bura hai.
27jo apnee zabaan ko qaaboo men rakhay vah ilm-o-irfaan ka maalik hai, jo thanday dil say baat karay vah samajhdaar hai.
28agar ahemaq khaamosh rahay to vah bhee daanishmand lagta hai. jab tak vah baat na karay log usay samajhdaar qaraar detay hain.