Amsaal 16
1insaan dil men mansoobay baandhta hai, lekin zabaan ka javaab rabb kee taraf say aata hai.
2insaan kee nazar men us kee tamaam raahen paak-saaf hain, lekin rabb hee roohon kee jaanch-padtaal karta hai.
3jo kuchh bhee too karna chaahay usay rabb kay sapurd kar. tab hee teray mansoobay kaamyaab hongay.
4rabb nay sab kuchh apnay hee maqaasid pooray karnay kay liyay banaaya hai. vah din bhee pahelay say muqarrar hai jab bedeen par aafat aaegee.
5rabb har maghroor dil say ghin khaata hai. yaqeenan vah saza say naheen bachega.
6shafqat aur vafaadaaree gunaah ka kaffaara detee hain. rabb ka khauf maannay say insaan buraaee say door raheta hai.
7agar rabb kisee insaan kee raahon say khush ho to vah us kay dushmanon ko bhee us say sulah karaanay deta hai.
8insaaf say thoda bahut kamaana naainsaafee say bahut daulat jama karnay say kaheen behatar hai.
9insaan apnay dil men mansoobay baandhta raheta hai, lekin rabb hee muqarrar karta hai ki vah aakhirkaar kis raah par chal paday.
10baadshaah kay hont goya ilaahee faislay pesh kartay hain, us ka munh adaalat kartay vaqt bevafa naheen hota.
11rabb durust taraazoo ka maalik hai, usee nay tamaam baaton ka intizaam qaaim kiya.
12baadshaah bedeenee say ghin khaata hai, kyoonki us ka takht raastbaazee kee bunyaad par mazboot raheta hai.
13baadshaah raastbaaz honton say khush hota aur saaf baat karnay vaalay say muhabbat rakhta hai.
14baadshaah ka ghussa maut ka peshkhaima hai, lekin daanishmand usay thanda karnay kay tareeqay jaanta hai.
15jab baadshaah ka chihara khil uthay to matlab zindagee hai. us kee manzooree mausam-ay-bahaar kay tar-o-taaza karnay vaalay baadal kee maanind hai.
16hikmat ka husool sonay say kaheen behatar aur samajh paana chaandee say kaheen badh kar hai.
17diyaanatdaar kee mazboot raah buray kaam say door rahetee hai, jo apnee raah kee paheraadaaree karay vah apnee jaan bachaaay rakhta hai.
18tabaahee say pahelay gharoor aur girnay say pahelay takabbur aata hai.
19farotnee say zarooratmandon kay darmiyaan basna ghamandiyon kay lootay huay maal men shareek honay say kaheen behatar hai.
20jo kalaam par dhyaan day vah khushhaal hoga, mubaarak hai vah jo rabb par bharosa rakhay.
21jo dil say daanishmand hai usay samajhdaar qaraar diya jaata hai, aur meethay alfaaz taaleem men izaafa kartay hain.
22fahem apnay maalik kay liyay zindagee ka sarchashma hai, lekin ahemaq kee apnee hee hamaaqat usay saza detee hai.
23daanishmand ka dil samajh kee baaten zabaan par laata aur taaleem denay men honton ka sahaara banta hai.
24meharbaan alfaaz khaalis shahed hain, vah jaan kay liyay sheereen aur pooray jism ko tar-o-taaza kar detay hain.
25aisee raah bhee hotee hai jo dekhnay men to theek lagtee hai go us ka anjaam maut hai.
26mazdoor ka khaalee pet usay kaam karnay par majboor karta, us kee bhook usay haanktee rahetee hai.
27shareer kured kured kar ghalat kaam nikaal leta, us kay honton par jhulsaanay vaalee aag rahetee hai.
28kajrau aadmee jhagday chhedta raheta, aur tuhamat lagaanay vaala dilee doston men bhee rakhna daalta hai.
29zaalim apnay padosee ko varghala kar ghalat raah par lay jaata hai.
30jo aankh maaray vah ghalat mansoobay baandh raha hai, jo apnay hont chabaaay vah ghalat kaam karnay par tula hua hai.
31safed baal ek shaandaar taaj hain jo raastbaaz zindagee guzaarnay say haasil hotay hain.
32tahemmul karnay vaala soormay say sabqat leta hai, jo apnay aap ko qaaboo men rakhay vah shaher ko shikast denay vaalay say bartar hai.
33insaan to qur’a daalta hai, lekin us ka har faisla rabb kee taraf say hai.