Amsaal 15
1narm javaab ghussa thanda karta, lekin turash baat taish dilaatee hai.
2daanishmandon kee zabaan ilm-o-irfaan phailaatee hai jabki ahemaq ka munh hamaaqat ka zor say ubalnay vaala chashma hai.
3rabb kee aankhen har jagah maujood hain, vah buray aur bhalay sab par dhyaan detee hain.
4narm zabaan zindagee ka darakht hai jabki farebdih zabaan shikastaadil kar detee hai.
5ahemaq apnay baap kee tarbiyat ko haqeer jaanta hai, lekin jo naseehat maanay vah daanishmand hai.
6raastbaaz kay ghar men bada khazaana hota hai, lekin jo kuchh bedeen haasil karta hai vah tabaahee ka baais hai.
7daanishmandon kay hont ilm-o-irfaan ka beej bikher detay hain, lekin ahemaqon ka dil aisa naheen karta.
8rabb bedeenon kee qurbaanee say ghin khaata, lekin seedhee raah par chalnay vaalon kee dua say khush hota hai.
9rabb bedeen kee raah say ghin khaata, lekin raastee ka peechha karnay vaalay say piyaar karta hai.
10jo saheeh raah ko tark karay us kee sakht taadeeb kee jaaegee, jo naseehat say nafrat karay vah mar jaaega.
11paataal aur aalam-ay-arvaah rabb ko saaf nazar aatay hain. to phir insaanon kay dil usay kyoon na saaf dikhaaee den?
12taanaazan ko doosron kee naseehat pasand naheen aatee, is liyay vah daanishmandon kay paas naheen jaata.
13jis ka dil khush hai us ka chihara khula raheta hai, lekin jis ka dil pareshaan hai us kee rooh shikasta rahetee hai.
14samajhdaar ka dil ilm-o-irfaan kee talaash men raheta, lekin ahemaq hamaaqat kee charaagaah men charta raheta hai.
15museebatzada kay tamaam din buray hain, lekin jis ka dil khush hai vah rozaana jashn manaata hai.
16jo ghareeb rabb ka khauf maanta hai us ka haal us karodapatee say kaheen behatar hai jo badee bechainee say zindagee guzaarta hai.
17jahaan muhabbat hai vahaan sabzee ka saalan bahut hai, jahaan nafrat hai vahaan motay-taazay bachhday kee ziyaafat bhee befaaida hai.
18ghuseela aadmee jhagday chhedta raheta jabki tahemmul karnay vaala logon kay ghussay ko thanda kar deta hai.
19kaahil ka raasta kaantedaar baad kee maanind hai, lekin diyaanatdaaron kee raah pakkee sadak hee hai.
20daanishmand beta apnay baap kay liyay khushee ka baais hai, lekin ahemaq apnee maan ko haqeer jaanta hai.
21naasamajh aadmee hamaaqat say lutf’andoz hota, lekin samajhdaar aadmee seedhee raah par chalta hai.
22jahaan salaah-mashvra naheen hota vahaan mansoobay naakaam rah jaatay hain, jahaan bahut say musheer hotay hain vahaan kaamyaabee hotee hai.
23insaan mauzoon javaab denay say khush ho jaata hai, vaqt par munaasib baat kitnee achchhee hotee hai.
24zindagee kee raah chadhtee rahetee hai taaki samajhdaar us par chaltay huay paataal men utarnay say bach jaaay.
25rabb mutakabbir ka ghar dha deta, lekin beva kee zameen kee hudood mahfooz rakhta hai.
26rabb buray mansoobon say ghin khaata hai, aur meharbaan alfaaz us kay nazdeek paak hain.
27jo naajaaiz nafa kamaaay vah apnay ghar par aafat laata hai, lekin jo rishvat say nafrat rakhay vah jeeta rahega.
28raastbaaz ka dil soch samajh kar javaab deta hai, lekin bedeen ka munh zor say ubalnay vaalay chashma hai jis say buree baaten nikaltee rahetee hain.
29rabb bedeenon say door raheta, lekin raastbaaz kee dua sunta hai.
30chamaktee aankhen dil ko khushee dilaatee hain, achchhee khabar pooray jism ko tar-o-taaza kar detee hai.
31jo zindageebakhsh naseehat par dhyaan day vah daanishmandon kay darmiyaan hee sukoonat karega.
32jo tarbiyat kee parva na karay vah apnay aap ko haqeer jaanta hai, lekin jo naseehat par dhyaan day us kee samajh men izaafa hota hai.
33rabb ka khauf hee vah tarbiyat hai jis say insaan hikmat seekhta hai. pahelay farotnee apna lay, kyoonki yahee izzat paanay ka pahela qadam hai.