Amsaal 14

¹hikmat beebee apna ghar taameer kartee hai, lekin hamaaqat beebee apnay hee haathon say usay dha detee hai.

²jo seedhee raah par chalta hai vah allaah ka khauf maanta hai, lekin jo ghalat raah par chalta hai vah usay haqeer jaanta hai.

³ahemaq kee baaton say vah danda nikalta hai jo usay us kay takabbur kee saza deta hai, lekin daanishmand kay hont usay mahfooz rakhtay hain.

⁴jahaan bail naheen vahaan charnee khaalee rahetee hai, bail kee taaqat hee say kasrat kee faslen paida hotee hain.

⁵vafaadaar gavaah jhoot naheen bolta, lekin jhootay gavaah kay munh say jhoot nikalta hai.

⁶taanaazan hikmat ko dhoondta hai, lekin befaaida. samajhdaar kay ilm men aasaanee say izaafa hota hai.

⁷ahemaq say door rah, kyoonki too us kee baaton men ilm naheen paaega.

⁸zaheen kee hikmat is men hai ki vah soch samajh kar apnee raah par chalay, lekin ahemaq kee hamaaqat saraasar dhoka hee hai.

⁹ahemaq apnay qusoor ka mazaaq udaatay hain, lekin seedhee raah par chalnay vaalay rabb ko manzoor hain.

¹⁰har dil kee apnee hee talkhee hotee hai jis say sirf vahee vaaqif hai, aur us kee khushee men bhee koee aur shareek naheen ho sakta.

¹¹bedeen ka ghar tabaah ho jaaega, lekin seedhee raah par chalnay vaalay ka khaima phalay phoolega.

¹²aisee raah bhee hotee hai jo dekhnay men theek to lagtee hai go us ka anjaam maut hai.

¹³dil hanstay vaqt bhee ranjeeda ho sakta hai, aur khushee kay ikhtitaam par dukh hee baaqee rah jaata hai.

¹⁴jis ka dil bevafa hai vah jee bhar kar apnay chaal-chalan ka kadva phal khaaega jabki nek aadmee apnay aamaal kay meethay phal say ser ho jaaega.

¹⁵saadaalauh har ek kee baat maan leta hai jabki zaheen aadmee apna har qadam soch samajh kar uthaata hai.

¹⁶daanishmand dartay dartay ghalat kaam say daregh karta hai, lekin ahemaq khudetimaad hai aur ek dam mushtail ho jaata hai.

¹⁷ghuseela aadmee ahemaqaana harkaten karta hai, aur log saazishee shakhs say nafrat kartay hain.

¹⁸saadaalauh meeraas men hamaaqat paata hai jabki zaheen aadmee ka sar ilm kay taaj say aaraasta raheta hai.

¹⁹shareeron ko nekon kay saamnay jhukna padega, aur bedeenon ko raastbaaz kay darvaazay par aundhay munh hona padega.

²⁰ghareeb kay hamsaay bhee us say nafrat kartay hain jabki ameer kay beshumaar dost hotay hain.

²¹jo apnay padosee ko haqeer jaanay vah gunaah karta hai. mubaarak hai vah jo zarooratmand par taras khaata hai.

²²buray mansoobay baandhnay vaalay sab aavaara phirtay hain. lekin achchhay mansoobay baandhnay vaalay shafqat aur vafa paaengay.

²³mehanat-mashaqqat karnay men hamesha faaida hota hai, jabki khaalee baaten karnay say log ghareeb ho jaatay hain.

²⁴daanishmandon ka ajr daulat ka taaj hai jabki ahemaqon ka ajr hamaaqat hee hai.

²⁵sachcha gavaah jaanen bachaata hai jabki jhoota gavaah farebdih hai.

²⁶jo rabb ka khauf maanay us kay paas mahfooz qil’a hai jis men us kee aulaad bhee panaah lay saktee hai.

²⁷rabb ka khauf zindagee ka sarchashma hai jo insaan ko muhalak phandon say bachaaay rakhta hai.

²⁸jitnee aabaadee mulk men hai utnee hee baadshaah kee shaan-o-shaukat hai. r’aaya kee kamee hukmaraan kay tanazzul ka baais hai.

²⁹tahemmul karnay vaala badee samajhdaaree ka maalik hai, lekin ghuseela aadmee apnee hamaaqat ka izhaar karta hai.

³⁰pursukoon dil jism ko zindagee dilaata jabki hasad haddiyon ko galnay deta hai.

³¹jo pastahaal par zulm karay vah us kay khaaliq kee tahqeer karta hai jabki jo zarooratmand par taras khaaay vah allaah ka ehatiraam karta hai.

³²bedeen kee buraaee usay khaak men mila detee hai, lekin raastbaaz martay vaqt bhee allaah men panaah leta hai.

³³hikmat samajhdaar kay dil men aaraam kartee hai, aur vah ahemaqon kay darmiyaan bhee zaahir ho jaatee hai.

³⁴raastee say har qaum sarfaraaz hotee hai jabki gunaah say ummaten rusva ho jaatee hain.

³⁵baadshaah daanishmand mulaazim say khush hota hai, lekin sharmanaak kaam karnay vaala mulaazim us kay ghussay ka nishaana ban jaata hai.