Amsaal 13
1daanishmand beta apnay baap kee tarbiyat qabool karta hai, lekin taanaazan parva hee naheen karta agar koee usay daantay.
2insaan apnay munh kay achchhay phal say khoob ser ho jaata hai, lekin bevafa kay dil men zulm ka laalach raheta hai.
3jo apnee zabaan qaaboo men rakhay vah apnee zindagee mahfooz rakhta hai, jo apnee zabaan ko belagaam chhod day vah tabaah ho jaaega.
4kaahil aadmee laalach karta hai, lekin usay kuchh naheen milta jabki mehanatee shakhs kee aarzoo pooree ho jaatee hai.
5raastbaaz jhoot say nafrat karta hai, lekin bedeen sharm aur rusvaaee ka baais hai.
6raastee beilzaam kee hifaazat kartee jabki bedeenee gunaahgaar ko tabaah kar detee hai.
7kuchh log ameer ka roop bhar kar phirtay hain go ghareeb hain. doosray ghareeb ka roop bhar kar phirtay hain go ameertareen hain.
8kabhee ameer ko apnee jaan chhudaanay kay liyay aisa taavaan dena padta hai ki tamaam daulat jaatee rahetee hai, lekin ghareeb kee jaan is qism kee dhamkee say bachee rahetee hai.
9raastbaaz kee raushnee chamaktee rahetee [a] lafzee tarjuma : khushee manaatee. jabki bedeen ka charaagh bujh jaata hai.
10maghrooron men hamesha jhagda hota hai jabki daanishmand salaah-mashvray kay mutaabiq hee chaltay hain.
11jaldbaazee say haasilashuda daulat jald hee khatm ho jaatee hai jabki jo rafta rafta apna maal jama karay vah usay badhaata rahega.
12jo ummeed vaqt par pooree na ho jaaay vah dil ko beemaar kar detee hai, lekin jo aarzoo pooree ho jaaay vah zindagee ka darakht hai.
13jo achchhee hidaayat ko haqeer jaanay usay nuqsaan pahunchega, lekin jo hukm maanay usay ajr milega.
14daanishmand kee hidaayat zindagee ka sarchashma hai jo insaan ko muhalak phandon say bachaaay rakhtee hai.
15achchhee samajh manzooree ata kartee hai, lekin bevafa kee raah abdee tabaahee ka baais hai.
16zaheen har kaam soch samajh kar karta, lekin ahemaq tamaam nazron kay saamnay hee apnee hamaaqat kee numaaish karta hai.
17bedeen qaasid museebat men phans jaata jabki vafaadaar qaasid shifa ka baais hai.
18jo tarbiyat kee parva na karay usay ghurbat aur sharmindagee haasil hogee, lekin jo doosray kee naseehat maan jaaay us ka ehatiraam kiya jaaega.
19jo aarzoo pooree ho jaaay vah dil ko tar-o-taaza kartee hai, lekin ahemaq buraaee say daregh karnay say ghin khaata hai.
20jo daanishmandon kay saath chalay vah khud daanishmand ho jaaega, lekin jo ahemaqon kay saath chalay usay nuqsaan pahunchega.
21museebat gunaahgaar ka peechha kartee hai jabki raastbaazon ka ajr khushhaalee hai.
22nek aadmee kay betay aur potay us kee meeraas paaengay, lekin gunaahgaar kee daulat raastbaaz kay liyay mahfooz rakhee jaaegee.
23ghareeb ka khet kasrat kee faslen muhayya kar sakta hai, lekin jahaan insaaf naheen vahaan sab kuchh chheen liya jaata hai.
24jo apnay betay ko tambeeh naheen karta vah us say nafrat karta hai. jo us say muhabbat rakhay vah vaqt par us kee tarbiyat karta hai.
25raastbaaz jee bhar kar khaana khaata hai, lekin bedeen ka pet khaalee raheta hai.