Amsaal 12
1jisay ilm-o-irfaan piyaara hai usay tarbiyat bhee piyaaree hai, jisay naseehat say nafrat hai vah beaqal hai.
2rabb achchhay aadmee say khush hota hai jabki vah saazish karnay vaalay ko qusoorvaar thaheraata hai.
3insaan bedeenee kee bunyaad par qaaim naheen rah sakta jabki raastbaaz kee jaden ukhaadee naheen ja sakteen.
4sughad beevee apnay shauhar ka taaj hai, lekin jo shauhar kee rusvaaee ka baais hai vah us kee haddiyon men sadaahat kee maanind hai.
5raastbaaz kay khayaalaat munsifaana hain jabki bedeenon kay mansoobay farebdih hain.
6bedeenon kay alfaaz logon ko qatl karnay kee taak men rahetay hain jabki seedhee raah par chalnay vaalon kee baaten logon ko chhuda letee hain.
7bedeenon ko khaak men yoon milaaya jaata hai ki un ka naam-o-nishaan tak naheen raheta, lekin raastbaaz ka ghar qaaim raheta hai.
8kisee kee jitnee aqal-o-samajh hai utna hee log us kee taareef kartay hain, lekin jis kay zahen men futoor hai usay haqeer jaana jaata hai.
9nichlay tabqay ka jo aadmee apnee zimmaadaariyaan ada karta hai vah us aadmee say kaheen behatar hai jo nakhra baghaarta hai go us kay paas rotee bhee naheen hai.
10raastbaaz apnay maveshee ka bhee khayaal karta hai jabki bedeen ka dil zaalim hee zaalim hai.
11jo apnee zameen kee kheteebaadee karay us kay paas kasrat ka khaana hoga, lekin jo fuzool cheezon kay peechhay pad jaaay vah naasamajh hai.
12bedeen doosron ko jaal men phansaanay say apna dil bahelaata hai, lekin raastbaaz kee jad phaldaar hotee hai.
13shareer apnee ghalat baaton kay jaal men ulajh jaata jabki raastbaaz museebat say bach jaata hai.
14insaan apnay munh kay phal say khoob ser ho jaata hai, aur jo kaam us kay haathon nay kiya us ka ajr usay zaroor milega.
15ahemaq kee nazar men us kee apnee raah theek hai, lekin daanishmand doosron kay mashvray par dhyaan deta hai.
16ahemaq ek dam apnee naaraazee ka izhaar karta hai, lekin daana apnee badnaamee chhupaaay rakhta hai.
17diyaanatdaar gavaah khulay taur par sachchaaee bayaan karta hai jabki jhoota gavaah dhoka hee dhoka pesh karta hai.
18gappen haanknay vaalay kee baaten talvaar kee tarah zakhmee kar detee hain jabki daanishmand kee zabaan shifa detee hai.
19sachchay hont hamesha tak qaaim rahetay hain jabki jhootee zabaan ek hee lamhay kay baad khatm ho jaatee hai.
20buray mansoobay baandhnay vaalay ka dil dhokay say bhara raheta jabki salaamatee kay mashvray denay vaalay ka dil khushee say chhalakta hai.
21koee bhee aafat raastbaaz par naheen aaegee jabki dukh takleef bedeenon ka daaman kabhee naheen chhodegee.
22rabb farebdih honton say ghin khaata hai, lekin jo vafaadaaree say zindagee guzaartay hain un say vah khush hota hai.
23samajhdaar apna ilm chhupaaay rakhta jabki ahemaq apnay dil kee hamaaqat buland aavaaz say sab ko pesh karta hai.
24jis kay haath mehanatee hain vah hukoomat karega, lekin jis kay haath dheelay hain usay begaar men kaam karna padega.
25jis kay dil men pareshaanee hai vah daba raheta hai, lekin koee bhee achchhee baat usay khushee dilaatee hai.
26raastbaaz apnee charaagaah maaloom kar leta hai, lekin bedeenon kee raah unhen aavaara phirnay detee hai.
27dheela aadmee apna shikaar naheen pakad sakta jabki mehanatee shakhs kasrat ka maal haasil kar leta hai.
28raastee kee raah men zindagee hai, lekin ghalat raah maut tak pahunchaatee hai.