Amsaal 10
sulemaan kee hikmat bharee hidaayaat
1zail men sulemaan kee amsaal qalamband hain.
zindageebakhsh baaten
daanishmand beta apnay baap ko khushee dilaata jabki ahemaq beta apnee maan ko dukh pahunchaata hai.
2khazaanon ka koee faaida naheen agar vah bedeen tareeqon say jama ho gaay hon, lekin raastbaazee maut say bachaaay rakhtee hai.
3rabb raastbaaz ko bhookon marnay naheen deta, lekin bedeenon ka laalach rok deta hai.
4dheelay haath ghurbat aur mehanatee haath daulat kee taraf lay jaatay hain.
5jo garmiyon men fasal jama karta hai vah daanishmand beta hai jabki jo fasal kee kataaee kay vaqt soya raheta hai vah vaalidain kay liyay sharm ka baais hai.
6raastbaaz ka sar barkat kay taaj say aaraasta raheta hai jabki bedeenon kay munh par zulm ka parda pada raheta hai.
7log raastbaaz ko yaad karkay usay mubaarak kahetay hain, lekin bedeen ka naam sad kar mit jaaega.
8jo dil say daanishmand hai vah ahkaam qabool karta hai, lekin bakvaasee tabaah ho jaaega.
9jis ka chaal-chalan beilzaam hai vah sukoon say zindagee guzaarta hai, lekin jo tedha raasta ikhtiyaar karay usay pakda jaaega.
10aankh maarnay vaala dukh pahunchaata hai, aur bakvaasee tabaah ho jaaega.
11raastbaaz ka munh zindagee ka sarchashma hai, lekin bedeen kay munh par zulm ka parda pada raheta hai.
12nafrat jhagday chhedtee rahetee jabki muhabbat tamaam khataaon par parda daal detee hai.
13samajhdaar kay honton par hikmat paaee jaatee hai, lekin naasamajh sirf danday ka paighaam samajhta hai.
14daanishmand apna ilm mahfooz rakhtay hain, lekin ahemaq ka munh jald hee tabaahee kee taraf lay jaata hai.
15ameer kee daulat qil’aaband shaher hai jis men vah mahfooz hai jabki ghareeb kee ghurbat us kee tabaahee ka baais hai.
16jo kuchh raastbaaz kama leta hai vah zindagee ka baais hai, lekin bedeen apnee rozee gunaah karnay kay liyay istemaal karta hai.
17jo tarbiyat qabool karay vah doosron ko zindagee kee raah par laata hai, jo naseehat nazar’andaaz karay vah doosron ko saheeh raah say door lay jaata hai.
18jo apnee nafrat chhupaaay rakhay vah jhoot bolta hai, jo doosron kay baaray men ghalat khabren phailaaay vah ahemaq hai.
19jahaan bahut baaten kee jaatee hain vahaan gunaah bhee a maujood hota hai, jo apnee zabaan ko qaaboo men rakhay vah daanishmand hai.
20raastbaaz kee zabaan umda chaandee hai jabki bedeen kay dil kee koee qadar naheen.
21raastbaaz kee zabaan bahuton kee parvarish kartee hai [a] lafzee tarjuma : raastbaaz kay hont bahuton ko charaatay hain. , lekin ahemaq apnee beaqlee kay baais halaak ho jaatay hain.
22rabb kee barkat daulat ka baais hai, hamaaree apnee mehanat-mashaqqat is men izaafa naheen kartee.
23ahemaq ghalat kaam say apna dil bahelaata, lekin samajhdaar hikmat say lutf’andoz hota hai.
24jis cheez say bedeen dahshat khaata hai vahee us par aaegee, lekin raastbaaz kee aarzoo pooree ho jaaegee.
25jab toofaan aatay hain to bedeen ka naam-o-nishaan mit jaata jabki raastbaaz hamesha tak qaaim raheta hai.
26jis tarah daant sirkay say aur aankhen dhuen say tang a jaatee hain usee tarah vah tang a jaata hai jo sust aadmee say kaam karvaata hai.
27jo rabb ka khauf maanay us kee zindagee kay dinon men izaafa hota hai jabki bedeen kee zindagee vaqt say pahelay hee khatm ho jaatee hai.
28raastbaaz aakhirkaar khushee manaaengay, kyoonki un kee ummeed bar aaegee. lekin bedeenon kee ummeed jaatee rahegee.
29rabb kee raah beilzaam shakhs kay liyay panaahgaah, lekin badkaar kay liyay tabaahee ka baais hai.
30raastbaaz kabhee daanvaandol naheen hoga, lekin bedeen mulk men aabaad naheen rahengay.
31raastbaaz ka munh hikmat ka phal laata raheta hai, lekin kajgo zabaan ko kaat daala jaaega.
32raastbaaz kay hont jaantay hain ki allaah ko kya pasand hai, lekin bedeen ka munh tedhee baaten hee jaanta hai.