Amsaal 1

kitaab ka maqsad

¹zail men israaeel kay baadshaah sulemaan bin daaood kee amsaal qalamband hain.

²in say too hikmat aur tarbiyat haasil karega, baseerat kay alfaaz samajhnay kay qaabil ho jaaega, ³aur daanaaee dilaanay vaalee tarbiyat, raastee, insaaf aur diyaanatdaaree apanaaega. ⁴yah amsaal saadaalauh ko hoshyaaree aur naujavaan ko ilm aur tameez sikhaatee hain. ⁵jo daana hai vah sun kar apnay ilm men izaafa karay, jo samajhdaar hai vah raahanumaaee karnay ka fan seekh lay. ⁶tab vah amsaal aur tamseelen, daanishmandon kee baaten aur un kay muammay samajh lega.

⁷hikmat is say shuroo hotee hai ki ham rabb ka khauf maanen. sirf ahemaq hikmat aur tarbiyat ko haqeer jaantay hain.

ghalat saathiyon say khabardaar

⁸meray betay, apnay baap kee tarbiyat kay taabay rah, aur apnee maan kee hidaayat mustarad na kar. ⁹kyoonki yah teray sar par dilkash sihara aur teray galay men gulooband hain. ¹⁰meray betay, jab khataakaar tujhay phuslaanay kee koshish karen to un kay peechhay na ho lay. ¹¹un kee baat na maan jab vah kahen, “a, hamaaray saath chal! ham taak men baith kar kisee ko qatl karen, bilaavajah kisee bequsoor kee ghaat lagaaen. ¹²ham unhen paataal kee tarah zinda nigal len, unhen maut kay gadhay men utarnay vaalon kee tarah ek dam hadap kar len. ¹³ham har qism kee qeemtee cheez haasil karengay, apnay gharon ko loot kay maal say bhar lengay. ¹⁴a, jur’at karkay ham men shareek ho ja, ham loot ka tamaam maal baraabar taqseem karengay.”

¹⁵meray betay, un kay saath mat jaana, apna paaon un kee raahon par rakhnay say rok lena. ¹⁶kyoonki un kay paaon ghalat kaam kay peechhay daudtay, khoon bahaanay kay liyay bhaagtay hain. ¹⁷jab chideemaar apna jaal laga kar us par parindon ko phaansnay kay liyay rotee kay tukday bikher deta hai to parindon kee nazar men yah bemaqsad hai. ¹⁸yah log bhee ek din phans jaaengay. jab taak men baith jaatay hain to apnay aap ko tabaah kartay hain, jab doosron kee ghaat lagaatay hain to apnee hee jaan ko nuqsaan pahunchaatay hain. ¹⁹yahee un sab ka anjaam hai jo naarva nafa kay peechhay bhaagtay hain. naajaaiz nafa apnay maalik kee jaan chheen leta hai.

hikmat kee pukaar

²⁰hikmat galee men zor say aavaaz detee, chaukon men buland aavaaz say pukaartee hai. ²¹jahaan sab say ziyaada shor-sharaaba hai vahaan vah chilla chilla kar boltee, shaher kay darvaazon par hee apnee taqreer kartee hai, ²²“ai saadaalauh logo, tum kab tak apnee saadaalauhee say muhabbat rakhogay? mazaaq udaanay vaalay kab tak apnay mazaaq say lutf uthaaengay, ahemaq kab tak ilm say nafrat karengay? ²³aao, meree sarzanish par dhyaan do. tab main apnee rooh ka chashma tum par phootnay doongee, tumhen apnee baaten sunaaoongee.

²⁴lekin jab main nay aavaaz dee to tum nay inkaar kiya, jab main nay apna haath tumhaaree taraf badhaaya to kisee nay bhee tavajjuh na dee. ²⁵tum nay meray kisee mashvray kee parva na kee, meree malaamat tumhaaray nazdeek qaabil-ay-qabool naheen thee. ²⁶is liyay jab tum par aafat aaegee to main qahqaha lagaaoongee, jab tum haulnaak museebat men phans jaaogay to tumhaara mazaaq udaaoongee. ²⁷us vaqt tum par dahshatanaak aandhee toot padegee, aafat toofaan kee tarah tum par aaegee, aur tum museebat aur takleef kay sailaab men doob jaaogay. ²⁸tab vah mujhay aavaaz dengay, lekin main un kee naheen sunoongee, vah mujhay dhoondengay par paaengay naheen.

²⁹kyoonki vah ilm say nafrat karkay rabb ka khauf maannay kay liyay tayyaar naheen thay. ³⁰mera mashvra unhen qabool naheen tha balki vah meree har sarzanish ko haqeer jaantay thay. ³¹chunaanchay ab vah apnay chaal-chalan ka phal khaaen, apnay mansoobon kee fasal kha kha kar ser ho jaaen.

³²kyoonki saheeh raah say door honay ka amal saadaalauh ko maar daalta hai, aur ahemaqon kee beparvaaee unhen tabaah kartee hai. ³³lekin jo meree sunay vah sukoon say basega, haulnaak museebat usay pareshaan naheen karegee.”