Filippiyon 4

hidaayaat

¹chunaanchay meray piyaaray bhaaiyo, jin ka aarzoomand main hoon aur jo meree musarrat ka baais aur mera taaj hain, khudaavand men saabitqadam rahen. azeezo, ²main yuvdiya aur suntukhay say apeel karta hoon ki vah khudaavand men ek jaisee soch rakhen. ³haan meray hamkhidmat bhaaee, meree aap say guzaarish hai ki aap un kee madad karen. kyoonki vah allaah kee khushkhabaree phailaanay kee jidd-o-jahd men meray saath khidmat kartee rahee hain, us muqaablay men jis men klemens aur meray vah baaqee madadgaar bhee shareek thay jin kay naam kitaab-ay-hayaat men darj hain.

⁴har vaqt khudaavand men khushee manaaen. ek baar phir kaheta hoon, khushee manaaen.

⁵aap kee narmdilee tamaam logon par zaahir ho. yaad rakhen ki khudaavand aanay ko hai. ⁶apnee kisee bhee fikr men ulajh kar pareshaan na ho jaaen balki har haalat men dua aur iltija karkay apnee darakhwaasten allaah kay saamnay pesh karen. dhyaan rakhen ki aap yah shukrguzaaree kee rooh men karen. ⁷phir allaah kee salaamatee jo samajh say baahar hai aap kay dilon aur khayaalaat ko maseeh eesa men mahfooz rakhegee.

⁸bhaaiyo, ek aakhiree baat, jo kuchh sachcha hai, jo kuchh shareef hai, jo kuchh raast hai, jo kuchh muqaddas hai, jo kuchh pasandeeda hai, jo kuchh umda hai, gharaz, agar koee akhlaaqee ya qaabil-ay-taareef baat ho to us ka khayaal rakhen. ⁹jo kuchh aap nay meray vaseelay say seekh liya, haasil kar liya, sun liya ya dekh liya hai us par amal karen. phir salaamatee ka khuda aap kay saath hoga.

jamaaat kee maalee imdaad kay liyay shukriyaa

¹⁰main khudaavand men nihaayat hee khush hua ki ab aakhirkaar aap kee meray liyay fikrmandee dubaara jaag uthee hai. haan, mujhay pata hai ki aap pahelay bhee fikrmand thay, lekin aap ko is ka izhaar karnay ka mauqa naheen mila tha. ¹¹main yah apnee kisee zaroorat kee vajah say naheen kah raha, kyoonki main nay har haalat men khush rahenay ka raaz seekh liya hai. ¹²mujhay dabaaay jaanay ka tajriba hua hai aur har cheez kasrat say muyassar honay ka bhee. mujhay har haalat say khoob vaaqif kiya gaya hai, ser honay say aur bhooka rahenay say bhee, har cheez kasrat say muyassar honay say aur zarooratmand honay say bhee. ¹³maseeh men main sab kuchh karnay kay qaabil hoon, kyoonki vahee mujhay taqviyat deta raheta hai.

¹⁴to bhee achchha tha ki aap meree museebat men shareek huay. ¹⁵aap jo filippee kay rahenay vaalay hain khud jaantay hain ki us vaqt jab maseeh kee munaadee ka kaam aap kay ilaaqay men shuroo hua tha aur main sooba makiduniya say nikal aaya tha to sirf aap kee jamaaat pooray hisaab-kitaab kay saath paisay day kar meree khidmat men shareek huee. ¹⁶us vaqt bhee jab main thissaluneekay shaher men tha aap nay kaee baar meree zarooriyaat pooree karnay kay liyay kuchh bhej diya. ¹⁷kahenay ka matlab yah naheen ki main aap say kuchh paana chaahata hoon, balki meree shadeed khwaahish yah hai ki aap kay denay say aap hee ko allaah say kasrat ka sood mil jaaay. ¹⁸yahee meree raseed hai. main nay pooree raqam vasool paaee hai balki ab meray paas zaroorat say ziyaada hai. jab say mujhay ipafruditus kay haath aap ka hadiya mil gaya hai meray paas bahut kuchh hai. yah khushboodaar aur qaabil-ay-qabool qurbaanee allaah ko pasandeeda hai. ¹⁹javaab men mera khuda apnee us jalaalee daulat kay muvaafiq jo maseeh eesa men hai aap kee tamaam zarooriyaat pooree karay. ²⁰allaah hamaaray baap ka jalaal azal say abad tak ho. aameen.

salaam aur barkat

²¹tamaam maqaamee muqaddaseen ko maseeh eesa men mera salaam dena. jo bhaaee meray saath hain vah aap ko salaam kahetay hain. ²²yahaan kay tamaam muqaddaseen aap ko salaam kahetay hain, khaaskar shahenshaah kay gharaanay kay bhaaee aur bahenen. ²³khudaavand eesa maseeh ka fazl aap kee rooh kay saath rahay. aameen.