Filippiyon 3
allaah men khushee
1meray bhaaiyo, jo kuchh bhee ho, khudaavand men khush rahen. main aap ko yah baat bataatay rahenay say kabhee thakta naheen, kyoonki aisa karnay say aap mahfooz rahetay hain.
yahoodiyon say khabardaar
2kutton say khabardaar! un shareer mazdooron say hoshyaar rahena jo jism kee kaant-chhaant yaanee khatna karvaatay hain. 3kyoonki ham hee haqeeqee khatna kay pairokaar hain, ham hee hain jo allaah kay rooh men parastish kartay, maseeh eesa par fakhar kartay aur insaanee khoobiyon par bharosa naheen kartay.
paulus kee shakhsee gavaahee
4baat yah naheen ki mera apnee insaanee khoobiyon par bharosa karnay ka koee javaaz na hota. jab doosray apnee insaanee khoobiyon par fakhar kartay hain to main un kee nisbat ziyaada kar sakta hoon. 5mera khatna hua jab main abhee aath din ka bachcha tha. main israaeel qaum kay qabeelay binyameen ka hoon, aisa ibraanee jis kay vaalidain bhee ibraanee thay. main fareesiyon ka maimbar tha jo yahoodee shareeat kay kattar pairokaar hain. 6main itna sargarm tha ki maseeh kee jamaaaton ko eeza pahunchaaee. haan, main shareeat par amal karnay men raastbaaz aur beilzaam tha.
haqeeqee faaidaa
7us vaqt yah sab kuchh meray nazdeek nafa ka baais tha, lekin ab main isay maseeh men honay kay baais nuqsaan hee samajhta hoon. 8haan, balki main sab kuchh is azeemtareen baat kay sabab say nuqsaan samajhta hoon ki main apnay khudaavand maseeh eesa ko jaanta hoon. usee kee khaatir mujhay tamaam cheezon ka nuqsaan pahuncha hai. main unhen kooda hee samajhta hoon taaki maseeh ko haasil karoon 9aur us men paaya jaaoon. lekin main is naubat tak apnee us raastbaazee kay zareeay naheen pahunch sakta jo shareeat kay taabay rahenay say haasil hotee hai. is kay liyay vah raastbaazee zarooree hai jo maseeh par eemaan laanay say miltee hai, jo allaah kee taraf say hai aur jo eemaan par mabnee hotee hai. 10haan, main sab kuchh kooda hee samajhta hoon taaki maseeh ko, us kay jee uthnay kee qudrat aur us kay dukhon men shareek honay ka fazl jaan loon. yoon main us kee maut ka hamshakl banta ja raha hoon, 11is ummeed men ki main kisee na kisee tarah murdon men say jee uthnay kee naubat tak pahunchoonga.
in’aam haasil karnay kay liyay dauden
12matlab yah naheen ki main yah sab kuchh haasil kar chuka ya kaamil ho chuka hoon. lekin main manzil-ay-maqsood kee taraf dauda hua jaata hoon taaki vah kuchh pakad loon jis kay liyay maseeh eesa nay mujhay pakad liya hai. 13bhaaiyo, men apnay baaray men yah khayaal naheen karta ki main isay haasil kar chuka hoon. lekin main is ek hee baat par dhyaan deta hoon, jo kuchh meray peechhay hai vah main bhool kar sakht tag-o-dau kay saath us taraf badhta hoon jo aagay pada hai. 14main seedha manzil-ay-maqsood kee taraf dauda hua jaata hoon taaki vah in’aam haasil karoon jis kay liyay allaah nay mujhay maseeh eesa men aasmaan par bulaaya hai.
maseeh men pukhta honaa
15chunaanchay ham men say jitnay kaamil hain aaen, ham aisee soch rakhen. aur agar aap kisee baat men farq sochtay hain to allaah aap par yah bhee zaahir karega. 16jo bhee ho, jis marhalay tak ham pahunch gaay hain aaen, ham us kay mutaabiq zindagee guzaaren.
17bhaaiyo, mil kar meray naqsh-ay-qadam par chalen. aur un par khoob dhyaan den jo hamaaray namoonay par chaltay hain. 18kyoonki jis tarah main nay aap ko kaee baar bataaya hai aur ab ro ro kar bata raha hoon, bahut say log apnay chaal-chalan say zaahir kartay hain ki vah maseeh kee saleeb kay dushman hain. 19aisay logon ka anjaam halaakat hai. khaanay-peenay kee paabandiyaan aur khatnay par fakhar un ka khuda ban gaya hai [a] lafzee tarjuma : un ka pet aur un ka apnee sharm par fakhar un ka khuda ban gaya hai. . haan, vah sirf duniyaavee soch rakhtay hain. 20lekin ham aasmaan kay shaheree hain, aur ham shiddat say is intizaar men hain ki hamaara najaatadihanda aur khudaavand eesa maseeh vaheen say aaay. 21us vaqt vah hamaaray pastahaal badnon ko badal kar apnay jalaalee badan kay hamshakl bana dega. aur yah vah us quvvat kay zareeay karega jis say vah tamaam cheezen apnay taabay kar sakta hai.