Filippiyon 2
yagaangat kee zaroorat
1kya aap kay darmiyaan maseeh men hausalaaafzaaee, muhabbat kee tasallee, rooh-ul-quds kee rifaaqat, narmdilee aur rahemat paaee jaatee hai? 2agar aisa hai to meree khushee is men pooree karen ki aap ek jaisee soch rakhen aur ek jaisee muhabbat rakhen, ek jaan aur ek zahen ho jaaen. 3khudgharaz na hon, na baatil izzat kay peechhay paden balki farotnee say doosron ko apnay say behatar samjhen. 4har ek na sirf apna faaida sochay balki doosron ka bhee.
maseeh kee raah-ay-saleeb
5vahee soch rakhen jo maseeh eesa kee bhee thee.
6vah jo allaah kee soorat par thaa
naheen samajhta tha ki mera allaah kay baraabar honaa
koee aisee cheez hai
jis kay saath zabardastee chimtay rahenay kee zaroorat hai.
7naheen, us nay apnay aap ko is say maheroom karke
ghulaam kee soorat apnaaee
aur insaanon kee maanind ban gaya.
shakl-o-soorat men vah insaan paaya gaya.
8us nay apnay aap ko past kar diyaa
aur maut tak taabay raha,
balki saleebee maut tak.
9is liyay allaah nay usay sab say aala maqaam par sarfaraaz kar diyaa
aur usay vah naam bakhsha jo har naam say aala hai,
10taaki eesa kay is naam kay saamnay har ghutna jhukay,
khwaah vah ghutna aasmaan par, zameen par ya is kay neechay ho,
11aur har zabaan tasleem karay ki eesa maseeh khudaavand hai.
yoon khuda baap ko jalaal diya jaaega.
ruhaanee taraqqee ka raaz
12meray azeezo, jab main aap kay paas tha to aap hamesha faramaambardaar rahay. ab jab main gairahaazir hoon to is kee kaheen ziyaada zaroorat hai. chunaanchay dartay aur kaamptay huay jaanfishaanee kartay rahen taaki aap kee najaat takmeel tak pahunchay. 13kyoonki khuda hee aap men vah kuchh karnay kee khwaahish paida karta hai jo usay pasand hai, aur vahee aap ko yah poora karnay kee taaqat deta hai.
14sab kuchh budabudaaay aur bahs-mubaahasa kiay baghair karen 15taaki aap beilzaam aur paak ho kar allaah kay bedaagh farzand saabit ho jaaen, aisay log jo ek tedhee aur ultee nasal kay darmiyaan hee aasmaan kay sitaaron kee tarah chamaktay damakte 16aur zindagee ka kalaam thaamay rakhtay hain. phir main maseeh kee aamad kay din fakhar kar sakoonga ki na main raaygaan dauda, na befaaida jidd-o-jahd kee.
17dekhen, jo khidmat aap eemaan say sar’anjaam day rahay hain vah ek aisee qurbaanee hai jo allaah ko pasand hai. khuda karay ki jo dukh main utha raha hoon vah mai kee us nazar kee maanind ho jo bait-ul-muqaddas men qurbaanee par undelee jaatee hai. agar meree nazar vaaqaee aap kee qurbaanee yoon mukammal karay to main khush hoon aur aap kay saath khushee manaata hoon. 18aap bhee isee vajah say khush hon aur meray saath khushee manaaen.
teemuthiyus aur ipafruditus ko filippiyon kay paas bheja jaaegaa
19mujhay ummeed hai ki agar khudaavand eesa nay chaaha to main jald hee teemuthiyus ko aap kay paas bhej doonga taaki aap kay baaray men khabar pa kar mera hausla bhee badh jaaay. 20kyoonki meray paas koee aur naheen jis kee soch bilkul meree jaisee hai aur jo itnee khuloosdilee say aap kee fikr karay. 21doosray sab apnay mafaad kee talaash men rahetay hain aur vah kuchh nazar’andaaz kartay hain jo eesa maseeh ka kaam badhaata hai. 22lekin aap ko to maaloom hai ki teemuthiyus qaabil-ay-etimaad saabit hua, ki us nay mera beta ban kar meray saath allaah kee khushkhabaree phailaanay kee khidmat sar’anjaam dee. 23chunaanchay ummeed hai ki joon hee mujhay pata chalay ki mera kya banega main usay aap kay paas bhej doonga. 24aur mera khudaavand men eemaan hai ki main bhee jald hee aap kay paas aaoonga.
25lekin main nay zarooree samjha ki itnay men ipafruditus ko aap kay paas vaapas bhej doon jisay aap nay qaasid kay taur par meree zarooriyaat pooree karnay kay liyay meray paas bhej diya tha. vah mera sachcha bhaaee, hamkhidmat aur saathee sipaahee saabit hua. 26main usay is liyay bhej raha hoon kyoonki vah aap sab ka nihaayat aarzoomand hai aur is liyay bechain hai ki aap ko us kay beemaar honay kee khabar mil gaee thee. 27aur vah tha bhee beemaar balki marnay ko tha. lekin allaah nay us par rahem kiya, aur na sirf us par balki mujh par bhee taaki meray dukh men izaafa na ho jaaay. 28is liyay main usay aur jaldee say aap kay paas bhejoonga taaki aap usay dekh kar khush ho jaaen aur meree pareshaanee bhee door ho jaaay. 29chunaanchay khudaavand men badee khushee say us ka istiqbaal karen. us jaisay logon kee izzat karen, 30kyoonki vah maseeh kay kaam kay baais marnay kee naubat tak pahunch gaya tha. us nay apnee jaan khatray men daal dee taaki aap kee jagah meree vah khidmat karay jo aap na kar sakay.