Filippiyon 1
salaam
1yah khat maseeh eesa kay ghulaamon paulus aur teemuthiyus kee taraf say hai.
main filippee men maujood un tamaam logon ko likh raha hoon jinhen allaah nay maseeh eesa kay zareeay makhsoos-o-muqaddas kiya hai. main un kay buzurgon aur khaadimon ko bhee likh raha hoon.
2khuda hamaara baap aur khudaavand eesa maseeh aap ko fazl aur salaamatee ata karen.
jamaaat kay liyay shukr-o-duaa
3jab bhee main aap ko yaad karta hoon to apnay khuda ka shukr karta hoon. 4aap kay liyay tamaam duaaon men main hamesha khushee say dua karta hoon, 5is liyay ki aap pahelay din say lay kar aaj tak allaah kee khushkhabaree phailaanay men meray shareek rahay hain. 6aur mujhay yaqeen hai ki allaah jis nay aap men yah achchha kaam shuroo kiya hai isay us din takmeel tak pahunchaaega jab maseeh eesa vaapas aaega. 7aur munaasib hai ki aap sab kay baaray men mera yahee khayaal ho, kyoonki aap mujhay azeez rakhtay hain. haan, jab mujhay jel men daala gaya ya main allaah kee khushkhabaree ka difa ya us kee tasdeeq kar raha tha to aap bhee meray is khaas fazl men shareek huay. 8allaah mera gavaah hai ki main kitnee shiddat say aap sab ka aarzoomand hoon. haan, main maseeh kee see dilee shafqat kay saath aap ka khwaahishmand hoon.
9aur meree dua hai ki aap kee muhabbat men ilm-o-irfaan aur har tarah kee ruhaanee baseerat ka yahaan tak izaafa ho jaaay ki vah badhtee badhtee dil say chhalak uthay. 10kyoonki yah zarooree hai taaki aap vah baaten qabool karen jo bunyaadee ahemiyat kee haamil hain aur aap maseeh kee aamad tak belaus aur beilzaam zindagee guzaaren. 11aur yoon aap us raastbaazee kay phal say bharay rahengay jo aap ko eesa maseeh kay vaseelay say haasil hotee hai. phir aap apnee zindagee say allaah ko jalaal dengay aur us kee tamjeed karengay.
har ek ko maaloom ho jaaay ki maseeh kaun hai
12bhaaiyo, main chaahata hoon ki yah baat aap kay ilm men ho ki jo kuchh bhee mujh par guzra hai vah haqeeqat men allaah kee khushkhabaree kay phailaao ka baais ban gaya hai. 13kyoonki praitoriyum [a] gavarnar ka sarkaaree mahel praitoriyum kahelaata tha. yahaan is ka matlab shaahanshaah kay paheredaaron kay kvaartar bhee ho sakta hai. kay tamaam afraad aur baaqee sab ko maaloom ho gaya hai ki main maseeh kee khaatir qaidee hoon. 14aur meray qaid men honay kee vajah say khudaavand men ziyaadaatar bhaaiyon ka etimaad itna badh gaya hai ki vah mazeed dileree kay saath bilaakhauf allaah ka kalaam sunaatay hain.
15beshak baaz to hasad aur mukhaalafat kay baais maseeh kee munaadee kar rahay hain, lekin baaqiyon kee neeyat achchhee hai, 16kyoonki vah jaantay hain ki main allaah kee khushkhabaree kay difa kee vajah say yahaan pada hoon. is liyay vah muhabbat kee rooh men tableegh kartay hain. 17is kay muqaablay men doosray khuloosdilee say maseeh kay baaray men paighaam naheen sunaatay balki khudgharzee say. yah samajhtay hain ki ham is tarah paulus kee giriftaaree ko mazeed takleefdih bana saktay hain.
18lekin is say kya farq padta hai! ahem baat to yah hai ki maseeh kee munaadee har tarah say kee ja rahee hai, khwaah munaad kee neeyat purkhuloos ho ya na. aur is vajah say main khush hoon. aur khush rahoonga bhee, 19kyoonki main jaanta hoon ki yah meray liyay rihaaee ka baais banega, is liyay ki aap meray liyay dua kar rahay hain aur eesa maseeh ka rooh meree himaayat kar raha hai. 20haan, yah meree pooree tavaqqo aur ummeed hai. main yah bhee jaanta hoon ki mujhay kisee bhee baat men sharminda naheen kiya jaaega balki jaisa maazee men hamesha hua ab bhee mujhay badee dileree say maseeh ko jalaal denay ka fazl milega, khwaah main zinda rahoon ya mar jaaoon. 21kyoonki meray liyay maseeh zindagee hai aur maut nafa ka baais. 22agar main zinda rahoon to is ka faaida yah hoga ki main mehanat karkay mazeed phal la sakoonga. chunaanchay main naheen kah sakta ki kya behatar hai. 23main badee kash-m-kash men raheta hoon. ek taraf main kooch karkay maseeh kay paas honay kee aarzoo rakhta hoon, kyoonki yah meray liyay sab say behatar hota. 24lekin doosree taraf ziyaada zarooree yah hai ki main aap kee khaatir zinda rahoon. 25aur choonki mujhay is zaroorat ka yaqeen hai, is liyay main jaanta hoon ki main zinda rah kar dubaara aap sab kay saath rahoonga taaki aap taraqqee karen aur eemaan men khush rahen. 26haan, meray aap kay paas vaapas aanay say aap meray sabab say maseeh eesa par hadd say ziyaada fakhar karengay.
27lekin aap har soorat men maseeh kee khushkhabaree aur aasmaan kay shaheriyon kay laaiq zindagee guzaaren. phir khwaah main a kar aap ko dekhoon, khwaah ghairmaujoodgee men aap kay baaray men sunoon, mujhay maaloom hoga ki aap ek rooh men qaaim hain, aap mil kar yakdilee say us eemaan kay liyay jaanfishaanee kar rahay hain jo allaah kee khushkhabaree say paida hua hai, 28aur aap kisee soorat men apnay mukhaalifon say dahshat naheen khaatay. yah un kay liyay ek nishaan hoga ki vah halaak ho jaaengay jabki aap ko najaat haasil hogee, aur vah bhee allaah say. 29kyoonki aap ko na sirf maseeh par eemaan laanay ka fazl haasil hua hai balki us kee khaatir dukh uthaanay ka bhee. 30aap bhee us muqaablay men jaanfishaanee kar rahay hain jis men aap nay mujhay dekha hai aur jis kay baaray men aap nay ab sun liya hai ki main ab tak us men masroof hoon.