Filemon 1
1yah khat maseeh eesa kay qaidee paulus aur teemuthiyus kee taraf say hai.
main apnay azeez dost aur hamkhidmat filemon ko likh raha hoon 2aur saath saath apnee bahen afiya, apnay hamsipaah arkhippus aur us jamaaat ko jo aap kay ghar men jama hotee hai.
3khuda hamaara baap aur khudaavand eesa maseeh aap ko fazl aur salaamatee ata karen.
filemon kee muhabbat aur eemaan
4jab bhee main dua karta hoon to aap ko yaad karkay apnay khuda ka shukr karta hoon. 5kyoonki mujhay khudaavand eesa kay baaray men aap kay eemaan aur aap kee tamaam muqaddaseen say muhabbat kee khabar miltee rahetee hai. 6meree dua hai ki aap kee jo rifaaqat eemaan say paida huee hai vah aap men yoon zor pakday ki aap ko behatar taur par har us achchhee cheez kee samajh aaay jo hamen maseeh men haasil hai. 7bhaaee, aap kee muhabbat dekh kar mujhay badee khushee aur tasallee huee hai, kyoonki aap nay muqaddaseen kay dilon ko tar-o-taaza kar diya hai.
unesimus kee sifaarish
8is vajah say main maseeh men itnee dileree mahsoos karta hoon ki aap ko vah kuchh karnay ka hukm doon jo ab munaasib hai. 9to bhee main aisa naheen karna chaahata balki muhabbat kee bina par aap say apeel hee karta hoon. go main paulus maseeh eesa ka elchee balki ab us ka qaidee bhee hoon 10to bhee minnat karkay apnay betay unesimus kee sifaarish karta hoon. kyoonki meray qaid men hotay huay vah mera beta ban gaya. 11pahelay to vah aap kay kaam naheen a sakta tha, lekin ab vah aap kay liyay aur meray liyay kaafee mufeed saabit hua hai [a] unesimus ka matlab kaar’aamad, faaidaamand hai. .
12ab main is ko goya apnee jaan ko aap kay paas vaapas bhej raha hoon. 13asal men main usay apnay paas rakhna chaahata tha taaki jab tak main khushkhabaree kee khaatir qaid men hoon vah aap kee jagah meree khidmat karay. 14lekin main aap kee ijaazat kay baghair kuchh naheen karna chaahata tha. kyoonki main chaahata hoon ki jo bhee meharbaanee aap karengay vah aap majboor ho kar na karen balki khushee say.
15ho sakta hai ki unesimus is liyay kuchh der kay liyay aap say juda ho gaya ki vah aap ko hamesha kay liyay dubaara mil jaaay. 16kyoonki ab vah na sirf ghulaam hai balki ghulaam say kaheen ziyaada. ab vah ek azeez bhaaee hai jo mujhay khaas azeez hai. lekin vah aap ko kaheen ziyaada azeez hoga, ghulaam kee haisiyat say bhee aur khudaavand men bhaaee kee haisiyat say bhee.
17gharaz, agar aap mujhay apna saathee samjhen to usay yoon khush’aamadeed kahen jaisay main khud a kar haazir hota. 18agar us nay aap ko koee nuqsaan pahunchaaya ya aap ka qarzdaar hua to main is ka muaavaza denay kay liyay tayyaar hoon. 19yahaan main paulus apnay hee haath say is baat kee tasdeeq karta hoon : main is ka muaavaza doonga agarchi mujhay aap ko yaad dilaanay kee zaroorat naheen ki aap khud meray qarzdaar hain. kyoonki mera qarz jo aap par hai vah aap khud hain. 20chunaanchay meray bhaaee, mujh par yah meharbaanee karen ki mujhay khudaavand men aap say kuchh faaida milay. maseeh men meree jaan ko taaza karen.
21main aap kee faramaambardaaree par etibaar karkay aap ko yah likh raha hoon. kyoonki main jaanta hoon ki aap na sirf meree sunengay balki is say kaheen ziyaada meray liyay karengay. 22ek aur guzaarish bhee hai, meray liyay ek kamra tayyaar karen, kyoonki mujhay ummeed hai ki aap kee duaaon kay javaab men mujhay aap ko vaapas diya jaaega.
aakhiree salaam
23ipafraas jo maseeh eesa men meray saath qaidee hai aap ko salaam kaheta hai. 24isee tarah marqus, aristarkhus, demaas aur looqa bhee aap ko salaam kahetay hain.
25khudaavand eesa ka fazl aap sab kay saath hota rahay.