Gintee 9
registaan men eed-ay-fasah
1israaeeliyon ko misr say niklay ek saal ho gaya tha. doosray saal kay pahelay maheenay men rabb nay dasht-ay-seena men moosa say baat kee.
2“laazim hai ki israaeelee eed-ay-fasah ko muqarrara vaqt par manaaen, 3yaanee is maheenay kay chaudhven din, sooraj kay ghuroob honay kay ain baad. usay tamaam qavaaid kay mutaabiq manaana.” 4chunaanchay moosa nay israaeeliyon say kaha ki vah eed-ay-fasah manaaen, 5aur unhon nay aisa hee kiya. unhon nay eed-ay-fasah ko pahelay maheenay kay chaudhven din sooraj kay ghuroob honay kay ain baad manaaya. unhon nay sab kuchh vaisa hee kiya jaisa rabb nay moosa ko hukm diya tha.
6lekin kuchh aadmee naapaak thay, kyoonki unhon nay laash chhoo lee thee. is vajah say vah us din eed-ay-fasah na mana sakay. vah moosa aur haaroon kay paas a kar 7kahenay lagay, “ham nay laash chhoo lee hai, is liyay naapaak hain. lekin hamen is sabab say eed-ay-fasah ko manaanay say kyoon roka jaaay? ham bhee muqarrara vaqt par baaqee israaeeliyon kay saath rabb kee qurbaanee pesh karna chaahatay hain.” 8moosa nay javaab diya, “yahaan meray intizaar men khaday raho. main maaloom karta hoon ki rabb tumhaaray baaray men kya hukm deta hai.”
9rabb nay moosa say kaha, 10“israaeeliyon ko bata dena ki agar tum ya tumhaaree aulaad men say koee eed-ay-fasah kay dauraan laash chhoonay say naapaak ho ya kisee doordaraaz ilaaqay men safar kar raha ho, to bhee vah eed mana sakta hai. 11aisa shakhs usay ain ek maah kay baad mana kar lelay kay saath bekhameeree rotee aur kadva saag-paat khaaay. 12khaanay men say kuchh bhee aglee subah tak baaqee na rahay. jaanvar kee koee bhee haddee na todna. manaanay vaala eed-ay-fasah kay pooray faraaiz ada karay. 13lekin jo paak honay aur safar na karnay kay baavujood bhee eed-ay-fasah ko na manaaay usay us kee qaum men say mitaaya jaaay, kyoonki us nay muqarrara vaqt par rabb ko qurbaanee pesh naheen kee. us shakhs ko apnay gunaah ka nateeja bhugatna padega. 14agar koee pardesee tumhaaray darmiyaan rahetay huay rabb kay saamnay eed-ay-fasah manaana chaahay to usay ijaazat hai. shart yah hai ki vah pooray faraaiz ada karay. pardesee aur desee kay liyay eed-ay-fasah manaanay kay faraaiz ek jaisay hain.”
mulaaqaat kay khaimay par baadal ka satoon
15jis din shareeat kay muqaddas khaimay ko khada kiya gaya us din baadal a kar us par chha gaya. raat kay vaqt baadal aag kee soorat men nazar aaya. 16is kay baad yahee soorat-ay-haal rahee ki baadal us par chhaaya raheta aur raat kay dauraan aag kee soorat men nazar aata. 17jab bhee baadal khaimay par say uthta israaeelee ravaana ho jaatay. jahaan bhee baadal utar jaata vahaan israaeelee apnay deray daaltay. 18israaeelee rabb kay hukm par ravaana hotay aur us kay hukm par deray daaltay. jab tak baadal maqdis par chhaaya raheta us vaqt tak vah vaheen thahertay. 19kabhee kabhee baadal badee der tak khaimay par thahera raheta. tab israaeelee rabb ka hukm maan kar ravaana na hotay. 20kabhee kabhee baadal sirf do chaar din kay liyay khaimay par thaherta. phir vah rabb kay hukm kay mutaabiq hee thahertay aur ravaana hotay thay. 21kabhee kabhee baadal sirf shaam say lay kar subah tak khaimay par thaherta. jab vah subah kay vaqt uthta to israaeelee bhee ravaana hotay thay. jab bhee baadal uthta vah bhee ravaana ho jaatay. 22jab tak baadal muqaddas khaimay par chhaaya raheta us vaqt tak israaeelee ravaana na hotay, chaahay vah do din, ek maah, ek saal ya is say ziyaada arsa maqdis par chhaaya raheta. lekin jab vah uthta to israaeelee bhee ravaana ho jaatay. 23vah rabb kay hukm par khaimay lagaatay aur us kay hukm par ravaana hotay thay. vah vaisa hee kartay thay jaisa rabb moosa kee maarifat farmaata tha.