Gintee 8

shamaadaan par charaagh

¹rabb nay moosa say kaha, ²“haaroon ko bataana, ‘tujhay saat charaaghon ko shamaadaan par yoon rakhna hai ki vah shamaadaan ka saamnay vaala hissa raushan karen’.”

³haaroon nay aisa hee kiya. jis tarah rabb nay moosa ko hukm diya tha usee tarah us nay charaaghon ko rakh diya taaki vah saamnay vaala hissa raushan karen. ⁴shamaadaan paaay say lay kar oopar kee kaliyon tak sonay kay ek ghaday huay tukday ka bana hua tha. moosa nay usay us namoonay kay ain mutaabiq banvaaya jo rabb nay usay dikhaaya tha.

laaviyon kee makhsoosiyat

⁵rabb nay moosa say kaha, ⁶“laaviyon ko deegar israaeeliyon say alag karkay paak-saaf karna. ⁷is kay liyay gunaah say paak karnay vaala paanee un par chhidak kar unhen hukm dena ki apnay jism kay pooray baal mundavaao aur apnay kapday dhoo. yoon vah paak-saaf ho jaaengay. ⁸phir vah ek javaan bail chunen aur saath kee ghalla kee nazar kay liyay tel kay saath milaaya gaya behtareen maida len. too khud bhee ek javaan bail chun. vah gunaah kee qurbaanee kay liyay hoga.

⁹is kay baad laaviyon ko mulaaqaat kay khaimay kay saamnay khada karkay israaeel kee pooree jamaaat ko vahaan jama karna. ¹⁰jab laavee rabb kay saamnay khaday hon to baaqee israaeelee un kay saron par apnay haath rakhen. ¹¹phir haaroon laaviyon ko rabb kay saamnay pesh karay. unhen israaeeliyon kee taraf say hilaaee huee qurbaanee kee haisiyat say pesh kiya jaaay taaki vah rabb kee khidmat kar saken. ¹²phir laavee apnay haath donon bailon kay saron par rakhen. ek bail ko gunaah kee qurbaanee kay taur par aur doosray ko bhasm honay vaalee qurbaanee kay taur par chadhaao taaki laaviyon ka kaffaara diya jaaay.

¹³laaviyon ko is tareeqay say haaroon aur us kay beton kay saamnay khada karkay rabb ko hilaaee huee qurbaanee kay taur par pesh karna hai. ¹⁴unhen baaqee israaeeliyon say alag karnay say vah mera hissa banengay. ¹⁵is kay baad hee vah mulaaqaat kay khaimay men a kar khidmat karen, kyoonki ab vah khidmat karnay kay laaiq hain. unhen paak-saaf karkay hilaaee huee qurbaanee kay taur par pesh karnay ka sabab yah hai ¹⁶ki laavee israaeeliyon men say vah hain jo mujhay pooray taur par diay gaay hain. main nay unhen israaeeliyon kay tamaam pahelauthon kee jagah lay liya hai. ¹⁷kyoonki israaeel men har pahelautha mera hai, khwaah vah insaan ka ho ya haivaan ka. us din jab main nay misriyon kay pahelauthon ko maar diya main nay israaeel kay pahelauthon ko apnay liyay makhsoos-o-muqaddas kiya. ¹⁸is silsilay men main nay laaviyon ko israaeeliyon kay tamaam pahelauthon kee jagah lay kar ¹⁹unhen haaroon aur us kay beton ko diya hai. vah mulaaqaat kay khaimay men israaeeliyon kee khidmat karen aur un kay liyay kaffaara ka intizaam qaaim rakhen taaki jab israaeelee maqdis kay qareeb aaen to un ko vaba say maara na jaaay.”

²⁰moosa, haaroon aur israaeeliyon kee pooree jamaaat nay ehatiyaat say rabb kee laaviyon kay baaray men hidaayaat par amal kiya. ²¹laaviyon nay apnay aap ko gunaahon say paak-saaf karkay apnay kapdon ko dhoya. phir haaroon nay unhen rabb kay saamnay hilaaee huee qurbaanee kay taur par pesh kiya aur un ka kaffaara diya taaki vah paak ho jaaen. ²²is kay baad laavee mulaaqaat kay khaimay men aaay taaki haaroon aur us kay beton kay tahet khidmat karen. yoon sab kuchh vaisa hee kiya gaya jaisa rabb nay moosa ko hukm diya tha.

²³rabb nay moosa say yah bhee kaha, ²⁴“laavee 25 saal kee umr men mulaaqaat kay khaimay men apnee khidmat shuroo karen ²⁵aur 50 saal kee umr men ritaayar ho jaaen. ²⁶is kay baad vah mulaaqaat kay khaimay men apnay bhaaiyon kee madad kar saktay hain, lekin khud khidmat naheen kar saktay. tujhay laaviyon ko in hidaayaat kay mutaabiq un kee apnee apnee zimmaadaariyaan denee hain.”