Gintee 6

jo apnay aap ko makhsoos kartay hain

¹rabb nay moosa say kaha, ²“israaeeliyon ko hidaayat dena ki agar koee aadmee ya aurat mannat maan kar apnay aap ko ek muqarrara vaqt kay liyay rabb kay liyay makhsoos kare ³to vah mai ya koee aur nashaaaavar cheez na piay. na vah angoor ya kisee aur cheez ka sirka piay, na angoor ka ras. vah angoor ya kishmish na khaaay. ⁴jab tak vah makhsoos hai vah angoor kee koee bhee paidaavaar na khaaay, yahaan tak ki angoor kay beej ya chhilkay bhee na khaaay. ⁵jab tak vah apnee mannat kay mutaabiq makhsoos hai vah apnay baal na katvaaay. jitnee der kay liyay us nay apnay aap ko rabb kay liyay makhsoos kiya hai utnee der tak vah muqaddas hai. is liyay vah apnay baal badhnay day. ⁶jab tak vah makhsoos hai vah kisee laash kay qareeb na jaaay, ⁷chaahay vah us kay baap, maan, bhaaee ya bahen kee laash kyoon na ho. kyoonki is say vah naapaak ho jaaega jabki abhee tak us kee makhsoosiyat lambay baalon kee soorat men nazar aatee hai. ⁸vah apnee makhsoosiyat kay dauraan rabb kay liyay makhsoos-o-muqaddas hai.

⁹agar koee achaanak mar jaaay jab makhsoos shakhs us kay qareeb ho to us kay makhsoos baal naapaak ho jaaengay. aisee soorat men laazim hai ki vah apnay aap ko paak-saaf karkay saatven din apnay sar ko mundavaaay. ¹⁰aathven din vah do qumriyaan ya do javaan kabootar lay kar mulaaqaat kay khaimay kay darvaazay par aaay aur imaam ko day. ¹¹imaam in men say ek ko gunaah kee qurbaanee kay taur par chadhaaay aur doosray ko bhasm honay vaalee qurbaanee kay taur par. yoon vah us kay liyay kaffaara dega jo laash kay qareeb honay say naapaak ho gaya hai. usee din vah apnay sar ko dubaara makhsoos kare ¹²aur apnay aap ko muqarrara vaqt kay liyay dubaara rabb kay liyay makhsoos karay. vah qusoor kee qurbaanee kay taur par ek saal ka bhed ka bachcha pesh karay. jitnay din us nay pahelay makhsoosiyat kee haalat men guzaaray hain vah shumaar naheen kiay ja saktay kyoonki vah makhsoosiyat kee haalat men naapaak ho gaya tha. vah dubaara pahelay din say shuroo karay.

¹³shareeat kay mutaabiq jab makhsoos shakhs ka muqarrara vaqt guzar gaya ho to pahelay usay mulaaqaat kay khaimay kay darvaazay par laaya jaaay. ¹⁴vahaan vah rabb ko bhasm honay vaalee qurbaanee kay liyay bhed ka ek beaib yaksaala nar bachcha, gunaah kee qurbaanee kay liyay ek beaib yaksaala bhed aur salaamatee kee qurbaanee kay liyay ek beaib mendha pesh karay. ¹⁵is kay ilaava vah ek tokree men bekhameeree rotiyaan jin men behtareen maida aur tel milaaya gaya ho aur bekhameeree rotiyaan jin par tel lagaaya gaya ho mutaalliqa ghalla kee nazar aur mai kee nazar kay saath ¹⁶rabb ko pesh karay. pahelay imaam gunaah kee qurbaanee aur bhasm honay vaalee qurbaanee rabb kay huzoor chadhaaay. ¹⁷phir vah mendhay ko bekhameeree rotiyon kay saath salaamatee kee qurbaanee kay taur par pesh karay. imaam ghalla kee nazar aur mai kee nazar bhee chadhaaay. ¹⁸is dauraan makhsoos shakhs mulaaqaat kay khaimay par apnay makhsoos kiay gaay sar ko mundva kar tamaam baal salaamatee kee qurbaanee kee aag men phainkay.

¹⁹phir imaam mendhay ka ek paka hua shaana aur tokree men say donon qismon kee ek ek rotee lay kar makhsoos shakhs kay haathon par rakhay. ²⁰is kay baad vah yah cheezen vaapas lay kar unhen hilaanay kee qurbaanee kay taur par rabb kay saamnay hilaaay. yah ek muqaddas qurbaanee hai jo imaam ka hissa hai. salaamatee kee qurbaanee ka hilaaya hua seena aur uthaaee huee raan bhee imaam ka hissa hain. qurbaanee kay ikhtitaam par makhsoos kiay huay shakhs ko mai peenay kee ijaazat hai.

²¹jo apnay aap ko rabb kay liyay makhsoos karta hai vah aisa hee karay. laazim hai ki vah in hidaayaat kay mutaabiq tamaam qurbaaniyaan pesh karay. agar gunjaaish ho to vah aur bhee pesh kar sakta hai. ba-har-haal laazim hai ki vah apnee mannat aur yah hidaayaat pooree karay.”

imaam kee barkat

²²rabb nay moosa say kaha, ²³“haaroon aur us kay beton ko bata dena ki vah israaeeliyon ko yoon barkat den,

²⁴‘rabb tujhay barkat day aur teree hifaazat karay.

²⁵rabb apnay chiharay ka meharbaan noor tujh par chamkaaay aur tujh par rahem karay.

²⁶rabb kee nazar-ay-karam tujh par ho, aur vah tujhay salaamatee bakhshay.’

²⁷yoon vah mera naam lay kar israaeeliyon ko barkat den. phir main unhen barkat doonga.”