Gintee 5
naapaak log khaimaagaah men naheen rah sakte
1rabb nay moosa say kaha, 2“israaeeliyon ko hukm day ki har us shakhs ko khaimaagaah say baahar kar do jis ko vabaaee jildee beemaaree hai, jis kay zakhmon say maaay nikalta raheta hai ya jo kisee laash ko chhoonay say naapaak hai. 3khwaah mard ho ya aurat, sab ko khaimaagaah kay baahar bhej dena taaki vah khaimaagaah ko naapaak na karen jahaan main tumhaaray darmiyaan sukoonat karta hoon.” 4israaeeliyon nay vaisa hee kiya jaisa rabb nay moosa ko kaha tha. unhon nay rabb kay hukm kay ain mutaabiq is tarah kay tamaam logon ko khaimaagaah say baahar kar diya.
ghalat kaam ka muaavazaa
5rabb nay moosa say kaha, 6“israaeeliyon ko hidaayat dena ki jo bhee kisee say ghalat sulook karay vah meray saath bevafaaee karta hai aur qusoorvaar hai, khwaah mard ho ya aurat. 7laazim hai ki vah apna gunaah tasleem karay aur us ka poora muaavaza day balki mut’assira shakhs ka nuqsaan poora karnay kay ilaava 20 feesad ziyaada day. 8lekin agar vah shakhs jis ka qusoor kiya gaya tha mar chuka ho aur us ka koee vaaris na ho jo yah muaavaza vasool kar sakay to phir usay rabb ko dena hai. imaam ko yah muaavaza us mendhay kay ilaava milega jo qusoorvaar apnay kaffaara kay liyay dega. 9-10 neez imaam ko israaeeliyon kee qurbaaniyon men say vah kuchh milna hai jo uthaanay vaalee qurbaanee kay taur par usay diya jaata hai. yah hissa sirf imaamon ko hee milna hai.”
zina kay shak par allaah ka faislaa
11rabb nay moosa say kaha, 12“israaeeliyon ko bataana, ho sakta hai ki koee shaadeeshuda aurat bhatak kar apnay shauhar say bevafa ho jaaay aur 13kisee aur say hambistar ho kar naapaak ho jaaay. us kay shauhar nay usay naheen dekha, kyoonki yah posheedgee men hua hai aur na kisee nay usay pakda, na is ka koee gavaah hai. 14agar shauhar ko apnee beevee kee vafaadaaree par shak ho aur vah ghairat khaanay lagay, lekin yaqeen say naheen kah sakta ki meree beevee qusoorvaar hai ki naheen 15to vah apnee beevee ko imaam kay paas lay aaay. saath saath vah apnee beevee kay liyay qurbaanee kay taur par jau ka dedh kilograam behtareen maida lay aaay. is par na tel undela jaaay, na bakhoor daala jaaay, kyoonki ghalla kee yah nazar ghairat kee nazar hai jis ka maqsad hai ki posheeda qusoor zaahir ho jaaay. 16imaam aurat ko qareeb aanay day aur rabb kay saamnay khada karay. 17vah mittee ka bartan muqaddas paanee say bhar kar us men maqdis kay farsh kee kuchh khaak daalay. 18phir vah aurat ko rabb ko pesh karkay us kay baal khulvaaay aur us kay haathon par maiday kee nazar rakhay. imaam kay apnay haath men kadvay paanee ka vah bartan ho jo laanat ka baais hai.
19phir vah aurat ko qasam khila kar kahay, ‘agar koee aur aadmee aap say hambistar naheen hua hai aur aap naapaak naheen huee hain to is kadvay paanee kee laanat ka aap par koee asar na ho. 20lekin agar aap bhatak kar apnay shauhar say bevafa ho gaee hain aur kisee aur say hambistar ho kar naapaak ho gaee hain 21to rabb aap ko aap kee qaum kay saamnay laantee banaaay. aap baanjh ho jaaen aur aap ka pet phool jaaay. 22jab laanat ka yah paanee aap kay pet men utray to aap baanjh ho jaaen aur aap ka pet phool jaaay.’ is par aurat kahay, ‘aameen, aisa hee ho.’
23phir imaam yah laanat likh kar kaaghaz ko bartan kay paanee men yoon dho day ki us par likhee huee baaten paanee men ghul jaaen. 24baad men vah aurat ko yah paanee pilaaay taaki vah us kay jism men ja kar usay laanat pahunchaaay. 25lekin pahelay imaam us kay haathon men say ghairat kee qurbaanee lay kar usay ghalla kee nazar kay taur par rabb kay saamnay hilaaay aur phir qurbaangaah kay paas lay aaay. 26us par vah mutthee bhar yaadgaaree kee qurbaanee kay taur par jalaaay. is kay baad vah aurat ko paanee pilaaay. 27agar vah apnay shauhar say bevafa thee aur naapaak ho gaee hai to vah baanjh ho jaaegee, us ka pet phool jaaega aur vah apnee qaum kay saamnay laantee thaheregee. 28lekin agar vah paak-saaf hai to usay saza naheen dee jaaegee aur vah bachchay janm denay kay qaabil rahegee.
29-30 chunaanchay aisa hee karna hai jab shauhar ghairat khaaay aur usay apnee beevee par zina ka shak ho. beevee ko qurbaangaah kay saamnay khada kiya jaaay aur imaam yah sab kuchh karay. 31is soorat men shauhar bequsoor thaherega, lekin agar us kee beevee nay vaaqaee zina kiya ho to usay apnay gunaah kay nateejay bardaasht karnay padengay.”