Gintee 4
qihaatiyon kee zimmaadaariyaan
1rabb nay moosa aur haaroon say kaha, 2“laavee kay qabeelay men say qihaatiyon kee mardumashumaaree un kay kumbon aur aabaaee gharaanon kay mutaabiq karna. 3un tamaam mardon ko rajistar men darj karna jo 30 say lay kar 50 saal kay hain aur mulaaqaat kay khaimay men khidmat karnay kay liyay a saktay hain. 4qihaatiyon kee khidmat muqaddastareen kamray kee dekh-bhaal hai.
5jab khaimay ko safar kay liyay sametna hai to haaroon aur us kay betay daakhil ho kar muqaddastareen kamray ka parda utaaren aur usay shareeat kay sandooq par daal den. 6is par vah takhas kee khaalon ka ghilaaf aur aakhir men pooree tarah neelay rang ka kapda bichhaaen. is kay baad vah sandooq ko uthaanay kee lakdiyaan lagaaen.
7vah us mez par bhee neelay rang ka kapda bichhaaen jis par rabb ko rotee pesh kee jaatee hai. us par thaal, piyaalay, mai kee nazren pesh karnay kay bartan aur martabaan rakhay jaaen. jo rotee hamesha mez par hotee hai vah bhee us par rahay. 8haaroon aur us kay betay in tamaam cheezon par qirmizee rang ka kapda bichha kar aakhir men un kay oopar takhas kee khaalon ka ghilaaf daalen. is kay baad vah mez ko uthaanay kee lakdiyaan lagaaen.
9vah shamaadaan aur us kay saamaan par yaanee us kay charaagh, battee katarnay kee qainchiyon, jaltay koilay kay chhotay bartanon aur tel kay bartanon par neelay rang ka kapda rakhen. 10yah sab kuchh vah takhas kee khaalon kay ghilaaf men lapeten aur usay utha kar lay jaanay kay liyay ek chaukhtay par rakhen.
11vah bakhoor jalaanay kee sonay kee qurbaangaah par bhee neelay rang ka kapda bichha kar us par takhas kee khaalon ka ghilaaf daalen aur phir usay uthaanay kee lakdiyaan lagaaen. 12vah saara saamaan jo muqaddas kamray men istemaal hota hai lay kar neelay rang kay kapday men lapeten, us par takhas kee khaalon ka ghilaaf daalen aur usay utha kar lay jaanay kay liyay ek chaukhtay par rakhen.
13phir vah jaanvaron ko jalaanay kee qurbaangaah ko raakh say saaf karkay us par arghvaanee rang ka kapda bichhaaen. 14us par vah qurbaangaah kee khidmat kay liyay saara zarooree saamaan rakhen yaanee chhidkaao kay katoray, jaltay huay koilay kay bartan, belachay aur kaantay. is saamaan par vah takhas kee khaalon ka ghilaaf daal kar qurbaangaah ko uthaanay kee lakdiyaan lagaaen.
15safar kay liyay ravaana hotay vaqt yah sab kuchh utha kar lay jaana qihaatiyon kee zimmaadaaree hai. lekin laazim hai ki pahelay haaroon aur us kay betay yah tamaam muqaddas cheezen dhaampen. qihaatee in men say koee bhee cheez na chhuen varna mar jaaengay.
16haaroon imaam ka beta ileeazar pooray muqaddas khaimay aur us kay saamaan ka inchaarj ho. is men charaaghon ka tel, bakhoor, ghalla kee rozaana nazar aur masah ka tel bhee shaamil hai.”
17rabb nay moosa aur haaroon say kaha, 18“khabardaar raho ki qihaat kay kumbay laavee kay qabeelay men say mitnay na paaen. 19chunaanchay jab vah muqaddastareen cheezon kay paas aaen to haaroon aur us kay betay har ek ko us saamaan kay paas lay jaaen jo usay utha kar lay jaana hai taaki vah na maren balki jeetay rahen. 20qihaatee ek lamhay kay liyay bhee muqaddas cheezen dekhnay kay liyay andar na jaaen, varna vah mar jaaengay.”
jairsoniyon kee zimmaadaariyaan
21phir rabb nay moosa say kaha, 22“jairson kee aulaad kee mardumashumaaree bhee un kay aabaaee gharaanon aur kumbon kay mutaabiq karna. 23un tamaam mardon ko rajistar men darj karna jo 30 say lay kar 50 saal kay hain aur mulaaqaat kay khaimay men khidmat kay liyay a saktay hain. 24vah yah cheezen utha kar lay jaanay kay zimmaadaar hain : 25mulaaqaat ka khaima, us kee chhat, chhat par rakhee huee takhas kee khaal kee poshish, khaimay kay darvaazay ka parda, 26khaimay aur qurbaangaah kee chaardeevaaree kay parday, chaardeevaaree kay darvaazay ka parda, us kay rassay aur usay lagaanay ka baaqee saamaan. vah un tamaam kaamon kay zimmaadaar hain jo in cheezon say munsalik hain. 27jairsoniyon kee pooree khidmat haaroon aur us kay beton kee hidaayaat kay mutaabiq ho. khabardaar raho ki vah sab kuchh ain hidaayaat kay mutaabiq utha kar lay jaaen. 28yah sab mulaaqaat kay khaimay men jairsoniyon kee zimmaadaariyaan hain. is kaam men haaroon imaam ka beta itmar un par muqarrar hai.”
miraariyon kee zimmaadaariyaan
29rabb nay kaha, “miraaree kee aulaad kee mardumashumaaree bhee un kay aabaaee gharaanon aur kumbon kay mutaabiq karna. 30un tamaam mardon ko rajistar men darj karna jo 30 say lay kar 50 saal kay hain aur mulaaqaat kay khaimay men khidmat kay liyay a saktay hain. 31vah mulaaqaat kay khaimay kee yah cheezen utha kar lay jaanay kay zimmaadaar hain : deevaar kay takhtay, shaheteer, khambay aur paaay, 32phir khaimay kee chaardeevaaree kay khambay, paaay, mekhen, rassay aur yah cheezen lagaanay ka saamaan. har ek ko tafseel say bataana ki vah kya kya utha kar lay jaaay. 33yah sab kuchh miraariyon kee mulaaqaat kay khaimay men zimmaadaariyon men shaamil hai. is kaam men haaroon imaam ka beta itmar un par muqarrar ho.”
laaviyon kee mardumashumaaree
34moosa, haaroon aur jamaaat kay raahanumaaon nay qihaatiyon kee mardumashumaaree un kay kumbon aur aabaaee gharaanon kay mutaabiq kee. 35-37 unhon nay un tamaam mardon ko rajistar men darj kiya jo 30 say lay kar 50 saal kay thay aur jo mulaaqaat kay khaimay men khidmat kar saktay thay. un kee kul taadaad 2,750 thee. moosa aur haaroon nay sab kuchh vaisa hee kiya jaisa rabb nay moosa kee maarifat farmaaya tha. 38-41 phir jairsoniyon kee mardumashumaaree un kay kumbon aur aabaaee gharaanon kay mutaabiq huee. khidmat kay laaiq mardon kee kul taadaad 2,630 thee. moosa aur haaroon nay sab kuchh vaisa hee kiya jaisa rabb nay moosa kay zareeay farmaaya tha. 42-45 phir miraariyon kee mardumashumaaree un kay kumbon aur aabaaee gharaanon kay mutaabiq huee. khidmat kay laaiq mardon kee kul taadaad 3,200 thee. moosa aur haaroon nay sab kuchh vaisa hee kiya jaisa rabb nay moosa kay zareeay farmaaya tha. 46-48 laaviyon kay un mardon kee kul taadaad 8,580 thee jinhen mulaaqaat kay khaimay men khidmat karna aur safar kartay vaqt usay utha kar lay jaana tha.
49moosa nay rabb kay hukm kay mutaabiq har ek ko us kee apnee apnee zimmaadaaree saumpee aur usay bataaya ki usay kya kya utha kar lay jaana hai. yoon un kee mardumashumaaree rabb kay us hukm kay ain mutaabiq kee gaee jo us nay moosa kee maarifat diya tha.