Gintee 36

ek qabeelay kee mauroosee zameen shaadee say doosray qabeelay men muntaqil naheen ho saktee

¹ek din jiliaad bin makeer bin manassee bin yoosuf kay kumbay say niklay huay aabaaee gharaanon kay sarparast moosa aur un sardaaron kay paas aaay jo deegar aabaaee gharaanon kay sarparast thay. ²unhon nay kaha, “rabb nay aap ko hukm diya tha ki aap qur’a daal kar mulk ko israaeeliyon men taqseem karen. us vaqt us nay yah bhee kaha tha ki hamaaray bhaaee silaafihaad kee betiyon ko us kee mauroosee zameen milnee hai. ³agar vah israaeel kay kisee aur qabeelay kay mardon say shaadee karen to phir yah zameen jo hamaaray qabeelay ka mauroosee hissa hai us qabeelay ka mauroosee hissa banegee aur ham us say maheroom ho jaaengay. phir hamaara qabaailee ilaaqa chhota ho jaaega. ⁴aur agar ham yah zameen vaapas bhee khareeden to bhee vah aglay bahaalee kay saal men doosray qabeelay ko vaapas chalee jaaegee jis men in aurton nay shaadee kee hai. is tarah vah hamesha kay liyay hamaaray haath say nikal jaaegee.”

⁵moosa nay rabb kay hukm par israaeeliyon ko bataaya, “jiliaad kay mard haq-ba-jaanib hain. ⁶is liyay rabb kee hidaayat yah hai ki silaafihaad kee betiyon ko har aadmee say shaadee karnay kee ijaazat hai, lekin sirf is soorat men ki vah un kay apnay qabeelay ka ho. ⁷is tarah ek qabeelay kee mauroosee zameen kisee doosray qabeelay men muntaqil naheen hogee. laazim hai ki har qabeelay ka poora ilaaqa usee kay paas rahay.

⁸jo bhee betee meeraas men zameen paatee hai us kay liyay laazim hai ki vah apnay hee qabeelay kay kisee mard say shaadee karay taaki us kee zameen qabeelay kay paas hee rahay. ⁹ek qabeelay kee mauroosee zameen kisee doosray qabeelay ko muntaqil karnay kee ijaazat naheen hai. laazim hai ki har qabeelay ka poora mauroosee ilaaqa usee kay paas rahay.”

^10-11 silaafihaad kee betiyon mahelaah, tirza, hujlaah, milkaah aur nooaah nay vaisa hee kiya jaisa rabb nay moosa ko bataaya tha. unhon nay apnay chachaazaad bhaaiyon say shaadee kee. ¹²choonki vah bhee manassee kay qabeelay kay thay is liyay yah mauroosee zameen silaafihaad kay qabeelay kay paas rahee.

¹³rabb nay yah ahkaam aur hidaayaat israaeeliyon ko moosa kee maarifat deen jab vah moaab kay maidaanee ilaaqay men darya-ay-yardan kay mashriqee kinaaray par yareehoo kay saamnay khaimaazan thay.