Gintee 35
laaviyon kay liyay shaher
1israaeelee ab tak moaab kay maidaanee ilaaqay men darya-ay-yardan kay mashriqee kinaaray par yareehoo kay saamnay thay. vahaan rabb nay moosa say kaha,
2“israaeeliyon ko bata day ki vah laaviyon ko apnee milee huee zameenon men say rahenay kay liyay shaher den. unhen shaheron kay ird-gird maveshee charaanay kee zameen bhee milay. 3phir laaviyon kay paas rahenay kay liyay shaher aur apnay jaanvar charaanay kay liyay zameen hogee. 4charaanay kay liyay zameen shaher kay ird-gird hogee, aur chaaron taraf ka faasila faseelon say 1,500 fut ho. 5charaanay kee yah zameen murabba shakl kee hogee jis kay har paheloo ka faasila 3,000 fut ho. shaher is murabba shakl kay beech men ho. yah raqba shaher kay baashindon kay liyay ho taaki vah apnay maveshee chara saken.
ghairiraadee khoonrezee kay liyay panaah kay shaher
6-7 “laaviyon ko kul 48 shaher dena. in men say chhah panaah kay shaher muqarrar karna. un men aisay log panaah lay sakengay jin kay haathon ghairiraadee taur par koee halaak hua ho. 8har qabeela laaviyon ko apnay ilaaqay kay raqbay kay mutaabiq shaher day. jis qabeelay ka ilaaqa bada hai usay laaviyon ko ziyaada shaher denay hain jabki jis qabeelay ka ilaaqa chhota hai vah laaviyon ko kam shaher day.”
9phir rabb nay moosa say kaha, 10“israaeeliyon ko bataana ki darya-ay-yardan ko paar karnay kay baad 11kuchh panaah kay shaher muqarrar karna. un men vah shakhs panaah lay sakega jis kay haathon ghairiraadee taur par koee halaak hua ho. 12vahaan vah intiqaam lenay vaalay say panaah lay sakega aur jamaaat kee adaalat kay saamnay khaday honay say pahelay maara naheen ja sakega. 13is kay liyay chhah shaher chun lo. 14teen darya-ay-yardan kay mashriq men aur teen mulk-ay-kan’aan men hon. 15yah chhah shaher har kisee ko panaah dengay, chaahay vah israaeelee, pardesee ya un kay darmiyaan rahenay vaala ghairshaheree ho. jis say bhee ghairiraadee taur par koee halaak hua ho vah vahaan panaah lay sakta hai.
16-18 agar kisee nay kisee ko jaan-boojh kar lohay, patthar ya lakdee kee kisee cheez say maar daala ho vah qaatil hai aur usay saza-ay-maut denee hai. 19maqtool ka sab say qareebee rishtedaar usay talaash karkay maar day. 20-21 kyoonki jo nafrat ya dushmanee kay baais jaan-boojh kar kisee ko yoon dhakka day, us par koee cheez phaink day ya usay mukka maaray ki vah mar jaaay vah qaatil hai aur usay saza-ay-maut denee hai.
22lekin vah qaatil naheen hai jis say dushmanee kay baais naheen balki ittifaaq say aur ghairiraadee taur par koee halaak hua ho, chaahay us nay usay dhakka diya, koee cheez us par phaink dee 23ya koee patthar us par girnay diya. 24agar aisa hua to laazim hai ki jamaaat in hidaayaat kay mutaabiq us kay aur intiqaam lenay vaalay kay darmiyaan faisla karay. 25agar mulzim bequsoor hai to jamaaat us kee hifaazat karkay usay panaah kay us shaher men vaapas lay jaaay jis men us nay panaah lee hai. vahaan vah muqaddas tel say masah kiay gaay imaam-ay-aazam kee maut tak rahay. 26lekin agar yah shakhs is say pahelay panaah kay shaher say niklay to vah mahfooz naheen hoga. 27agar us ka intiqaam lenay vaalay say saamna ho jaaay to intiqaam lenay vaalay ko usay maar daalnay kee ijaazat hogee. agar vah aisa karay to bequsoor rahega. 28panaah lenay vaala imaam-ay-aazam kee vafaat tak panaah kay shaher men rahay. is kay baad hee vah apnay ghar vaapas ja sakta hai. 29yah usool daaimee hain. jahaan bhee tum rahetay ho tumhen hamesha in par amal karna hai.
30jis par qatl ka ilzaam lagaaya gaya ho usay sirf is soorat men saza-ay-maut dee ja saktee hai ki kam az kam do gavaah hon. ek gavaah kaafee naheen hai.
31qaatil ko zaroor saza-ay-maut dena. khwaah vah is say bachnay kay liyay koee bhee muaavaza day usay aazaad na chhodna balki saza-ay-maut dena. 32us shakhs say bhee paisay qabool na karna jis say ghairiraadee taur par koee halaak hua ho aur jo is sabab say panaah kay shaher men rah raha hai. usay ijaazat naheen ki vah paisay day kar panaah ka shaher chhoday aur apnay ghar vaapas chala jaaay. laazim hai ki vah is kay liyay imaam-ay-aazam kee vafaat ka intizaar karay.
33jis mulk men tum rahetay ho us kee muqaddas haalat ko naapaak na karna. jab kisee ko us men qatl kiya jaaay to vah naapaak ho jaata hai. jab is tarah khoon baheta hai to mulk kee muqaddas haalat sirf us shakhs kay khoon bahenay say bahaal ho jaatee hai jis nay yah khoon bahaaya hai. yaanee mulk ka sirf qaatil kee maut say hee kaffaara diya ja sakta hai. 34us mulk ko naapaak na karna jis men tum aabaad ho aur main sukoonat karta hoon. kyoonki main rabb hoon jo israaeeliyon kay darmiyaan sukoonat karta hoon.”