Gintee 33

israaeel kay safar kay marhale

¹zail men un jagahon kay naam hain jahaan jahaan israaeelee qabeelay apnay daston kay mutaabiq moosa aur haaroon kee raahanumaaee men misr say nikal kar khaimaazan huay thay. ²rabb kay hukm par moosa nay har jagah ka naam qalamband kiya jahaan unhon nay apnay khaimay lagaaay thay. un jagahon kay naam yah hain :

³pahelay maheenay kay pandraheven din israaeelee raamsees say ravaana huay. yaanee fasah kay din kay baad kay din vah baday ikhtiyaar kay saath tamaam misriyon kay dekhtay dekhtay chalay gaay. ⁴misree us vaqt apnay pahelauthon ko dafan kar rahay thay, kyoonki rabb nay pahelauthon ko maar kar un kay devtaaon kee adaalat kee thee.

⁵raamsees say israaeelee sukkaat pahunch gaay jahaan unhon nay pahelee martaba apnay deray lagaaay. ⁶vahaan say vah etaam pahunchay jo registaan kay kinaaray par vaaqay hai. ⁷etaam say vah vaapas mud kar fee-hakheerot kee taraf badhay jo baal-safon kay mashriq men hai. vah mijdaal kay qareeb khaimaazan huay. ⁸phir vah fee-hakheerot say kooch karkay samundar men say guzar gaay. is kay baad vah teen din etaam kay registaan men safar kartay kartay maara pahunch gaay aur vahaan apnay khaimay lagaaay. ⁹maara say vah eleem chalay gaay jahaan 12 chashmay aur khajoor kay 70 darakht thay. vahaan thahernay kay baad ¹⁰vah baher-ay-qulzum kay saahil par khaimaazan huay, ¹¹phir dasht-ay-seen men pahunch gaay.

¹²un kay aglay marhalay yah thay : dufqa, ^13-37 aloos, rafeedeem jahaan peenay ka paanee dastayaab na tha, dasht-ay-seena, qabrot-hattaava, haseeraat, ritma, rimmon-faaras, libna, rissa, qaheelaata, saafar pahaad, haraada, maqaheelot, tahet, taarah, mitqa, hashmoona, mauseerot, banee-yaaqaan, hor-hajjidajaad, yutbaata, abroona, asyoon-jaabar, dasht-ay-seen men vaaqay qaadis aur hor pahaad jo adom kee sarhadd par vaaqay hai.

³⁸vahaan rabb nay haaroon imaam ko hukm diya ki vah hor pahaad par chadh jaaay. vaheen vah paanchven maah kay pahelay din faut hua. israaeeliyon ko misr say niklay 40 saal guzar chukay thay. ³⁹us vaqt haaroon 123 saal ka tha.

⁴⁰un dinon men araad kay kan’aanee baadshaah nay suna ki israaeelee meray mulk kee taraf badh rahay hain. vah kan’aan kay junoob men hukoomat karta tha.

^41-47 hor pahaad say ravaana ho kar israaeelee zail kee jagahon par thaheray : zalmoona, foonon, obot, ayyay-abaareem jo moaab kay ilaaqay men tha, deebon-jad, almoon-diblaataaim aur naboo kay qareeb vaaqay abaareem ka pahaadee ilaaqa. ⁴⁸vahaan say unhon nay yardan kee vaadee men utar kar moaab kay maidaanee ilaaqay men apnay deray lagaaay. ab vah darya-ay-yardan kay mashriqee kinaaray par yareehoo shaher kay saamnay thay. ⁴⁹un kay khaimay bait-yaseemot say lay kar abeel-shitteem tak lagay thay.

tamaam kan’aanee baashindon ko nikaalnay ka hukm

⁵⁰vahaan rabb nay moosa say kaha, ⁵¹“israaeeliyon ko bataana ki jab tum darya-ay-yardan ko paar karkay mulk-ay-kan’aan men daakhil hoge ⁵²to laazim hai ki tum tamaam baashindon ko nikaal do. un kay taraashay aur dhaalay huay buton ko tod daalo aur un kee oonchee jagahon kay mandiron ko tabaah karo. ⁵³mulk par qabza karkay us men aabaad ho jaao, kyoonki main nay yah mulk tumhen day diya hai. yah meree taraf say tumhaaree mauroosee milkiyat hai. ⁵⁴mulk ko mukhtalif qabeelon aur khaandaanon men qur’a daal kar taqseem karna. har khaandaan kay afraad kee taadaad ka lihaaz rakhna. baday khaandaan ko nisbatan ziyaada zameen dena aur chhotay khaandaan ko nisbatan kam zameen. ⁵⁵lekin agar tum mulk kay baashindon ko naheen nikaalogay to bachay huay tumhaaree aankhon men khaar aur tumhaaray pahelooon men kaantay ban kar tumhen us mulk men tang karengay jis men tum aabaad hogay. ⁵⁶phir main tumhaaray saath vah kuchh karoonga jo un kay saath karna chaahata hoon.”