Gintee 32

darya-ay-yardan kay mashriqee kinaaray par aabaad qabeele

¹roobin aur jad kay qabeelon kay paas bahut say maveshee thay. jab unhon nay dekha ki yaazer aur jiliaad ka ilaaqa maveshee paalnay kay liyay achchha hai ²to unhon nay moosa, ileeazar imaam aur jamaaat kay raahanumaaon kay paas a kar kaha, ^3-4 “jis ilaaqay ko rabb nay israaeel kee jamaaat kay aagay aagay shikast dee hai vah maveshee paalnay kay liyay achchha hai. ataaraat, deebon, yaazer, nimra, hasbon, ileeaalee, sabaam, naboo aur baoon jo is men shaamil hain hamaaray kaam aaengay, kyoonki aap kay khaadimon kay paas maveshee hain. ⁵agar aap kee nazar-ay-karam ham par ho to hamen yah ilaaqa diya jaaay. yah hamaaree milkiyat ban jaaay aur hamen darya-ay-yardan ko paar karnay par majboor na kiya jaaay.”

⁶moosa nay jad aur roobin kay afraad say kaha, “kya tum yahaan peechhay rah kar apnay bhaaiyon ko chhodna chaahatay ho jab vah jang ladnay kay liyay aagay nikalengay? ⁷us vaqt jab israaeelee darya-ay-yardan ko paar karkay us mulk men daakhil honay vaalay hain jo rabb nay unhen diya hai to tum kyoon un kee hausalaashikanee kar rahay ho? ⁸tumhaaray baapdaada nay bhee yahee kuchh kiya jab main nay unhen qaadis-barneea say mulk kay baaray men maaloomaat haasil karnay kay liyay bheja. ⁹iskaal kee vaadee men pahunch kar mulk kee tafteesh karnay kay baad unhon nay israaeeliyon kee hausalaashikanee kee taaki vah us mulk men daakhil na hon jo rabb nay unhen diya tha. ¹⁰us din rabb nay ghussay men a kar qasam khaaee, ¹¹‘un aadmiyon men say jo misr say nikal aaay hain koee us mulk ko naheen dekhega jis ka vaada main nay qasam kha kar ibraaheem, ishaaq aur yaaqoob say kiya tha. kyoonki unhon nay pooree vafaadaaree say meree pairvee na kee. sirf vah jin kee umr us vaqt 20 saal say kam hai daakhil hongay. ¹²buzurgon men say sirf kaalib bin yafunna qanizzee aur yashooa bin noon mulk men daakhil hongay, is liyay ki unhon nay pooree vafaadaaree say meree pairvee kee.’ ¹³us vaqt rabb ka ghazab un par aan pada, aur unhen 40 saal tak registaan men maaray maaray phirna pada, jab tak ki vah tamaam nasal khatm na ho gaee jis nay us kay nazdeek ghalat kaam kiya tha. ¹⁴ab tum gunaahgaaron kee aulaad apnay baapdaada kee jagah khaday ho kar rabb ka israaeel par ghussa mazeed badha rahay ho. ¹⁵agar tum us kee pairvee say hatogay to vah dubaara in logon ko registaan men rahenay dega, aur tum in kee halaakat ka baais banogay.”

¹⁶is kay baad roobin aur jad kay afraad dubaara moosa kay paas aaay aur kaha, “ham yahaan filahaal apnay maveshee kay liyay baaday aur apnay baal-bachchon kay liyay shaher banaana chaahatay hain. ¹⁷is kay baad ham musallah ho kar israaeeliyon kay aagay aagay chalengay aur har ek ko us kee apnee jagah tak pahunchaaengay. itnay men hamaaray baal-bachchay hamaaray shaheron kee faseelon kay andar mulk kay mukhaalif baashindon say mahfooz rahengay. ¹⁸ham us vaqt tak apnay gharon ko naheen lautengay jab tak har israaeelee ko us kee mauroosee zameen na mil jaaay. ¹⁹doosray, ham khud un kay saath darya-ay-yardan kay maghrib men meeraas men kuchh naheen paaengay, kyoonki hamen apnee mauroosee zameen darya-ay-yardan kay mashriqee kinaaray par mil chukee hai.”

²⁰yah sun kar moosa nay kaha, “agar tum aisa hee karogay to theek hai. phir rabb kay saamnay jang kay liyay tayyaar ho jaao ²¹aur sab hathiyaar baandh kar rabb kay saamnay darya-ay-yardan ko paar karo. us vaqt tak na lauto jab tak rabb nay apnay tamaam dushmanon ko apnay aagay say nikaal na diya ho. ²²phir jab mulk par rabb ka qabza ho gaya hoga to tum laut sakogay. tab tum nay rabb aur apnay hamvatan bhaaiyon kay liyay apnay faraaiz ada kar diay hongay, aur yah ilaaqa rabb kay saamnay tumhaara mauroosee haq hoga. ²³lekin agar tum aisa na karo to phir tum rabb hee ka gunaah karogay. yaqeen jaano tumhen apnay gunaah kee saza milegee. ²⁴ab apnay baal-bachchon kay liyay shaher aur apnay maveshiyon kay liyay baaday bana lo. lekin apnay vaaday ko zaroor poora karna.”

²⁵jad aur roobin kay afraad nay moosa say kaha, “ham aap kay khaadim hain, ham apnay aaqa kay hukm kay mutaabiq hee karengay. ²⁶hamaaray baal-bachchay aur maveshee yaheen jiliaad kay shaheron men rahengay. ²⁷lekin aap kay khaadim musallah ho kar darya ko paar karengay aur rabb kay saamnay jang karengay. ham sab kuchh vaisa hee karengay jaisa hamaaray aaqa nay hamen hukm diya hai.”

²⁸tab moosa nay ileeazar imaam, yashooa bin noon aur qabaailee kumbon kay sarparaston ko hidaayat dee, ²⁹“laazim hai ki jad aur roobin kay mard musallah ho kar tumhaaray saath hee rabb kay saamnay darya-ay-yardan ko paar karen aur mulk par qabza karen. agar vah aisa karen to unhen meeraas men jiliaad ka ilaaqa do. ³⁰lekin agar vah aisa na karen to phir unhen mulk-ay-kan’aan hee men tumhaaray saath mauroosee zameen milay.”

³¹jad aur roobin kay afraad nay israar kiya, “aap kay khaadim sab kuchh karengay jo rabb nay kaha hai. ³²ham musallah ho kar rabb kay saamnay darya-ay-yardan ko paar karengay aur kan’aan kay mulk men daakhil hongay, agarchi hamaaree mauroosee zameen yardan kay mashriqee kinaaray par hogee.”

³³tab moosa nay jad, roobin aur manassee kay aadhay qabeelay ko yah ilaaqa diya. us men vah poora mulk shaamil tha jis par pahelay amoriyon ka baadshaah seehon aur basan ka baadshaah oj hukoomat kartay thay. in shikastakhurda mamaalik kay deehaat samet tamaam shaher un kay havaalay kiay gaay.

³⁴jad kay qabeelay nay deebon, ataaraat, aroeer, ³⁵atraat-shofaan, yaazer, yugabaha, ³⁶bait-nimra aur bait-haaraan kay shaheron ko dubaara taameer kiya. unhon nay un kee faseelen banaaeen aur apnay maveshiyon kay liyay baaday bhee. ³⁷roobin kay qabeelay nay hasbon, ileeaalee, qiryataaim, ³⁸naboo, baal-maoon aur sibmaah dubaara taameer kiay. naboo aur baal-maoon kay naam badal gaay, kyoonki unhon nay un shaheron ko naay naam diay jo unhon nay dubaara taameer kiay.

³⁹manassee kay betay makeer kee aulaad nay jiliaad ja kar us par qabza kar liya aur us kay tamaam amoree baashindon ko nikaal diya. ⁴⁰chunaanchay moosa nay makeeriyon ko jiliaad kee sarzameen day dee, aur vah vahaan aabaad huay. ⁴¹manassee kay ek aadmee banaam yaaeer nay us ilaaqay men kuchh bastiyon par qabza karkay unhen havvot-yaaeer yaanee ‘yaaeer kee bastiyaan’ ka naam diya. ⁴²isee tarah us qabeelay kay ek aur aadmee banaam noobah nay ja kar qanaat aur us kay deehaat par qabza kar liya. us nay shaher ka naam noobah rakha.