Gintee 31

midiyaaniyon say jang

¹rabb nay moosa say kaha, ²“midiyaaniyon say israaeeliyon ka badla lay. is kay baad too kooch karkay apnay baapdaada say ja milega.”

³chunaanchay moosa nay israaeeliyon say kaha, “hathiyaaron say apnay kuchh aadmiyon ko les karo taaki vah midiyaan say jang karkay rabb ka badla len. ⁴har qabeelay kay 1,000 mard jang ladnay kay liyay bhejo.”

⁵chunaanchay har qabeelay kay 1,000 musallah mard yaanee kul 12,000 aadmee chunay gaay. ⁶tab moosa nay unhen jang ladnay kay liyay bhej diya. us nay ileeazar imaam kay betay feenhaas ko bhee un kay saath bheja jis kay paas maqdis kee kuchh cheezen aur elaan karnay kay bigal thay. ⁷unhon nay rabb kay hukm kay mutaabiq midiyaaniyon say jang kee aur tamaam aadmiyon ko maut kay ghaat utaar diya. ⁸in men midiyaaniyon kay paanch baadshaah ivee, raqam, soor, hoor aur raba thay. bal’aam bin baor ko bhee jaan say maar diya gaya.

⁹israaeeliyon nay midiyaanee aurton aur bachchon ko giriftaar karkay un kay tamaam gaay-bail, bhed-bakriyaan aur maal loot liya. ¹⁰unhon nay un kee tamaam aabaadiyon ko khaimaagaahon samet jala kar raakh kar diya. ^11-12 phir vah tamaam loota hua maal qaidiyon aur jaanvaron samet moosa, ileeazar imaam aur israaeel kee pooree jamaaat kay paas lay aaay jo khaimaagaah men intizaar kar rahay thay. abhee tak vah moaab kay maidaanee ilaaqay men darya-ay-yardan kay mashriqee kinaaray par yareehoo kay saamnay thaheray huay thay. ¹³moosa, ileeazar aur jamaaat kay tamaam sardaar un ka istiqbaal karnay kay liyay khaimaagaah say niklay.

¹⁴unhen dekh kar moosa ko hazaar hazaar aur sau sau afraad par muqarrar afsaraan par ghussa aaya. ¹⁵us nay kaha, “aap nay tamaam aurton ko kyoon bachaaay rakha? ¹⁶un hee nay bal’aam kay mashvray par faghoor men israaeeliyon ko rabb say door kar diya tha. un hee kay sabab say rabb kee vaba us kay logon men phail gaee. ¹⁷chunaanchay ab tamaam ladkon ko jaan say maar do. un tamaam aurton ko bhee maut kay ghaat utaarna jo kunvaariyaan naheen hain. ¹⁸lekin tamaam kunvaariyon ko bachaaay rakhna. ¹⁹jis nay bhee kisee ko maar diya ya kisee laash ko chhua hai vah saat din tak khaimaagaah kay baahar rahay. teesray aur saatven din apnay aap ko apnay qaidiyon samet gunaah say paak-saaf karna. ²⁰har libaas aur har cheez ko paak-saaf karna jo chamday, bakriyon kay baalon ya lakdee kee ho.”

²¹phir ileeazar imaam nay jang say vaapas aanay vaalay mardon say kaha, “jo shareeat rabb nay moosa ko dee us kay mutaabiq ^22-23 jo bhee cheez jal naheen jaatee usay aag men say guzaar dena taaki paak-saaf ho jaaay. us men sona, chaandee, peetal, loha, teen aur seesa shaamil hai. phir us par naapaakee door karnay ka paanee chhidakna. baaqee tamaam cheezen paanee men say guzaar dena taaki vah paak-saaf ho jaaen. ²⁴saatven din apnay libaas ko dhona to tum paak-saaf ho kar khaimaagaah men daakhil ho saktay ho.”

lootay huay maal kee taqseem

²⁵rabb nay moosa say kaha, ²⁶“tamaam qaidiyon aur lootay huay jaanvaron ko gin. is men ileeazar imaam aur qabaailee kumbon kay sarparast teree madad karen. ²⁷saara maal do baraabar kay hisson men taqseem karna, ek hissa faujiyon kay liyay aur doosra baaqee jamaaat kay liyay ho. ²⁸faujiyon kay hissay kay paanch paanch sau qaidiyon men say ek ek nikaal kar rabb ko dena. isee tarah paanch paanch sau bailon, gadhon, bhedon aur bakriyon men say ek ek nikaal kar rabb ko dena. ²⁹unhen ileeazar imaam ko dena taaki vah unhen rabb ko uthaanay vaalee qurbaanee kay taur par pesh karay. ³⁰baaqee jamaaat kay hissay kay pachaas pachaas qaidiyon men say ek ek nikaal kar rabb ko dena, isee tarah pachaas pachaas bailon, gadhon, bhedon aur bakriyon ya doosray jaanvaron men say bhee ek ek nikaal kar rabb ko dena. unhen un laaviyon ko dena jo rabb kay maqdis ko sambhaaltay hain.”

³¹moosa aur ileeazar nay aisa hee kiya. ^32-34 unhon nay 6,75,000 bhed-bakriyaan, 72,000 gaay-bail aur 61,000 gadhay ginay. ³⁵in kay ilaava 32,000 qaidee kunvaariyaan bhee theen. ^36-40 faujiyon ko tamaam cheezon ka aadha hissa mil gaya yaanee 3,37,500 bhed-bakriyaan, 36,000 gaay-bail, 30,500 gadhay aur 16,000 qaidee kunvaariyaan. in men say unhon nay 675 bhed-bakriyaan, 72 gaay-bail, 61 gadhay aur 32 ladkiyaan rabb ko deen. ⁴¹moosa nay rabb ka yah hissa ileeazar imaam ko uthaanay vaalee qurbaanee kay taur par day diya, jis tarah rabb nay hukm diya tha. ^42-47 baaqee jamaaat ko bhee lootay huay maal ka aadha hissa mil gaya. moosa nay pachaas pachaas qaidiyon aur jaanvaron men say ek ek nikaal kar un laaviyon ko day diya jo rabb ka maqdis sambhaaltay thay. us nay vaisa hee kiya jaisa rabb nay hukm diya tha.

⁴⁸phir vah afsar moosa kay paas aaay jo lashkar kay hazaar hazaar aur sau sau aadmiyon par muqarrar thay. ⁴⁹unhon nay us say kaha, “aap kay khaadimon nay un faujiyon ko gin liya hai jin par vah muqarrar hain, aur hamen pata chal gaya ki ek bhee kam naheen hua. ⁵⁰is liyay ham rabb ko sonay ka tamaam zevar qurbaan karna chaahatay hain jo hamen fatah paanay par mila tha maslan sonay kay baazooband, kangan, muhar lagaanay kee angoothiyaan, baaliyaan aur haar. yah sab kuchh ham rabb ko pesh karna chaahatay hain taaki rabb kay saamnay hamaara kaffaara ho jaaay.”

⁵¹moosa aur ileeazar imaam nay sonay kee tamaam cheezen un say lay leen. ⁵²jo cheezen unhon nay afsaraan kay lootay huay maal men say rabb ko uthaanay vaalee qurbaanee kay taur par pesh keen un ka poora vazan taqreeban 190 kilograam tha. ⁵³sirf afsaraan nay aisa kiya. baaqee faujiyon nay apna loot ka maal apnay liyay rakh liya. ⁵⁴moosa aur ileeazar afsaraan ka yah sona mulaaqaat kay khaimay men lay aaay taaki vah rabb ko us kee qaum kee yaad dilaata rahay.