Gintee 30

mannat maannay kay qavaaid

¹phir moosa nay qabeelon kay sardaaron say kaha, “rabb farmaata hai,

²agar koee aadmee rabb ko kuchh denay kee mannat maanay ya kisee cheez say parhez karnay kee qasam khaaay to vah apnee baat par qaaim rah kar usay poora karay.

³agar koee javaan aurat jo ab tak apnay baap kay ghar men rahetee hai rabb ko kuchh denay kee mannat maanay ya kisee cheez say parhez karnay kee qasam khaae ⁴to laazim hai ki vah apnee mannat ya qasam kee har baat pooree karay. shart yah hai ki us ka baap us kay baaray men sun kar etiraaz na karay. ⁵lekin agar us ka baap yah sun kar usay aisa karnay say mana karay to us kee mannat ya qasam mansookh hai, aur vah usay poora karnay say baree hai. rabb usay muaaf karega, kyoonki us kay baap nay usay mana kiya hai.

⁶ho sakta hai ki kisee ghairshaadeeshuda aurat nay mannat maanee ya kisee cheez say parhez karnay kee qasam khaaee, chaahay us nay daanista taur par ya besochay-samjhay aisa kiya. is kay baad us aurat nay shaadee kar lee. ⁷shaadeeshuda haalat men bhee laazim hai ki vah apnee mannat ya qasam kee har baat pooree karay. shart yah hai ki us ka shauhar is kay baaray men sun kar etiraaz na karay. ⁸lekin agar us ka shauhar yah sun kar usay aisa karnay say mana karay to us kee mannat ya qasam mansookh hai, aur vah usay poora karnay say baree hai. rabb usay muaaf karega. ⁹agar kisee beva ya talaakshuda aurat nay mannat maanee ya kisee cheez say parhez karnay kee qasam khaaee to laazim hai ki vah apnee har baat pooree karay.

¹⁰agar kisee shaadeeshuda aurat nay mannat maanee ya kisee cheez say parhez karnay kee qasam khaaee ¹¹to laazim hai ki vah apnee har baat pooree karay. shart yah hai ki us ka shauhar us kay baaray men sun kar etiraaz na karay. ¹²lekin agar us ka shauhar usay aisa karnay say mana karay to us kee mannat ya qasam mansookh hai. vah usay poora karnay say baree hai. rabb usay muaaf karega, kyoonki us kay shauhar nay usay mana kiya hai. ¹³chaahay beevee nay kuchh denay kee mannat maanee ho ya kisee cheez say parhez karnay kee qasam khaaee ho, us kay shauhar ko us kee tasdeeq ya usay mansookh karnay ka ikhtiyaar hai. ¹⁴agar us nay apnee beevee kee mannat ya qasam kay baaray men sun liya aur aglay din tak etiraaz na kiya to laazim hai ki us kee beevee apnee har baat pooree karay. shauhar nay aglay din tak etiraaz na karnay say apnee beevee kee baat kee tasdeeq kee hai. ¹⁵agar vah is kay baad yah mannat ya qasam mansookh karay to usay is qusoor kay nataaij bhugatnay padengay.”

¹⁶rabb nay moosa ko yah hidaayaat deen. yah aisee aurton kee mannaton ya qasmon kay usool hain jo ghairshaadeeshuda haalat men apnay baap kay ghar men rahetee hain ya jo shaadeeshuda hain.