Gintee 3

haaroon kay bete

¹yah haaroon aur moosa kay khaandaan ka bayaan hai. us vaqt ka zikr hai jab rabb nay seena pahaad par moosa say baat kee. ²haaroon kay chaar betay thay. bada beta nadab tha, phir abeehoo, ileeazar aur itmar. ³yah imaam thay jin ko masah karkay is khidmat ka ikhtiyaar diya gaya tha. ⁴lekin nadab aur abeehoo us vaqt mar gaay jab unhon nay dasht-ay-seena men rabb kay huzoor naajaaiz aag pesh kee. choonki vah beaulaad thay is liyay haaroon kay jeetay jee sirf ileeazar aur itmar imaam kee khidmat sar’anjaam detay thay.

laaviyon kee maqdis men zimmaadaaree

⁵rabb nay moosa say kaha, ⁶“laavee kay qabeelay ko la kar haaroon kee khidmat karnay kee zimmaadaaree day. ⁷unhen us kay liyay aur pooree jamaaat kay liyay mulaaqaat kay khaimay kee khidmaat sambhaalna hai. ⁸vah mulaaqaat kay khaimay ka saamaan sambhaalen aur tamaam israaeeliyon kay liyay maqdis kay faraaiz ada karen. ⁹tamaam israaeeliyon men say sirf laaviyon ko haaroon aur us kay beton kee khidmat kay liyay muqarrar kar. ¹⁰lekin sirf haaroon aur us kay beton ko imaam kee haisiyat haasil hai. jo bhee baaqiyon men say un kee zimmaadaariyaan uthaanay kee koshish karega usay saza-ay-maut dee jaaegee.”

¹¹rabb nay moosa say yah bhee kaha, ¹²“main nay israaeeliyon men say laaviyon ko chun liya hai. vah tamaam israaeelee pahelauthon kay ivz meray liyay makhsoos hain, ¹³kyoonki tamaam pahelauthay meray hee hain. jis din main nay misr men tamaam pahelauthon ko maar diya us din main nay israaeel kay pahelauthon ko apnay liyay makhsoos kiya, khwaah vah insaan kay thay ya haivaan kay. vah meray hee hain. main rabb hoon.”

laaviyon kee mardumashumaaree

¹⁴rabb nay seena kay registaan men moosa say kaha, ¹⁵“laaviyon ko gin kar un kay aabaaee gharaanon aur kumbon kay mutaabiq rajistar men darj karna. har betay ko ginna hai jo ek maah ya is say zaaid ka hai.” ¹⁶moosa nay aisa hee kiya.

¹⁷laavee kay teen betay jairson, qihaat aur miraaree thay. ¹⁸jairson kay do kumbay us kay beton libnee aur simaee kay naam rakhtay thay. ¹⁹qihaat kay chaar kumbay us kay beton amraam, izhaar , habroon aur uzzeeel kay naam rakhtay thay. ²⁰miraaree kay do kumbay us kay beton mahelee aur mooshee kay naam rakhtay thay. gharaz laavee kay qabeelay kay kumbay us kay poton kay naam rakhtay thay.

²¹jairson kay do kumbon banaam libnee aur simaee ²²kay 7,500 mard thay jo ek maah ya is say zaaid kay thay. ²³unhen apnay khaimay maghrib men maqdis kay peechhay lagaanay thay. ²⁴un ka raahanuma iliyaasaf bin laael tha, ²⁵aur vah khaimay ko sambhaaltay thay yaanee us kee poshishen, khaimay kay darvaazay ka parda, ²⁶khaimay aur qurbaangaah kee chaardeevaaree kay parday, chaardeevaaree kay darvaazay ka parda aur tamaam rassay. in cheezon say mutaalliq saaree khidmat un kee zimmaadaaree thee.

²⁷qihaat kay chaar kumbon banaam amraam, izhaar , habroon aur uzzeeel ²⁸kay 8,600 mard thay jo ek maah ya is say zaaid kay thay aur jin ko maqdis kee khidmat karnee thee. ²⁹unhen apnay deray maqdis kay junoob men daalnay thay. ³⁰un ka raahanuma ileesafan bin uzzeeel tha, ³¹aur vah yah cheezen sambhaaltay thay : ahd ka sandooq, mez, shamaadaan, qurbaangaahen, vah bartan aur saaz-o-saamaan jo maqdis men istemaal hota tha aur muqaddastareen kamray ka parda. in cheezon say mutaalliq saaree khidmat un kee zimmaadaaree thee. ³²haaroon imaam ka beta ileeazar laaviyon kay tamaam raahanumaaon par muqarrar tha. vah un tamaam logon ka inchaarj tha jo maqdis kee dekh-bhaal kartay thay.

³³miraaree kay do kumbon banaam mahelee aur mooshee ³⁴kay 6,200 mard thay jo ek maah ya is say zaaid kay thay. ³⁵un ka raahanuma sooreeel bin abeekhail tha. unhen apnay deray maqdis kay shimaal men daalnay thay, ³⁶aur vah yah cheezen sambhaaltay thay : khaimay kay takhtay, us kay shaheteer, khambay, paaay aur is tarah ka saara saamaan. in cheezon say mutaalliq saaree khidmat un kee zimmaadaaree thee. ³⁷vah chaardeevaaree kay khambay, paaay, mekhen aur rassay bhee sambhaaltay thay.

³⁸moosa, haaroon aur un kay beton ko apnay deray mashriq men maqdis kay saamnay daalnay thay. un kee zimmaadaaree maqdis men banee israaeel kay liyay khidmat karna thee. un kay ilaava jo bhee maqdis men daakhil honay kee koshish karta usay saza-ay-maut denee thee.

³⁹un laavee mardon kee kul taadaad jo ek maah ya is say zaaid kay thay 22,000 thee. rabb kay kahenay par moosa aur haaroon nay unhen kumbon kay mutaabiq gin kar rajistar men darj kiya.

laavee kay qabeelay kay mard pahelauthon kay ivzee hain

⁴⁰rabb nay moosa say kaha, “tamaam israaeelee pahelauthon ko ginna jo ek maah ya is say zaaid kay hain aur un kay naam rajistar men darj karna. ⁴¹un tamaam pahelauthon kee jagah laaviyon ko meray liyay makhsoos karna. isee tarah israaeeliyon kay maveshiyon kay pahelauthon kee jagah laaviyon kay maveshee meray liyay makhsoos karna. main rabb hoon.” ⁴²moosa nay aisa hee kiya jaisa rabb nay usay hukm diya. us nay tamaam israaeelee pahelauthe ⁴³jo ek maah ya is say zaaid kay thay gin liyay. un kee kul taadaad 22,273 thee.

⁴⁴rabb nay moosa say kaha, ⁴⁵“mujhay tamaam israaeelee pahelauthon kee jagah laaviyon ko pesh karna. isee tarah mujhay israaeeliyon kay maveshiyon kee jagah laaviyon kay maveshee pesh karna. laavee meray hee hain. main rabb hoon. ⁴⁶laaviyon kee nisbat baaqee israaeeliyon kay 273 pahelauthay ziyaada hain. un men se ⁴⁷har ek kay ivz chaandee kay paanch sikkay lay jo maqdis kay vazan kay mutaabiq hon (fee sikka taqreeban 11 graam). ⁴⁸yah paisay haaroon aur us kay beton ko dena.”

⁴⁹moosa nay aisa hee kiya. ⁵⁰yoon us nay chaandee kay 1,365 sikkay (taqreeban 16 kilograam jama karke ⁵¹haaroon aur us kay beton ko diay, jis tarah rabb nay usay hukm diya tha.