Gintee 29

naay saal kee eed kee qurbaaniyaan

¹saatven maah kay pandraheven din bhee kaam na karna balki muqaddas ijtima kay liyay ikatthay hona. us din narsingay phoonkay jaaen. ²rabb ko bhasm honay vaalee qurbaanee pesh kee jaaay jis kee khushboo usay pasand ho yaanee ek javaan bail, ek mendha aur bhed kay saat yaksaala bachchay. sab nuqs kay baghair hon. ³har jaanvar kay saath ghalla kee nazar bhee pesh karna jis kay liyay tel kay saath milaaya gaya behtareen maida istemaal kiya jaaay. bail kay saath saadhay 4 kilograam, mendhay kay saath 3 kilograam ⁴aur bhed kay har bachchay kay saath dedh kilograam maida pesh karna. ⁵ek bakra bhee gunaah kee qurbaanee kay taur par pesh karna taaki tumhaara kaffaara diya jaaay. ⁶yah qurbaaniyaan rozaana aur har maah kay pahelay din kee qurbaaniyon aur un kay saath kee ghalla aur mai kee nazron kay ilaava hain. in kee khushboo rabb ko pasand hai.

kaffaara kay din kee qurbaaniyaan

⁷saatven maheenay kay dasven din muqaddas ijtima kay liyay ikatthay hona. us din kaam na karna aur apnee jaan ko dukh dena. ^8-11 rabb ko vahee qurbaaniyaan pesh karna jo isee maheenay kay pahelay din pesh kee jaatee hain. sirf ek farq hai, us din ek naheen balki do bakray gunaah kee qurbaanee kay taur par pesh kiay jaaen taaki tumhaara kaffaara diya jaaay. aisee qurbaaniyaan rabb ko pasand hain.

jhompadiyon kee eed kee qurbaaniyaan

¹²saatven maheenay kay pandraheven din bhee kaam na karna balki muqaddas ijtima kay liyay ikatthay hona. saat din tak rabb kee taazeem men eed manaana. ¹³eed kay pahelay din rabb ko 13 javaan bail, 2 mendhay aur 14 bhed kay yaksaala bachchay bhasm honay vaalee qurbaanee kay taur par pesh karna. in kee khushboo usay pasand hai. sab nuqs kay baghair hon. ¹⁴har jaanvar kay saath ghalla kee nazar bhee pesh karna jis kay liyay tel say milaaya gaya behtareen maida istemaal kiya jaaay. har bail kay saath saadhay 4 kilograam, har mendhay kay saath 3 kilograam ¹⁵aur bhed kay har bachchay kay saath dedh kilograam maida pesh karna. ¹⁶is kay ilaava ek bakra bhee gunaah kee qurbaanee kay taur par pesh karna. yah qurbaaniyaan rozaana kee bhasm honay vaalee qurbaaniyon aur un kay saath vaalee ghalla aur mai kee nazron kay ilaava hain. ^17-34 eed kay baaqee chhah din yahee qurbaaniyaan pesh karnee hain. lekin har din ek bail kam ho yaanee doosray din 12, teesray din 11, chauthay din 10, paanchven din 9, chhatay din 8 aur saatven din 7 bail. har din gunaah kee qurbaanee kay liyay bakra aur maamool kee rozaana kee qurbaaniyaan bhee pesh karna. ³⁵eed kay aathven din kaam na karna balki muqaddas ijtima kay liyay ikatthay hona. ³⁶rabb ko ek javaan bail, ek mendha aur bhed kay saat yaksaala bachchay bhasm honay vaalee qurbaanee kay taur par pesh karna. in kee khushboo rabb ko pasand hai. sab nuqs kay baghair hon. ^37-38 saath hee vah tamaam qurbaaniyaan bhee pesh karna jo pahelay din pesh kee jaatee hain. ³⁹yah sab vahee qurbaaniyaan hain jo tumhen rabb ko apnee eedon par pesh karnee hain. yah un tamaam qurbaaniyon kay ilaava hain jo tum dilee khushee say ya mannat maan kar detay ho, chaahay vah bhasm honay vaalee, ghalla kee, mai kee ya salaamatee kee qurbaaniyaan kyoon na hon.”

⁴⁰moosa nay rabb kee yah tamaam hidaayaat israaeeliyon ko bata deen.