Gintee 28
rozmarra kee qurbaaniyaan
1rabb nay moosa say kaha, 2“israaeeliyon ko bataana, khayaal rakho ki tum muqarrara auqaat par mujhay jalnay vaalee qurbaaniyaan pesh karo. yah meree rotee hain aur in kee khushboo mujhay pasand hai. 3rabb ko jalnay vaalee yah qurbaanee pesh karna :
rozaana bhed kay do yaksaala bachchay jo beaib hon pooray taur par jala dena. 4ek ko subah kay vaqt pesh karna aur doosray ko sooraj kay doobnay kay ain baad. 5bhed kay bachchay kay saath ghalla kee nazar bhee pesh kee jaaay yaanee dedh kilograam behtareen maida jo ek litar zaitoon kay koot kar nikaalay huay tel kay saath milaaya gaya ho. 6yah rozmarra kee qurbaanee hai jo pooray taur par jalaaee jaatee hai aur pahelee dafa seena pahaad par chadhaaee gaee. is jalnay vaalee qurbaanee kee khushboo rabb ko pasand hai. 7-8 saath hee ek litar sharaab bhee nazar kay taur par qurbaangaah par daalee jaaay. subah aur shaam kee yah qurbaaniyaan donon hee is tareeqay say pesh kee jaaen.
sabat yaanee haftay kee qurbaanee
9sabat kay din bhed kay do aur bachchay chadhaana. vah bhee beaib aur ek saal kay hon. saath hee mai aur ghalla kee nazren bhee pesh kee jaaen. ghalla kee nazar kay liyay 3 kilograam behtareen maida tel kay saath milaaya jaaay. 10bhasm honay vaalee yah qurbaanee har haftay kay din pesh karnee hai. yah rozmarra kee qurbaaniyon kay ilaava hai.
har maah kay pahelay din kee qurbaanee
11har maah kay shuroo men rabb ko bhasm honay vaalee qurbaanee kay taur par do javaan bail, ek mendha aur bhed kay saat yaksaala bachchay pesh karna. sab baghair nuqs kay hon. 12har jaanvar kay saath ghalla kee nazar pesh karna jis kay liyay tel men milaaya gaya behtareen maida istemaal kiya jaaay. har bail kay saath saadhay 4 kilograam, har mendhay kay saath 3 kilograam 13aur bhed kay har bachchay kay saath dedh kilograam maida pesh karna. bhasm honay vaalee yah qurbaaniyaan rabb ko pasand hain. 14in qurbaaniyon kay saath mai kee nazar bhee qurbaangaah par daalna yaanee har bail kay saath do litar, har mendhay kay saath sava litar aur bhed kay har bachchay kay saath ek litar mai pesh karna. yah qurbaanee saal men har maheenay kay pahelay din kay mauqay par pesh karnee hai. 15is qurbaanee aur rozmarra kee qurbaaniyon kay ilaava rabb ko ek bakra gunaah kee qurbaanee kay taur par pesh karna.
fasah kee qurbaaniyaan
16pahelay maheenay kay chaudhven din fasah kee eed manaaee jaaay. 17aglay din pooray haftay kee vah eed shuroo hotee hai jis kay dauraan tumhen sirf bekhameeree rotee khaanee hai. 18pahelay din kaam na karna balki muqaddas ijtima kay liyay ikatthay hona. 19rabb kay huzoor bhasm honay vaalee qurbaanee kay taur par do javaan bail, ek mendha aur bhed kay saat yaksaala bachchay pesh karna. sab baghair nuqs kay hon. 20har jaanvar kay saath ghalla kee nazar bhee pesh karna jis kay liyay tel kay saath milaaya gaya behtareen maida istemaal kiya jaaay. har bail kay saath saadhay 4 kilograam, har mendhay kay saath 3 kilograam 21aur bhed kay har bachchay kay saath dedh kilograam maida pesh karna. 22gunaah kee qurbaanee kay taur par ek bakra bhee pesh karna taaki tumhaara kaffaara diya jaaay. 23-24 in tamaam qurbaaniyon ko eed kay dauraan har roz pesh karna. yah rozmarra kee bhasm honay vaalee qurbaaniyon kay ilaava hain. is khuraak kee khushboo rabb ko pasand hai. 25saatven din kaam na karna balki muqaddas ijtima kay liyay ikatthay hona.
fasal kee kataaee kee eed kee qurbaaniyaan
26fasal kee kataaee kay pahelay din kee eed par jab tum rabb ko apnee fasal kee pahelee paidaavaar pesh kartay ho to kaam na karna balki muqaddas ijtima kay liyay ikatthay hona. 27-29 us din do javaan bail, ek mendha aur bhed kay saat yaksaala bachchay qurbaangaah par pooray taur par jala dena. is kay saath ghalla aur mai kee vahee nazren pesh karna jo fasah kee eed par bhee pesh kee jaatee hain. 30is kay ilaava rabb ko ek bakra gunaah kee qurbaanee kay taur par chadhaana.
31yah tamaam qurbaaniyaan rozmarra kee bhasm honay vaalee qurbaaniyon aur un kay saath vaalee ghalla aur mai kee nazron kay ilaava hain. vah beaib hon.