Gintee 27

silaafihaad kee betiyaan

¹silaafihaad kee paanch betiyaan mahelaah, nooaah, hujlaah, milkaah aur tirza theen. silaafihaad yoosuf kay betay manassee kay kumbay ka tha. us ka poora naam silaafihaad bin hifar bin jiliaad bin makeer bin manassee bin yoosuf tha. ²silaafihaad kee betiyaan mulaaqaat kay khaimay kay darvaazay par a kar moosa, ileeazar imaam aur pooree jamaaat kay saamnay khadee hueen. unhon nay kaha, ³“hamaara baap registaan men faut hua. lekin vah qorah kay un saathiyon men say naheen tha jo rabb kay khilaaf muttahid huay thay. vah is sabab say na mara balki apnay zaatee gunaah kay baais. jab vah mar gaya to us ka koee beta naheen tha. ⁴kya yah theek hai ki hamaaray khaandaan men beta na honay kay baais hamen zameen na milay aur hamaaray baap ka naam-o-nishaan mit jaaay? hamen bhee hamaaray baap kay deegar rishtedaaron kay saath zameen den.”

⁵moosa nay un ka muaamala rabb kay saamnay pesh kiyaa ⁶to rabb nay us say kaha, ⁷“jo baat silaafihaad kee betiyaan kar rahee hain vah durust hai. unhen zaroor un kay baap kay rishtedaaron kay saath zameen milnee chaahiay. unhen baap ka virsa mil jaaay. ⁸israaeeliyon ko bhee bataana ki jab bhee koee aadmee mar jaaay jis ka beta na ho to us kee betee ko us kee meeraas mil jaaay. ⁹agar us kee betee bhee na ho to us kay bhaaiyon ko us kee meeraas mil jaaay. ¹⁰agar us kay bhaaee bhee na hon to us kay baap kay bhaaiyon ko us kee meeraas mil jaaay. ¹¹agar yah bhee na hon to us kay sab say qareebee rishtedaar ko us kee meeraas mil jaaay. vah us kee zaatee milkiyat hogee. yah usool israaeeliyon kay liyay qaanoonee haisiyat rakhta hai. vah isay vaisa maanen jaisa rabb nay moosa ko hukm diya hai.”

yashooa ko moosa ka jaansheen muqarrar kiya jaata hai

¹²phir rabb nay moosa say kaha, “abaareem kay pahaadee silsilay kay mazkoor pahaad par chadh kar us mulk par nigaah daal jo main israaeeliyon ko doonga. ¹³usay dekhnay kay baad too bhee apnay bhaaee haaroon kee tarah kooch karkay apnay baapdaada say ja milega, ¹⁴kyoonki tum donon nay dasht-ay-seen men meray hukm kee khilaafvarzee kee. us vaqt jab pooree jamaaat nay mareeba men meray khilaaf gila-shikva kiya to too nay chataan say paanee nikaaltay vaqt logon kay saamnay meree quddoosiyat qaaim na rakhee.” (mareeba dasht-ay-seen kay qaadis men chashma hai.)

¹⁵moosa nay rabb say kaha, ¹⁶“ai rabb, tamaam jaanon kay khuda, jamaaat par raahanuma muqarrar kar ¹⁷jo un kay aagay aagay jang kay liyay niklay aur un kay aagay aagay vaapas a jaaay, jo unhen baahar lay jaaay aur vaapas lay aaay. varna rabb kee jamaaat un bhedon kee maanind hogee jin ka koee charvaaha na ho.”

¹⁸javaab men rabb nay moosa say kaha, “yashooa bin noon ko chun lay jis men mera rooh hai, aur apna haath us par rakh. ¹⁹usay ileeazar imaam aur pooree jamaaat kay saamnay khada karkay un kay roo-ba-roo hee usay raahanumaaee kee zimmaadaaree day. ²⁰apnay ikhtiyaar men say kuchh usay day taaki israaeel kee pooree jamaaat us kee itaaat karay. ²¹rabb kee marzee jaannay kay liyay vah ileeazar imaam kay saamnay khada hoga to ileeazar rabb kay saamnay ooreem aur tummeem istemaal karkay us kee marzee darayaaft karega. usee kay hukm par yashooa aur israaeel kee pooree jamaaat khaimaagaah say nikalengay aur vaapas aaengay.”

²²moosa nay aisa hee kiya. us nay yashooa ko chun kar ileeazar aur pooree jamaaat kay saamnay khada kiya. ²³phir us nay us par apnay haath rakh kar usay raahanumaaee kee zimmaadaaree saumpee jis tarah rabb nay usay bataaya tha.