Gintee 26

doosree mardumashumaaree

¹vaba kay baad rabb nay moosa aur haaroon kay betay ileeazar say kaha,

²“pooree israaeelee jamaaat kee mardumashumaaree un kay aabaaee gharaanon kay mutaabiq karna. un tamaam mardon ko ginna jo 20 saal ya is say zaaid kay hain aur jo jang ladnay kay qaabil hain.”

^3-4 moosa aur ileeazar nay israaeeliyon ko bataaya ki rabb nay unhen kya hukm diya hai. chunaanchay unhon nay moaab kay maidaanee ilaaqay men yareehoo kay saamnay, lekin darya-ay-yardan kay mashriqee kinaaray par mardumashumaaree kee. yah vah israaeelee aadmee thay jo misr say niklay thay.

^5-7 israaeel kay pahelauthay roobin kay qabeelay kay 43,730 mard thay. qabeelay kay chaar kumbay hanookee, falluvee, hasronee aur karmee roobin kay beton hanook, falloo, hasron aur karmee say niklay huay thay. ⁸roobin ka beta falloo iliyaab ka baap thaa ⁹jis kay betay namooel, daatan aur abeeraam thay.

daatan aur abeeraam vahee log thay jinhen jamaaat nay chuna tha aur jinhon nay qorah kay guroh samet moosa aur haaroon say jhagadtay huay khud rabb say jhagda kiya. ¹⁰us vaqt zameen nay apna munh khol kar unhen qorah samet hadap kar liya tha. us kay 250 saathee bhee mar gaay thay jab aag nay unhen bhasm kar diya. yoon vah sab israaeel kay liyay ibrat’angez misaal ban gaay thay. ¹¹lekin qorah kee pooree nasal mitaaee naheen gaee thee.

^12-14 shamaaoon kay qabeelay kay 22,200 mard thay. qabeelay kay paanch kumbay namooelee, yameenee, yaqeenee, zaarahee aur saaoolee shamaaoon kay beton namooel, yameen, yakeen, zaarah aur saaool say niklay huay thay.

^15-18 jad kay qabeelay kay 40,500 mard thay. qabeelay kay saat kumbay safonee, hajjee, soonee, uznee, eree, aroodee aur arelee jad kay beton safon, hajjee, soonee, uznee, eree, arood aur arelee say niklay huay thay.

^19-22 yahoodaah kay qabeelay kay 76,500 mard thay. yahoodaah kay do betay er aur onaan misr aanay say pahelay kan’aan men mar gaay thay. qabeelay kay teen kumbay selaanee, faarsee aur zaarahee yahoodaah kay beton sela, faaras aur zaarah say niklay huay thay.

faaras kay do beton hasron aur hamool say do kumbay hasronee aur hamoolee niklay huay thay. ^23-25 ishkaar kay qabeelay kay 64,300 mard thay. qabeelay kay chaar kumbay tolaee, fuvvee, yasoobee aur simronee ishkaar kay beton tola, fuvva, yasoob aur simron say niklay huay thay.

^26-27 zabooloon kay qabeelay kay 60,500 mard thay. qabeelay kay teen kumbay sardee, ailonee aur yaheleeelee zabooloon kay beton sarad, ailon aur yaheleeel say niklay huay thay.

²⁸yoosuf kay do beton manassee aur ifraaeem kay alag alag qabeelay banay.

^29-34 manassee kay qabeelay kay 52,700 mard thay. qabeelay kay aath kumbay makeeree, jiliaadee, eeazaree, khalqee, asreeelee, sikmee, sameedaaee aur hifree thay. makeeree manassee kay betay makeer say jabki jiliaadee makeer kay betay jiliaad say niklay huay thay. baaqee kumbay jiliaad kay chhah beton eeazar, khalaq, asreeel, sikam, sameeda aur hifar say niklay huay thay.

hifar silaafihaad ka baap tha. silaafihaad ka koee beta naheen balki paanch betiyaan mahelaah, nooaah, hujlaah, milkaah aur tirza theen.

^35-37 ifraaeem kay qabeelay kay 32,500 mard thay. qabeelay kay chaar kumbay sootalahee, bakree, tahenee aur eeraanee thay. pahelay teen kumbay ifraaeem kay beton sootalah, bakar aur tahen say jabki eeraanee sootalah kay betay eeraan say niklay huay thay.

^38-41 binyameen kay qabeelay kay 45,600 mard thay. qabeelay kay saat kumbay baalaaee, ashbelee, akheeraamee, soofaamee, hoofaamee, ardee aur naamaanee thay. pahelay paanch kumbay binyameen kay beton baala, ashbel, akheeraam, soofaam aur hoofaam say jabki ardee aur naamaanee baala kay beton say niklay huay thay.

^42-43 daan kay qabeelay kay 64,400 mard thay. sab daan kay betay soohaam say niklay huay thay, is liyay soohaamee kahelaatay thay.

^44-47 aashar kay qabeelay kay 53,400 mard thay. qabeelay kay baanch kumbay yimnee, isvee, bareeee, hibree aur malkeeelee thay. pahelay teen kumbay aashar kay beton yimna, isvee aur bareea say jabki baaqee bareea kay beton hibar aur malkeeel say niklay huay thay. aashar kee ek betee banaam sirah bhee thee.

^48-50 naftaalee kay qabeelay kay 45,400 mard thay. qabeelay kay chaar kumbay yaheseeelee, joonee, yisree aur silleemee naftaalee kay beton yaheseeel, joonee, yisar aur silleem say niklay huay thay.

⁵¹israaeelee mardon kee kul taadaad 6,01,730 thee.

⁵²rabb nay moosa say kaha, ⁵³“jab mulk-ay-kan’aan ko taqseem kiya jaaega to zameen in kee taadaad kay mutaabiq dena hai. ⁵⁴baday qabeelon ko chhotay kee nisbat ziyaada zameen dee jaaay. har qabeelay ka ilaaqa us kee taadaad say mutaabiqat rakhay. ^55-56 qur’a daalnay say faisla kiya jaaay ki har qabeelay ko kahaan zameen milegee. lekin har qabeelay kay ilaaqay ka raqba is par mabnee ho ki qabeelay kay kitnay afraad hain.”

⁵⁷laavee kay qabeelay kay teen kumbay jairsonee, qihaatee aur miraaree laavee kay beton jairson, qihaat aur miraaree say niklay huay thay. ⁵⁸is kay ilaava libnee, hibroonee, mahelee, mooshee aur korahee bhee laavee kay kumbay thay. qihaat amraam ka baap tha. ⁵⁹amraam nay laavee aurat yookbid say shaadee kee jo misr men paida huee thee. un kay do betay haaroon aur moosa aur ek betee mariyam paida huay. ⁶⁰haaroon kay betay nadab, abeehoo, ileeazar aur itmar thay. ⁶¹lekin nadab aur abeehoo rabb ko bakhoor kee naajaaiz qurbaanee pesh karnay kay baais mar gaay. ⁶²laaviyon kay mardon kee kul taadaad 23,000 thee. in men vah sab shaamil thay jo ek maah ya is say zaaid kay thay. unhen doosray israaeeliyon say alag gina gaya, kyoonki unhen israaeel men meeraas men zameen naheen milnee thee.

⁶³yoon moosa aur ileeazar nay moaab kay maidaanee ilaaqay men yareehoo kay saamnay lekin darya-ay-yardan kay mashriqee kinaaray par israaeeliyon kee mardumashumaaree kee. ⁶⁴logon ko gintay gintay unhen maaloom hua ki jo log dasht-ay-seen men moosa aur haaroon kee pahelee mardumashumaaree men ginay gaay thay vah sab mar chukay hain. ⁶⁵rabb nay kaha tha ki vah sab kay sab registaan men mar jaaengay, aur aisa hee hua tha. sirf kaalib bin yafunna aur yashooa bin noon zinda rahay.