Gintee 25

moaab israaeeliyon kee aazmaaish karta hai

¹jab israaeelee shitteem men rah rahay thay to israaeelee mard moaabee aurton say zinaakaaree karnay lagay. ²yah aisa hua ki moaabee aurten apnay devtaaon ko qurbaaniyaan pesh kartay vaqt israaeeliyon ko shareek honay kee daavat denay lageen. israaeelee daavat qabool karkay qurbaaniyon say khaanay aur devtaaon ko sijda karnay lagay. ³is tareeqay say israaeelee moaabee devta banaam baal-faghoor kee pooja karnay lagay, aur rabb ka ghazab un par aan pada. ⁴us nay moosa say kaha, “is qaum kay tamaam raahanumaaon ko saza-ay-maut day kar sooraj kee raushnee men rabb kay saamnay latka, varna rabb ka israaeeliyon par say ghazab naheen talega.” ⁵chunaanchay moosa nay israaeel kay qaaziyon say kaha, “laazim hai ki tum men say har ek apnay un aadmiyon ko jaan say maar day jo baal-faghoor devta kee pooja men shareek huay hain.”

⁶moosa aur israaeel kee pooree jamaaat mulaaqaat kay khaimay kay darvaazay par jama ho kar ronay lagay. ittifaaq say usee vaqt ek aadmee vahaan say guzra jo ek midiyaanee aurat ko apnay ghar lay ja raha tha. ⁷yah dekh kar haaroon ka pota feenhaas bin ileeazar jamaaat say nikla aur neza pakad kar ⁸us israaeelee kay peechhay chal pada. vah aurat samet apnay khaimay men daakhil hua to feenhaas nay un kay peechhay peechhay ja kar neza itnay zor say maara ki vah donon men say guzar gaya. us vaqt vaba phailnay lagee thee, lekin feenhaas kay is amal say vah ruk gaee. ⁹to bhee 24,000 afraad mar chukay thay.

¹⁰rabb nay moosa say kaha, ¹¹“haaroon kay potay feenhaas bin ileeazar nay israaeeliyon par mera ghussa thanda kar diya hai. meree ghairat apna kar vah israaeel men deegar maaboodon kee pooja ko bardaasht na kar saka. is liyay meree ghairat nay israaeeliyon ko nest-o-naabood naheen kiya. ¹²lihaaza usay bata dena ki main us kay saath salaamatee ka ahd qaaim karta hoon. ¹³is ahd kay tahet usay aur us kee aulaad ko abad tak imaam ka uhda haasil rahega, kyoonki apnay khuda kee khaatir ghairat kha kar us nay israaeeliyon ka kaffaara diya.”

¹⁴jis aadmee ko midiyaanee aurat kay saath maar diya gaya us ka naam zimree bin saloo tha, aur vah shamaaoon kay qabeelay kay ek aabaaee gharaanay ka sarparast tha. ¹⁵midiyaanee aurat ka naam kazbee tha, aur vah soor kee betee thee jo midiyaaniyon kay ek aabaaee gharaanay ka sarparast tha.

¹⁶rabb nay moosa say kaha, ¹⁷“midiyaaniyon ko dushman qaraar day kar unhen maar daalna. ¹⁸kyoonki unhon nay apnee chaalaakiyon say tumhaaray saath dushman ka sa sulook kiya, unhon nay tumhen baal-faghoor kee pooja karnay par uksaaya aur tumhen apnee bahen midiyaanee sardaar kee betee kazbee kay zareeay jisay vaba phailtay vaqt maar diya gaya bahekaaya.”