Gintee 24
1ab bal’aam ko us baat ka poora yaqeen ho gaya ki rabb ko pasand hai ki main israaeeliyon ko barkat doon. is liyay us nay is martaba pahelay kee tarah jaadoogree ka tareeqa istemaal na kiya balki seedha registaan kee taraf rukh kiyaa 2jahaan israaeel apnay apnay qabeelon kee tarteeb say khaimaazan tha. yah dekh kar allaah ka rooh us par naazil hua, 3aur vah bol utha,
“bal’aam bin baor ka paighaam suno, us kay paighaam par ghaur karo jo saaf saaf dekhta hai, 4us ka paighaam jo allaah kee baaten sun leta hai, qaadir-ay-mutlaq kee roya ko dekh leta hai aur zameen par gir kar posheeda baaten dekhta hai.
5ai yaaqoob, teray khaimay kitnay shaandaar hain! ai israaeel, teray ghar kitnay achchhay hain!
6vah door tak phailee huee vaadiyon kee maanind, naher kay kinaaray lagay baaghon kee maanind, rabb kay lagaaay huay ood kay darakhton kee maanind, paanee kay kinaaray lagay deodaar kay darakhton kee maanind hain.
7un kee baaltiyon say paanee chhalakta rahega, un kay beej ko kasrat ka paanee milega. un ka baadshaah ajaaj say ziyaada taaqatvar hoga, aur un kee saltanat sarfaraaz hogee.
8allaah unhen misr say nikaal laaya, aur unhen janglee bail kee see taaqat haasil hai. vah mukhaalif qaumon ko hadap karkay un kee haddiyaan choor choor kar detay hain, vah apnay teer chala kar unhen maar daaltay hain.
9israaeel sherbabar ya shernee kee maanind hai. jab vah dabak kar baith jaaay to koee bhee usay chhednay kee jur’at naheen karta. jo tujhay barkat day usay barkat milay, aur jo tujh par laanat bhejay us par laanat aaay.”
10yah sun kar balaq aapay say baahar hua. us nay taalee baja kar apnee hiqaarat ka izhaar kiya aur kaha, “main nay tujhay is liyay bulaaya tha ki too meray dushmanon par laanat bhejay. ab too nay unhen teenon baar barkat hee dee hai. 11ab dafa ho ja! apnay ghar vaapas bhaag ja! main nay kaha tha ki bada in’aam doonga. lekin rabb nay tujhay in’aam paanay say rok diya hai.”
12bal’aam nay javaab diya, “kya main nay un logon ko jinhen aap nay mujhay bulaanay kay liyay bheja tha naheen bataaya thaa 13ki agar balaq apnay mahel ko chaandee aur sonay say bhar kar bhee mujhay day day to bhee main rabb kee kisee baat kee khilaafvarzee naheen kar sakta, khwaah meree neeyat achchhee ho ya buree. main sirf vah kuchh kar sakta hoon jo allaah farmaata hai. 14ab main apnay vatan vaapas chala jaata hoon. lekin pahelay main aap ko bata deta hoon ki aakhirkaar yah qaum aap kee qaum kay saath kya kuchh karegee.”
bal’aam kee chauthee barkat
15vah bol utha,
“bal’aam bin baor ka paighaam suno, us ka paighaam jo saaf saaf dekhta hai,
16us ka paighaam jo allaah kee baaten sun leta aur allaah t’aala kee marzee ko jaanta hai, jo qaadir-ay-mutlaq kee roya ko dekh leta aur zameen par gir kar posheeda baaten dekhta hai.
17jisay main dekh raha hoon vah us vaqt naheen hai. jo mujhay nazar a raha hai vah qareeb naheen hai. yaaqoob kay gharaanay say sitaara niklega, aur israaeel say asa-ay-shaahee uthega jo moaab kay maathon aur set kay tamaam beton kee khopdiyon ko paash paash karega.
18adom us kay qabzay men aaega, us ka dushman saeer us kee milkiyat banega jabki israaeel kee taaqat badhtee jaaegee.
19yaaqoob kay gharaanay say ek hukmaraan niklega jo shaher kay bachay huon ko halaak kar dega.”
bal’aam kay aakhiree paighaam
20phir bal’aam nay amaaleeq ko dekha aur kaha,
“amaaleeq qaumon men avval tha, lekin aakhirkaar vah khatm ho jaaega.”
21phir us nay qeeniyon ko dekha aur kaha,
“teree sukoonatgaah mustahkam hai, tera chataan men bana ghonsla mazboot hai.
22lekin too tabaah ho jaaega jab asoor tujhay giriftaar karega.”
23ek aur dafa us nay baat kee,
“haay, kaun zinda rah sakta hai jab allaah yoon karega?
24kitteem kay saahil say baheree jahaaz aaengay jo asoor aur ibar ko zaleel karengay, lekin vah khud bhee halaak ho jaaengay.”
25phir bal’aam uth kar apnay ghar vaapas chala gaya. balaq bhee vahaan say chala gaya.